കൊച്ചി: കേരള നിയമസഭയില് 102 സീറ്റുകളുടെ മാന്ത്രിക സംഖ്യയുമായി യു.ഡി.എഫ് അധികാരം തിരിച്ചുപിടിച്ചതിന് പിന്നാലെ, വിജയശില്പി വി.ഡി. സതീശന് എറണാകുളത്ത് ആവേശോജ്ജ്വല സ്വീകരണം. തിരുവനന്തപുരത്തെ ആഘോഷങ്ങള്ക്ക് ശേഷം വന്ദേഭാരത് എക്സ്പ്രസില് എറണാകുളം സൗത്ത് റെയില്വേ സ്റ്റേഷനിലെത്തിയ പ്രതിപക്ഷ നേതാവിനെ സ്വീകരിക്കാന് ജനസാഗരമാണ് തടിച്ചുകൂടിയത്.
ട്രെയിന് പ്ലാറ്റ്ഫോമിലെത്തിയപ്പോള് തന്നെ നൂറുകണക്കിന് പ്രവര്ത്തകര് സതീശനെ വളഞ്ഞു. 'ഞങ്ങടെ മുഖ്യ നേതാവേ', 'പറവൂരിന്റെ മണിമുത്തേ' എന്നിങ്ങനെയുള്ള വിളികള്ക്കൊപ്പം 'മുഖ്യമന്ത്രി സതീശാ' എന്ന മുദ്രാവാക്യങ്ങളാലും സ്റ്റേഷന് പരിസരം പ്രകമ്പനം കൊണ്ടു. ആവേശഭരിതരായ പ്രവര്ത്തകര് അദ്ദേഹത്തെ എടുത്തുയര്ത്തിയാണ് പുറത്തേക്ക് ആനയിച്ചത്. തിരുവനന്തപുരത്തെക്കാള് വലിയ ജനക്കൂട്ടമാണ് സതീശനെ വരവേല്ക്കാന് എറണാകുളത്ത് എത്തിയത്.
നൂറ് സീറ്റുകള് നേടി യു.ഡി.എഫ് അധികാരത്തിലെത്തുമെന്ന് തിരഞ്ഞെടുപ്പിന് മുന്പേ പ്രവചിച്ച നേതാവാണ് വി.ഡി. സതീശന്. 2021-ല് കേവലം 41 സീറ്റുകളിലേക്ക് ഒതുങ്ങിയ മുന്നണിയെ അഞ്ച് വര്ഷം കൊണ്ട് 102 എന്ന വമ്പിച്ച ഭൂരിപക്ഷത്തിലേക്ക് നയിച്ച സതീശന്റെ പോരാട്ടവീര്യത്തെ പ്രവര്ത്തകര് ഹര്ഷാരവത്തോടെയാണ് സ്വീകരിച്ചത്. എറണാകുളം ജില്ലയിലെ 14 മണ്ഡലങ്ങളിലും യു.ഡി.എഫ് നേടിയ ആധിപത്യം സ്വീകരണത്തിന് പിന്നാലെ നടന്ന പ്രകടനത്തിലും പ്രകടമായിരുന്നു.
ഡി.സി.സി പ്രസിഡന്റ് മുഹമ്മദ് ഷിയാസ്, കൊച്ചി മേയര് വി.കെ. മിനിമോള്, വി.കെ. വിനോദ് എന്നിവരുടെ നേതൃത്വത്തിലായിരുന്നു സ്വീകരണ ചടങ്ങുകള്. കെ.എസ്.യു, യൂത്ത് കോണ്ഗ്രസ് പ്രവര്ത്തകര് ഉള്പ്പെടെ ആയിരക്കണക്കിന് പേര് പൂച്ചെണ്ടുകളും ഉപഹാരങ്ങളുമായെത്തി. വലിയ വാഹനവ്യൂഹത്തിന്റെ അകമ്പടിയോടെ ജാഥയായാണ് പ്രവര്ത്തകര് അദ്ദേഹത്തെ നഗരത്തിലേക്ക് ആനയിച്ചത്.
ജനനായകനായി മാറിയ സതീശന്റെ അടുത്ത രാഷ്ട്രീയ നിയോഗം എന്താകുമെന്ന ആകാംക്ഷയിലാണ് ഇപ്പോള് രാഷ്ട്രീയ കേരളം. വരാനിരിക്കുന്ന മന്ത്രിസഭാ രൂപീകരണത്തിലും മുഖ്യമന്ത്രി പദവിയിലും സതീശന് തന്നെ എത്തുമെന്ന ഉറച്ച വിശ്വാസത്തിലാണ് എറണാകുളത്തെ കോണ്ഗ്രസ് അണികള്.
Related News
