റിയാദ്- ഐക്യരാഷ്ട്രസഭയുടെ ഇക്കണോമിക് ആന്ഡ് സോഷ്യല് കൗണ്സില്, 2027 മുതല് 2030 വരെയുള്ള കാലയളവിലേക്ക് ശാസ്ത്ര സാങ്കേതിക വികസനത്തിനായുള്ള സമിതിയിലേക്ക് സൗദി അറേബ്യയെ തിരഞ്ഞെടുത്തു. ശാസ്ത്രം, സാങ്കേതികവിദ്യ, നവീകരണം എന്നീ മേഖലകളില് ആഗോള നയങ്ങള് രൂപീകരിക്കുന്നതിലും അന്താരാഷ്ട്ര തലത്തില് സ്വാധീനം ചെലുത്തുന്നതിലും സൗദി അറേബ്യ വഹിക്കുന്ന നിര്ണ്ണായക പങ്കിനുള്ള അംഗീകാരമാണിത്. ആഗോള വിഷയങ്ങളില് സൗദി അറേബ്യ നല്കുന്ന സജീവമായ സംഭാവനകളുടെയും നേതൃപാടവത്തിന്റെയും പ്രതിഫലനമാണ് ഈ തിരഞ്ഞെടുപ്പ്.
ഉദിച്ചുവരുന്ന സാങ്കേതികവിദ്യകള്, ഡാറ്റാ ഗവേണന്സ്, ആര്ട്ടിഫിഷ്യല് ഇന്റലിജന്സ്, സുസ്ഥിര വികസന ലക്ഷ്യങ്ങള് എന്നിവയുമായി ബന്ധപ്പെട്ട ആഗോള ചര്ച്ചകളില് സൗദിയുടെ പങ്കാളിത്തം ഈ നേട്ടത്തിലൂടെ കൂടുതല് ശക്തമാകുമെന്ന് കമ്മ്യൂണിക്കേഷന്സ്, സ്പേസ് ആന്ഡ് ടെക്നോളജി കമ്മീഷന് വ്യക്തമാക്കി. വേള്ഡ് സമ്മിറ്റ് ഓണ് ഇന്ഫര്മേഷന് സൊസൈറ്റി, ഗ്ലോബല് ഡിജിറ്റല് ചാര്ട്ടര് എന്നിവയുടെ ഫലങ്ങള് നിരീക്ഷിക്കുന്നതിനും യുഎന് പൊതുസഭയ്ക്കായി അന്താരാഷ്ട്ര ശുപാര്ശകള് വികസിപ്പിക്കുന്നതിനും ഈ അംഗത്വം സൗദിയെ സഹായിക്കും. വിദേശകാര്യ മന്ത്രാലയവുമായി ഏകോപിപ്പിച്ചാണ് ഈ നേട്ടം കൈവരിച്ചത്.
അന്താരാഷ്ട്ര തലത്തില് ഒരു സജീവ പങ്കാളിയെന്ന നിലയില് സൗദി അറേബ്യയുടെ സ്ഥാനം ഉറപ്പിക്കാന് ഈ തിരഞ്ഞെടുപ്പ് സഹായിക്കും. 1992-ല് സ്ഥാപിതമായ സിഎസ്ടിഡി, ശാസ്ത്ര-സാങ്കേതിക മേഖലകളില് യുഎന് പൊതുസഭയുടെ പ്രധാന ഉപദേശക സമിതിയാണ്. നേരത്തെ 2022-ല് സമിതിയുടെ 25-ാമത് സെഷന്റെ അധ്യക്ഷസ്ഥാനം വഹിച്ചതും സൗദി അറേബ്യയായിരുന്നു. ഡിജിറ്റല് മേഖലയിലെ സൗദിയുടെ നേതൃത്വത്തിലുള്ള അന്താരാഷ്ട്ര സമൂഹത്തിന്റെ വിശ്വാസമാണ് വീണ്ടും ഈ അംഗത്വത്തിലൂടെ പ്രകടമാകുന്നത്.
Related News
