മദീന- ചരിത്രപ്രസിദ്ധമായ ഖുബാ മസ്ജിദിന്റെ ഉള്മുറ്റത്ത് ഡ്രൈവറില്ലാ സ്വയം നിയന്ത്രിത ഷട്ടില് ബസുകളുടെ (റോബോ ബസ്) പരീക്ഷണ ഓട്ടം ആരംഭിച്ചു. പബ്ലിക് ട്രാന്സ്പോര്ട്ട് അതോറിറ്റിയും മദീന റീജിയന് ഡെവലപ്മെന്റ് അതോറിറ്റിയും സംയുക്തമായാണ് ഈ പദ്ധതിക്ക് തുടക്കം കുറിച്ചത്. തിരക്കേറിയതും പ്രധാനപ്പെട്ടതുമായ സ്ഥലങ്ങളില് ഇത്തരത്തിലുള്ള സ്മാര്ട്ട് സേവനങ്ങളുടെ കാര്യക്ഷമത അളക്കുന്നതിനും, സുസ്ഥിരമായ ഗതാഗത സംവിധാനങ്ങള് പ്രാവര്ത്തികമാക്കുന്നതിനുമാണ് ഈ നീക്കത്തിലൂടെ ലക്ഷ്യമിടുന്നത്. ആധുനിക സാങ്കേതികവിദ്യയിലൂടെ തീര്ത്ഥാടകരുടെ യാത്രാനുഭവം മെച്ചപ്പെടുത്തുക എന്നതാണ് ഇതിന്റെ പ്രധാന ഉദ്ദേശം.
ആര്ട്ടിഫിഷ്യല് ഇന്റലിജന്സ്, അത്യാധുനിക സെന്സിംഗ് സംവിധാനങ്ങള്, ഉയര്ന്ന റെസല്യൂഷനുള്ള ക്യാമറകള് എന്നിവ പ്രയോജനപ്പെടുത്തിയാണ് ഈ റോബോബസ് പ്രവര്ത്തിക്കുന്നത്. യാത്രക്കാരുടെയും കാല്നടയാത്രക്കാരുടെയും സുരക്ഷ ഉറപ്പാക്കുന്നതിനായി 700 മീറ്റര് ദൈര്ഘ്യമുള്ള പ്രത്യേക പാത കൃത്യമായി രൂപകല്പ്പന ചെയ്തിട്ടുണ്ട്. പുരുഷന്മാര്ക്കും സ്ത്രീകള്ക്കുമായി നിശ്ചയിച്ചിട്ടുള്ള പ്രവേശന കവാടങ്ങളില്നിന്ന് ബസ് സര്വീസ് ലഭ്യമാകും. നിലവിലുള്ള ഗോള്ഫ് കാര്ട്ടുകളുടെ പാത പിന്തുടരുന്നതിനാല് മറ്റ് ഗതാഗത തടസ്സങ്ങളില്ലാതെ സുഗമമായ സഞ്ചാരം ഇത് ഉറപ്പാക്കുന്നു.
60 ദിവസമാണ് ഈ പരീക്ഷണ ഓട്ടം. ഈ കാലയളവില് ഹൈ-റെസല്യൂഷന് ഡിജിറ്റല് മാപ്പുകള് വഴി വിവരങ്ങള് ശേഖരിക്കുകയും നഗരത്തിലെ അടിസ്ഥാന സൗകര്യങ്ങളുമായി വാഹനം എത്രത്തോളം പൊരുത്തപ്പെടുന്നുണ്ടെന്ന് പരിശോധിക്കുകയും ചെയ്യും. ഈ ഘട്ടം വിജയകരമായാല് ഭാവിയില് കൂടുതല് സ്ഥലങ്ങളിലേക്ക് സേവനം വ്യാപിപ്പിക്കാനാണ് അധികൃതരുടെ തീരുമാനം. സുരക്ഷിതവും നൂതനവുമായ യാത്രാ അന്തരീക്ഷം ഒരുക്കുന്നതിനായി ഡിജിറ്റല് മാപ്പിംഗ് ഉള്പ്പെടെയുള്ള സങ്കേതങ്ങളാണ് ഇതില് ഉപയോഗിക്കുന്നത്.
സൗദി വിഷന് 2030-ന്റെ ഭാഗമായുള്ള ഡിജിറ്റല് പരിവര്ത്തനത്തിലേക്കുള്ള സുപ്രധാന ചുവടുവെപ്പാണിത്. 2026 'ആര്ട്ടിഫിഷ്യല് ഇന്റലിജന്സ് വര്ഷമായി' ആചരിക്കുന്ന പശ്ചാത്തലത്തില് ഈ പദ്ധതിക്ക് വലിയ പ്രാധാന്യമുണ്ട്. സ്മാര്ട്ട് ട്രാന്സ്പോര്ട്ട് സാങ്കേതികവിദ്യകള് പ്രാദേശികവല്ക്കരിക്കുന്നതിലും വിനോദസഞ്ചാരികള്ക്കും താമസക്കാര്ക്കും ലോകോത്തര നിലവാരമുള്ള സേവനങ്ങള് നല്കുന്നതിലും സൗദി അറേബ്യ മുന്തൂക്കം നല്കുകയാണ്.
Related News
