റിയാദ്- അറ്റ്ലാന്റിക് സമുദ്രത്തിലെ ക്രൂസ് കപ്പലില് ഹന്താ വൈറസ് കേസുകള് റിപ്പോര്ട്ട് ചെയ്ത പശ്ചാത്തലത്തില്, സ്ഥിതിഗതികള് സൂക്ഷ്മമായി നിരീക്ഷിച്ചു വരികയാണെന്ന് സൗദി പബ്ലിക് ഹെല്ത്ത് അതോറിറ്റി അറിയിച്ചു. അന്താരാഷ്ട്ര ആരോഗ്യ സംഘടനകളുമായി സഹകരിച്ചാണ് നിരീക്ഷണം നടക്കുന്നത്. നിലവിലെ വിലയിരുത്തല് അനുസരിച്ച് ഈ വൈറസ് മൂലമുള്ള ആരോഗ്യ ഭീഷണി വളരെ കുറവാണെന്നും അതോറിറ്റി വ്യക്തമാക്കി. എലികളുമായോ അവയുടെ സാന്നിധ്യമുള്ള സ്ഥലങ്ങളുമായോ സമ്പര്ക്കം പുലര്ത്തുന്നത് ഒഴിവാക്കണമെന്ന് അധികൃതര് നിര്ദ്ദേശിച്ചു.
രാജ്യത്തെ ശക്തമായ എപ്പിഡെമിയോളജിക്കല് നിരീക്ഷണ സംവിധാനങ്ങള്, അതിര്ത്തി നിയന്ത്രണങ്ങള്, ഭക്ഷ്യ സുരക്ഷാ പരിശോധനകള് എന്നിവയുടെ ഫലമായി വൈറസ് സൗദി അറേബ്യയില് എത്താനുള്ള സാധ്യത വളരെ കുറവാണെന്ന് അതോറിറ്റി കൂട്ടിച്ചേര്ത്തു. മുന്കരുതല് നടപടികള് കാര്യക്ഷമമായി നടപ്പിലാക്കുന്നുണ്ടെന്നും പൊതുജനാരോഗ്യ സംവിധാനങ്ങള് സജ്ജമാണെന്നും അധികൃതര് ഉറപ്പുനല്കി. ഹന്താ വൈറസ് അപൂര്വ്വമാണെങ്കിലും ബാധിച്ചാല് ഗുരുതരമാകാന് സാധ്യതയുള്ള ഒന്നാണെന്ന് മന്ത്രാലയം ഓര്മ്മിപ്പിച്ചു.
രോഗബാധയുള്ള എലികളുടെ മൂത്രം, കാഷ്ഠം, ഉമിനീര് എന്നിവ വഴിയോ ഇവ കലര്ന്ന കണികകള് ശ്വസിക്കുന്നതിലൂടെയോ ആണ് വൈറസ് മനുഷ്യരിലേക്ക് പകരുന്നത്. മനുഷ്യരില് നിന്ന് മനുഷ്യരിലേക്ക് വൈറസ് പകരുന്നത് അസാധാരണമാണ്. വളരെ അപൂര്വ്വമായ സാഹചര്യങ്ങളില് മാത്രമാണ് ഇത്തരത്തില് രോഗം റിപ്പോര്ട്ട് ചെയ്തിട്ടുള്ളത്. വേനല്ക്കാലത്ത് യാത്രകള് വര്ദ്ധിക്കുന്ന സാഹചര്യത്തില് യാത്രക്കാര്ക്കിടയില് ആരോഗ്യ അവബോധം വളര്ത്തുന്നതിന്റെ ഭാഗമായാണ് ഈ മുന്നറിയിപ്പ് പുറപ്പെടുവിച്ചിരിക്കുന്നത്.
യാത്രക്കാര് ഔദ്യോഗിക ആരോഗ്യ നിര്ദ്ദേശങ്ങള് കര്ശനമായി പാലിക്കണമെന്ന് അതോറിറ്റി നിര്ദ്ദേശിച്ചു. ഭക്ഷണത്തിന്റെയും വെള്ളത്തിന്റെയും സുരക്ഷ ഉറപ്പാക്കുക, വ്യക്തിശുചിത്വം പാലിക്കുക, എലികളുമായോ അവയുടെ ആവാസവ്യവസ്ഥകളുമായോ സമ്പര്ക്കം ഒഴിവാക്കുക എന്നിവ പ്രധാനമാണ്. ഔദ്യോഗിക സ്രോതസ്സുകളില് നിന്നുള്ള വിവരങ്ങള് മാത്രം വിശ്വസിക്കണമെന്നും വ്യാജവാര്ത്തകളില് വഞ്ചിതരാകരുതെന്നും പബ്ലിക് ഹെല്ത്ത് അതോറിറ്റി അറിയിച്ചു. പൊതുജനാരോഗ്യവുമായി ബന്ധപ്പെട്ട ഏത് മാറ്റങ്ങളും യഥാസമയം അറിയിക്കുമെന്നും അധികൃതര് വ്യക്തമാക്കി.
Related News
