റിയാദ്: സൗദി ജയിലില് കഴിയുന്ന ഫറോക്ക് സ്വദേശി അബ്ദുറഹീം ഒരാഴ്ചക്കുള്ളില് ജയില് മോചിതനാകും. 20 വര്ഷം നീണ്ട ജയില്വാസം പൂര്ത്തിയാക്കി ഈ മാസം 20-ന് റഹീമിന്റെ ശിക്ഷാ കാലാവധി അവസാനിക്കും. ഇതോടെ, നാട്ടിലേക്കുള്ള മടക്കയാത്രയ്ക്ക് തടസ്സമായി നിന്നിരുന്ന അവസാന സാങ്കേതിക കുരുക്കുകളും അഴിയുകയാണ്.
രണ്ട് പതിറ്റാണ്ടായി മകനെ കാത്തിരിക്കുന്ന ഉമ്മ ഫാത്തിമയ്ക്ക് ഇത് സ്വപ്നസാഫല്യത്തിന്റെ നിമിഷങ്ങളാണ്. ഫറോക്ക് കോടമ്പുഴയിലെ പഴയ വീട്ടില് നിന്ന് മകന് യാത്ര തിരിച്ച ആ മുറ്റത്തേക്ക് അവന് തിരികെ വരുന്നത് കാണാന് ഉമ്മ ദിനങ്ങളെണ്ണി കഴിയുകയാണ്.
റിയാദിലെ ക്രിമിനല് കോടതി വിധിച്ച ശിക്ഷയുടെ കാലാവധി മെയ് 20-ന് അവസാനിക്കുന്നതോടെ മോചന നടപടികള് വേഗത്തിലാകും. തന്റെ സ്പോണ്സറുടെ മകന് മരിക്കാനിടയായ നിര്ഭാഗ്യകരമായ സംഭവത്തെത്തുടര്ന്നാണ് റഹീം സൗദിയില് ജയിലിലായത്. വധശിക്ഷയ്ക്ക് വിധിക്കപ്പെട്ട റഹീമിനെ രക്ഷിക്കാന് ലോകമെമ്പാടുമുള്ള മലയാളികള് കൈകോര്ത്തത് ചരിത്രമായിരുന്നു. സമാനതകളില്ലാത്ത മനുഷ്യസ്നേഹത്തിന്റെ അടയാളമായി 34 കോടി രൂപയാണ് ദയാധനമായി സമാഹരിച്ച് കോടതിയില് നല്കിയത്.
ദയാധനം കൈമാറിയതിനെത്തുടര്ന്ന് കഴിഞ്ഞ വര്ഷം ജൂലൈയിലാണ് കോടതി റഹീമിന്റെ വധശിക്ഷ റദ്ദാക്കിയത്. തുടര്ന്ന് വിധിച്ച തടവുശിക്ഷ കൂടി പൂര്ത്തിയാകുന്നതോടെ റഹീമിന് ഇനി നാട്ടിലേക്ക് മടങ്ങാം. വരും ദിവസങ്ങളില് ഔദ്യോഗിക നടപടികള് പൂര്ത്തിയാക്കി റഹീം കോഴിക്കോട്ടെ തന്റെ വീട്ടില് തിരിച്ചെത്തുമെന്ന പ്രതീക്ഷയിലാണ് കുടുംബവും നാട്ടുകാരും.
Related News
