ഖോബാര്‍: മുഹമ്മദ് അമാനി മൗലവി രചിച്ച ഖുര്‍ആന്‍ വിവരണവും സ്വഹീഹുല്‍ ബുഖാരി ഹദീസ് പരിഭാഷയും ആസ്പദമാക്കി റിയാദ് ഇസ്ലാഹി സെന്റേഴ്‌സ് കോര്‍ഡിനേഷന്‍ കമ്മിറ്റി (ആര്‍.ഐ.സി.സി) സൗദി അറേബ്യയില്‍ സംഘടിപ്പിക്കുന്ന ഖുര്‍ആന്‍ ഹദീസ് ലേണിംഗ് കോഴ്‌സ് (QHLC) പതിമൂന്നാം ഘട്ടത്തിലേക്ക്. കഴിഞ്ഞ 12 വര്‍ഷമായി നടന്നുവരുന്ന ഈ പദ്ധതിയില്‍ സൗദിയില്‍ നിന്നും കേരളത്തില്‍ നിന്നുമായി ആയിരക്കണക്കിന് പഠിതാക്കളാണ് ഇതിനകം പങ്കുചേര്‍ന്നത്.

പതിമൂന്നാം ഘട്ട പുസ്തകത്തിന്റെ സൗദിതല പ്രകാശനം പ്രമുഖ പണ്ഡിതന്‍ അബ്ദുല്‍ ജബ്ബാര്‍ അബ്ദുല്ല മദീനി (ദമ്മാം ഇസ്ലാമിക് കള്‍ച്ചറല്‍ സെന്റര്‍ മലയാള വിഭാഗം ദാഇ) നിര്‍വ്വഹിച്ചു. വിശുദ്ധ ഖുര്‍ആനും തിരുവചനങ്ങളും പഠിക്കാന്‍ ലളിതമായ ഈ പദ്ധതി മലയാളി സമൂഹം പ്രയോജനപ്പെടുത്തണമെന്ന് അദ്ദേഹം ഓര്‍മ്മിപ്പിച്ചു. മാമുക്കോയ കോഴിക്കോട് അദ്ദേഹത്തില്‍ നിന്നും പുസ്തകം ഏറ്റുവാങ്ങി.

കിഴക്കന്‍ പ്രവിശ്യാ പ്രസിഡന്റ് ഡോ. ഷഹനാസ്, ജനറല്‍ സെക്രട്ടറി ആസാദ് വളപട്ടണം, അല്‍-ഖോബാര്‍ ഇസ്ലാഹി സെന്റര്‍ സെക്രട്ടറി അബ്ദുല്‍ ലത്തീഫ് കോതൊടിയില്‍, ദമ്മാം ഇസ്ലാഹി സെന്റര്‍ സെക്രട്ടറി നൗഷാദ് കാസിം, ജുബൈല്‍ ഇസ്ലാഹി സെന്റര്‍ സെക്രട്ടറി അബ്ദുല്‍ മന്നാന്‍, ദേശീയ സെക്രട്ടേറിയറ്റ് അംഗം നൗഫല്‍ സുബൈര്‍ (ജുബൈല്‍), ക്യു.എച്ച്.എല്‍.സി കണ്‍വീനര്‍മാരായ അമീന്‍ പൊന്നാനി (കിഴക്കന്‍ പ്രവിശ്യ), അബ്ദുല്‍ അസീസ് (അല്‍-ഖോബാര്‍), ഷൗക്കത്ത് എ.പി (ജുബൈല്‍) തുടങ്ങിയവര്‍ സംബന്ധിച്ചു.

വിശുദ്ധ ഖുര്‍ആനിലെ അല്‍ മുഅ്മിനൂന്‍, അന്നൂര്‍, അല്‍ ഫുര്‍ഖാന്‍ എന്നീ അധ്യായങ്ങളും ഹദീസില്‍ നിന്നുള്ള 'കച്ചവടം' എന്ന അധ്യായവുമാണ് ഈ ഘട്ടത്തിലെ പാഠ്യപദ്ധതിയില്‍ ഉള്‍പ്പെടുത്തിയിരിക്കുന്നത്. സൗദിയിലെ അന്‍പതിലധികം കേന്ദ്രങ്ങളില്‍ ഓഫ്ലൈന്‍ ആയും ഓണ്‍ലൈന്‍ ആയും പഠന ക്ലാസുകള്‍ ആരംഭിച്ചുകഴിഞ്ഞു. കുട്ടികള്‍ക്കും മുതിര്‍ന്നവര്‍ക്കും ഒരുപോലെ കോഴ്‌സില്‍ ചേരാവുന്നതാണ്.

പുസ്തകങ്ങള്‍ സൗദിയിലെ വിവിധ കേന്ദ്രങ്ങളില്‍ ലഭ്യമാണ്. കൂടുതല്‍ വിവരങ്ങള്‍ക്ക് സതേണ്‍ പ്രൊവിന്‍സ്: അബൂബക്കര്‍ അലി (0536245335), നോര്‍ത്തേണ്‍ പ്രൊവിന്‍സ്: അന്‍വര്‍ തബൂക്ക് (0508034074), വെസ്റ്റേണ്‍ പ്രൊവിന്‍സ്: അബ്ദുല്‍ ജബ്ബാര്‍ ജിദ്ദ (0502847926), ഈസ്റ്റേണ്‍ പ്രൊവിന്‍സ്: ഫവാസ് അല്‍ഖോബാര്‍ (0507045685), ഖസീം പ്രൊവിന്‍സ്: ഷമീര്‍ ബുറൈദ (0532701946), സെന്‍ട്രല്‍ പ്രൊവിന്‍സ്: നബീല്‍ പയ്യോളി (0557710981) നമ്പറുകളില്‍ ബന്ധപ്പെടാം:

ചിത്രം:
ക്യു.എച്ച്.എല്‍.സി പതിമൂന്നാം ഘട്ട പുസ്തകത്തിന്റെ സൗദിതല പ്രകാശനം അബ്ദുല്‍ ജബ്ബാര്‍ അബ്ദുല്ല മദീനി മാമുക്കോയ കോഴിക്കോടിനു നല്‍കി നിര്‍വ്വഹിക്കുന്നു.