ന്യൂഡല്ഹി: പരീക്ഷാ ക്രമക്കേടുകളും ചോദ്യപേപ്പര് ചോര്ച്ചയും സംബന്ധിച്ച ആരോപണങ്ങള് ശക്തമായതോടെ ഈ വര്ഷത്തെ നീറ്റ് (യു.ജി) 2026 പരീക്ഷ റദ്ദാക്കി. മെയ് 3-ന് നടന്ന പരീക്ഷയുടെ ചോദ്യപേപ്പര് തലേദിവസം തന്നെ ചോര്ന്നെന്ന റിപ്പോര്ട്ടുകളെത്തുടര്ന്നാണ് നാഷണല് ടെസ്റ്റിംഗ് ഏജന്സി (എന്.ടി.എ) നിര്ണ്ണായക തീരുമാനമെടുത്തത്. സംഭവത്തില് സമഗ്രമായ അന്വേഷണം നടത്താന് കേന്ദ്രസര്ക്കാര് സി.ബി.ഐയെ ചുമതലപ്പെടുത്തി.
കേന്ദ്ര ഏജന്സികള് നല്കിയ വിവരങ്ങളും അന്വേഷണ ഏജന്സികളുടെ കണ്ടെത്തലുകളും പരിശോധിച്ച ശേഷമാണ് പരീക്ഷ റദ്ദാക്കാന് എന്.ടി.എ തീരുമാനിച്ചത്. പരീക്ഷാ പ്രക്രിയയുടെ സുതാര്യത ഉറപ്പാക്കാനും പൊതുജനവിശ്വാസം സംരക്ഷിക്കാനുമാണ് ഈ നടപടിയെന്ന് എന്.ടി.എ വാര്ത്താക്കുറിപ്പില് അറിയിച്ചു.
റദ്ദാക്കിയ പരീക്ഷ പുതിയ തീയതികളില് വീണ്ടും നടത്തും. പരീക്ഷാ തീയതികളും പുതിയ അഡ്മിറ്റ് കാര്ഡുകള് സംബന്ധിച്ച വിവരങ്ങളും ഔദ്യോഗിക വെബ്സൈറ്റിലൂടെ പിന്നീട് അറിയിക്കും. പുനഃപരീക്ഷയ്ക്കായി വിദ്യാര്ത്ഥികള് പുതിയതായി രജിസ്റ്റര് ചെയ്യേണ്ടതില്ല. മെയ് പരീക്ഷയ്ക്കായി അപേക്ഷിച്ചവരുടെ വിവരങ്ങള് അതേപടി നിലനിര്ത്തും. പരീക്ഷയ്ക്കായി അധിക ഫീസ് ഈടാക്കില്ല. നേരത്തെ നല്കിയ ഫീസ് എന്.ടി.എ വിദ്യാര്ത്ഥികള്ക്ക് റീഫണ്ട് ചെയ്യും.
പരീക്ഷാ നടത്തിപ്പിലെ പാളിച്ചകളെക്കുറിച്ച് സമഗ്രമായ അന്വേഷണം നടത്താന് കേന്ദ്ര വിദ്യാഭ്യാസ മന്ത്രാലയം തീരുമാനിച്ചു. വിഷയം സി.ബി.ഐക്ക് കൈമാറുന്നതിലൂടെ കുറ്റവാളികളെ കണ്ടെത്താനും ഭാവിയില് ഇത്തരം സംഭവങ്ങള് ആവര്ത്തിക്കാതിരിക്കാനും സാധിക്കുമെന്ന് സര്ക്കാര് വൃത്തങ്ങള് അറിയിച്ചു. അന്വേഷണവുമായി പൂര്ണ്ണമായി സഹകരിക്കുമെന്ന് എന്.ടി.എ വ്യക്തമാക്കി.
പരീക്ഷ റദ്ദാക്കിയ നടപടി രാജ്യമെമ്പാടും വലിയ പ്രതിഷേധങ്ങള്ക്ക് വഴിവെച്ചു. വിവിധ വിദ്യാര്ത്ഥി സംഘടനകളുടെ നേതൃത്വത്തില് ഡല്ഹിയില് വന് പ്രതിഷേധ പ്രകടനങ്ങള് നടന്നു. എന്.എസ്.യു.ഐയുടെ നേതൃത്വത്തില് കേന്ദ്ര വിദ്യാഭ്യാസ മന്ത്രാലയത്തിന് മുന്നില് നടന്ന പ്രതിഷേധം സംഘര്ഷഭരിതമായി. ലക്ഷക്കണക്കിന് വിദ്യാര്ത്ഥികളുടെ ഭാവി അനിശ്ചിതത്വത്തിലാക്കിയ അധികൃതരുടെ നടപടിക്കെതിരെ രാജ്യത്തിന്റെ വിവിധ ഭാഗങ്ങളില് പ്രതിഷേധം തുടരുകയാണ്.
പരീക്ഷ വീണ്ടും നടത്തുന്നത് വിദ്യാര്ത്ഥികള്ക്കും രക്ഷിതാക്കള്ക്കും വലിയ പ്രയാസമുണ്ടാക്കുമെന്നറിയാമെന്നും എന്നാല് പരീക്ഷാ സംവിധാനത്തിന്റെ വിശ്വാസ്യത നിലനിര്ത്താന് മറ്റ് വഴികളില്ലെന്നും എന്.ടി.എ വ്യക്തമാക്കി. ഔദ്യോഗിക വിവരങ്ങള്ക്കായി എന്.ടി.എയുടെ വെബ്സൈറ്റുകള് മാത്രം ആശ്രയിക്കാനും സോഷ്യല് മീഡിയയിലെ വ്യാജ വാര്ത്തകള് അവഗണിക്കാനും ഉദ്യോഗാര്ത്ഥികള്ക്ക് നിര്ദ്ദേശം നല്കിയിട്ടുണ്ട്.
Related News
