ജിദ്ദ- ഇടതുമുന്നണി ഭരണത്തിന്റെ പതനം ആഘോഷിച്ച് പ്രവാസലോകത്തെ യു.ഡി.എഫ് പ്രവര്ത്തകര്. പല സ്ഥലങ്ങളിലും വലിയ സ്ക്രീനുകള് സ്ഥാപിച്ച് ഫലപ്രഖ്യാപനത്തിന് സാക്ഷ്യം വഹിച്ച യു.ഡി.എഫ് പ്രവര്ത്തകരുടെ ആഘോഷം വോട്ടെണ്ണല് ദിനത്തില് രാവിലെ അഞ്ചരക്ക് തുടങ്ങി പാതിരാത്രിയിലാണ് അവസാനിച്ചത്.
സൗദിയില് അതിരാവിലെ അഞ്ചരയോടെ തന്നെ തെരഞ്ഞെടുപ്പ് ഫലത്തിന്റെ ആദ്യ സൂചനകള് ലഭ്യമായിത്തുടങ്ങി. പ്രവര്ത്തകര്ക്ക് ഒത്തുകൂടാനും വോട്ടെണ്ണല് തത്സമയം വീക്ഷിക്കാനുമായി ജിദ്ദ സഫയര് ഹോട്ടലില് സ്ഥാപിച്ച കൂറ്റന് സ്ക്രീനുകള്ക്ക് മുമ്പില് നൂറുകണക്കിന് പേര് ഒത്തുകൂടി. യു.ഡി.എഫിന്റെ തരംഗവിജയം മുന്നേറുന്നതിന് അനുസരിച്ച് കാണികള് ആവേശഭരിതരായി.
ഫലപ്രഖ്യാപനം ഏതാണ്ട് പൂര്ണമായ ശേഷം രാത്രി വീണ്ടും ഒത്തുകൂടിയ പ്രവര്ത്തകര് വിജയഗാനങ്ങള് ആലപിച്ചും നൃത്തം ചവിട്ടിയും മുദ്രാവാക്യം മുഴക്കിയും പാര്ട്ടി പതാകകള് വീശിയും ആഹ്ലാദം പ്രകടിപ്പിച്ചു. ആഹ്ലാദപ്രകടനം രാത്രി 12 വരെ നീണ്ടു. പായസവിതരണവും നടത്തിയാണ് പ്രവര്ത്തകര് പിരിഞ്ഞത്. ജിദ്ദ മലപ്പുറം യു.ഡി.എഫ് കമ്മിറ്റിയുടെ നേതൃത്വത്തിലായിരുന്നു ആഹ്ലാദപ്രകടനം. അസീസ് ലാക്കല്, യു.എം ഹുസൈന് മലപ്പുറം തുടങ്ങിയവര് നേതൃത്വം നല്കി.
Related News
