ദുബായ്- ഹോര്മുസ് കടലിടുക്കിന് സമീപം ഇന്ത്യന് ഉരുവിന് തീപിടിച്ചുണ്ടായ അപകടത്തില് ഒരു ഇന്ത്യന് നാവികന് മരിക്കുകയും നാല് പേര്ക്ക് പരിക്കേല്ക്കുകയും ചെയ്തു. 18 ഇന്ത്യന് ജീവനക്കാരുണ്ടായിരുന്ന കപ്പലില് തീ പടര്ന്നതിനെത്തുടര്ന്ന് കടലിലൂടെ കടന്നുപോയ മറ്റൊരു കപ്പലാണ് രക്ഷാപ്രവര്ത്തനം നടത്തിയത്. പരിക്കേറ്റവര് നിലവില് ചികിത്സയിലാണെന്നും ദുരന്തത്തില് അങ്ങേയറ്റം ഖേദിക്കുന്നുവെന്നും ദുബായിലെ ഇന്ത്യന് കോണ്സുലേറ്റ് അറിയിച്ചു.
അപകടത്തെത്തുടര്ന്ന് കപ്പല് ഉടമയുമായി നിരന്തരം ബന്ധപ്പെട്ടുവരികയാണെന്നും ആവശ്യമായ എല്ലാ സഹായങ്ങളും മുന്ഗണനാടിസ്ഥാനത്തില് നല്കുമെന്നും കോണ്സുലേറ്റ് ജനറല് എക്സ് പ്ലാറ്റ്ഫോമിലൂടെ വ്യക്തമാക്കി. രക്ഷപ്പെട്ട ജീവനക്കാരെ ഉദ്യോഗസ്ഥര് നേരില് കണ്ട് സ്ഥിതിഗതികള് വിലയിരുത്തിയിട്ടുണ്ട്. സംഭവത്തെക്കുറിച്ച് കൂടുതല് വിവരങ്ങള് ശേഖരിച്ചുവരികയാണെന്നും ബാധിക്കപ്പെട്ടവര്ക്ക് പൂര്ണ്ണ പിന്തുണ ഉറപ്പാക്കുമെന്നും മിഷന് അറിയിച്ചു.
ലോകത്തെ പ്രധാന ഊര്ജ്ജ ഇടനാഴിയായ ഹോര്മുസ് കടലിടുക്ക് ഉള്പ്പെടുന്ന പശ്ചിമേഷ്യന് മേഖലയില് കപ്പല് ഗതാഗതത്തിന് വെല്ലുവിളികള് വര്ദ്ധിച്ചുവരുന്ന സാഹചര്യത്തിലാണ് ഈ അപകടം നടന്നത്. വാണിജ്യ കപ്പലുകള്ക്ക് ഈ പാതയില് നിലവില് വലിയ സുരക്ഷാ ഭീഷണിയുണ്ട്. മരണപ്പെട്ട നാവികന്റെ കുടുംബത്തെ അനുശോചനം അറിയിച്ച കോണ്സുലേറ്റ്, തുടര്നടപടികള് വേഗത്തിലാക്കാന് ഏകോപനം നടത്തിവരികയാണ്.
Related News
