തിരുവനന്തപുരം- കേരളത്തിന്റെ പുതിയ മുഖ്യമന്ത്രിയെ കണ്ടെത്താനുള്ള നിര്ണ്ണായക ചര്ച്ചകള്ക്കായി കോണ്ഗ്രസ് ഹൈക്കമാന്ഡ് നിരീക്ഷകര് തിരുവനന്തപുരത്തെ കെ.പി.സി.സി ആസ്ഥാനത്ത് എം.എല്.എ മാരെ കാണുന്നു. മുതിര്ന്ന നേതാക്കളായ അജയ് മാക്കന്, മുകുള് വാസ്നിക് എന്നിവര് നിയുക്ത എം.എല്.എമാരുമായി കൂടിക്കാഴ്ച നടത്തി വ്യക്തിപരമായ അഭിപ്രായങ്ങള് ആരായുകയാണ്. മുഖ്യമന്ത്രി പദത്തിനായി വി.ഡി. സതീശന്, കെ.സി. വേണുഗോപാല്, രമേശ് ചെന്നിത്തല എന്നിവര്ക്കിടയില് ശക്തമായ മത്സരമാണ് നടക്കുന്നത്. ചര്ച്ചകള്ക്ക് മുന്നോടിയായി കെ.സി. വേണുഗോപാലിനെ മുഖ്യമന്ത്രിയാക്കണമെന്ന് ആവശ്യപ്പെട്ട് കെ.പി.സി.സി പ്രസിഡന്റ് കെ. സുധാകരന് നിരീക്ഷകര്ക്ക് കത്ത് നല്കിയത് രാഷ്ട്രീയ കേന്ദ്രങ്ങളില് വലിയ ചര്ച്ചയായിട്ടുണ്ട്. കെ.സിക്ക് അമ്പതിലേറെ എം.എല്.എമാരുടെ പിന്തുണയുണ്ടെന്നാണ് അദ്ദേഹത്തെ അനുകൂലിക്കുന്നവരുടെ അവകാശവാദം.
മറുഭാഗത്ത്, തിരഞ്ഞെടുപ്പ് വിജയത്തിന് ചുക്കാന് പിടിച്ച വി.ഡി. സതീശന് തന്നെ മുഖ്യമന്ത്രിയാകണമെന്ന നിലപാടില് ഒരു വിഭാഗം ഉറച്ചുനില്ക്കുന്നു. സതീശനെ പിന്തുണച്ച് സംസ്ഥാനത്തിന്റെ വിവിധ ഭാഗങ്ങളില് പ്രകടനങ്ങളും പോസ്റ്ററുകളും പ്രത്യക്ഷപ്പെട്ടു. പൊതുസമൂഹത്തിന്റെ താല്പര്യം പരിഗണിച്ചില്ലെങ്കില് അത് തിരിച്ചടിയാകുമെന്ന മുന്നറിയിപ്പും ഇവര് നല്കുന്നുണ്ട്. സീനിയോറിറ്റി പരിഗണിച്ച് രമേശ് ചെന്നിത്തലയും അവകാശവാദവുമായി രംഗത്തുണ്ട്. ഹൈക്കമാന്ഡ് നിരീക്ഷകര് എം.എല്.എമാര്ക്ക് പുറമെ മുസ്ലീം ലീഗ് ഉള്പ്പെടെയുള്ള ഘടകകക്ഷികളുടെ കൂടി അഭിപ്രായം തേടിയ ശേഷമാകും അന്തിമ തീരുമാനമെടുക്കുക. സതീശനെ പരിഗണിച്ചില്ലെങ്കില് അദ്ദേഹം മന്ത്രിസഭയില്നിന്ന് മാറി നിന്നേക്കുമെന്ന അഭ്യൂഹങ്ങള് നിലനില്ക്കുന്നതിനാല് ഏറെ കരുതലോടെയുള്ള നീക്കങ്ങളാണ് ഹൈക്കമാന്ഡ് നടത്തുന്നത്.
Related News
