റിയാദ്: തമിഴ്നാടിന്റെ പുതിയ മുഖ്യമന്ത്രിയായി ചുമതലയേറ്റ സി. ജോസഫ് വിജയിക്കും, മന്ത്രിമാരായി സത്യപ്രതിജ്ഞ ചെയ്ത പി. വിശ്വനാഥന്, എസ്. രാജേഷ് കുമാര് എന്നിവര്ക്കും റിയാദ് ഒ.ഐ.സി.സി ഹൃദയം നിറഞ്ഞ അഭിനന്ദനങ്ങള് അറിയിച്ചു. യുവതലമുറയുടെ വലിയ പിന്തുണയോടെ തമിഴ്നാട്ടില് രൂപംകൊണ്ട പുതിയ രാഷ്ട്രീയ മുന്നേറ്റത്തിന് നേതൃത്വം നല്കുന്ന വിജയിയുടെ അധികാരാരോഹണം, ദക്ഷിണേന്ത്യന് രാഷ്ട്രീയത്തില് പുതിയ അധ്യായത്തിന് തുടക്കമിടുന്നതാണെന്ന് ഒ.ഐ.സി.സി നേതാക്കള് അഭിപ്രായപ്പെട്ടു.
സാമൂഹിക നീതി, ജനക്ഷേമം, വികസന രാഷ്ട്രീയം, മതേതര മൂല്യങ്ങള് എന്നിവ മുന്നിര്ത്തി രൂപീകരിച്ച വിശാല ജനാധിപത്യ മുന്നണിക്കാണ് തമിഴ്നാട്ടിലെ ജനങ്ങള് ശക്തമായ പിന്തുണ നല്കിയത്. രാജ്യത്തെ മതേതര ശക്തികളുടെ ഐക്യത്തിന്റെ വിജയമാണ് തമിഴ്നാട്ടിലെ ഈ രാഷ്ട്രീയ മാറ്റമെന്നും, അതുകൊണ്ടാണ് ഇന്ത്യന് നാഷണല് കോണ്ഗ്രസ് ഈ മുന്നണിക്ക് കരുത്തുറ്റ പിന്തുണ നല്കിയതെന്നും അവര് കൂട്ടിച്ചേര്ത്തു. സാധാരണക്കാരുടെ വിശ്വാസവും യുവാക്കളുടെ ആവേശവും ഒത്തുചേര്ന്ന ജനവിധിയാണ് വിജയിയെ അധികാരത്തിലെത്തിച്ചതെന്ന് റിയാദ് ഒ.ഐ.സി.സി വിലയിരുത്തി.
പുതിയ സര്ക്കാര് സാമൂഹിക ഐക്യം ശക്തിപ്പെടുത്തുമെന്നും തൊഴിലവസരങ്ങള്, വിദ്യാഭ്യാസം, ആരോഗ്യം എന്നീ മേഖലകളില് വലിയ മാറ്റങ്ങള് കൊണ്ടുവരുമെന്നും നേതാക്കള് പ്രത്യാശ പ്രകടിപ്പിച്ചു. കലാരംഗത്ത് ജനഹൃദയങ്ങള് കീഴടക്കിയ വിജയ്, ഭരണരംഗത്തും ജനകീയ മുഖമായി മാറുമെന്നാണ് പ്രവാസികളുടെ പ്രതീക്ഷ. തമിഴ്നാടിന്റെ വികസനത്തിനായി പുതിയ സര്ക്കാര് മികച്ച പ്രവര്ത്തനം കാഴ്ചവെക്കട്ടെയെന്ന് ആശംസിക്കുന്നതായും ജനാധിപത്യ-മതേതര രാഷ്ട്രീയത്തിന്റെ ശക്തമായ സന്ദേശമാണ് ഈ വിജയമെന്നും റിയാദ് ഒ.ഐ.സി.സി വാര്ത്താക്കുറിപ്പില് അറിയിച്ചു.
Related News
