റിയാദ്: അമേരിക്കയിലെ അരിസോണ, ഫീനിക്‌സില്‍ നടക്കുന്ന 'റെജെനെറോണ്‍ ഇന്റര്‍നാഷണല്‍ സയന്‍സ് ആന്‍ഡ് എന്‍ജിനീയറിങ് ഫെയര്‍' (ISEF 2026)ല്‍ 12 പ്രത്യേക പുരസ്‌കാരങ്ങള്‍ കരസ്ഥമാക്കി സൗദി അറേബ്യയിലെ യുവശാസ്ത്രജ്ഞര്‍ മികച്ച വിജയം കൈവരിച്ചു. ആഗോള ശാസ്ത്ര ഗവേഷണ-നൂതനത്വ രംഗങ്ങളില്‍ സൗദി അറേബ്യയുടെ വളരുന്ന സ്വാധീനം വ്യക്തമാക്കുന്നതാണ് ഈ നേട്ടമെന്ന് സൗദി പ്രസ് ഏജന്‍സി റിപ്പോര്‍ട്ട് ചെയ്തു.

70 രാജ്യങ്ങളില്‍ നിന്നുള്ള 1,700-ലധികം വിദ്യാര്‍ത്ഥികളോടാണ് സൗദി സംഘം മത്സരിച്ചത്. മികച്ച ഗവേഷണ നിലവാരം, പ്രായോഗിക വശങ്ങള്‍, പുത്തന്‍ ശാസ്ത്ര ശാഖകളിലെ പ്രസക്തി എന്നിവ മുന്‍നിര്‍ത്തി അന്താരാഷ്ട്ര ശാസ്ത്ര-അക്കാദമിക് സ്ഥാപനങ്ങളാണ് സൗദി വിദ്യാര്‍ത്ഥികളുടെ പ്രോജക്ടുകളെ പുരസ്‌കാരങ്ങള്‍ക്കായി തിരഞ്ഞെടുത്തത്. മത്സരത്തിന്റെ ഗ്രാന്‍ഡ് പ്രൈസ് വിജയികളെ പ്രഖ്യാപിക്കാനിരിക്കെയാണ് ഈ പ്രത്യേക പുരസ്‌കാരങ്ങള്‍ സൗദിയെ തേടിയെത്തിയത്.

'മാവ്ഹിബ' എന്ന പേരില്‍ അറിയപ്പെടുന്ന കിങ് അബ്ദുല്‍ അസീസ് ആന്‍ഡ് ഹിസ് കമ്പാനിയന്‍സ് ഫൗണ്ടേഷന്‍ ഫോര്‍ ഗിഫ്റ്റഡ്നെസ് ആന്‍ഡ് ക്രിയേറ്റിവിറ്റിയും സൗദി വിദ്യാഭ്യാസ മന്ത്രാലയവും സംയുക്തമായി 2007 മുതല്‍ എല്ലാ വര്‍ഷവും ഈ ആഗോള മേളയില്‍ പങ്കെടുക്കുന്നുണ്ട്.

ഈ വര്‍ഷം 40 വിദ്യാര്‍ത്ഥികളടങ്ങുന്ന പ്രതിനിധി സംഘമാണ് സൗദി അറേബ്യയെ പ്രതിനിധീകരിച്ചത്. ഇതില്‍ 23 പേര്‍ ഫീനിക്‌സില്‍ നേരിട്ടും 17 പേര്‍ റിയാദില്‍ നിന്ന് ഓണ്‍ലൈനായും പങ്കെടുത്തു. എഞ്ചിനീയറിംഗ്, മെഡിക്കല്‍ സയന്‍സസ്, ഊര്‍ജ്ജം, അഡ്വാന്‍സ്ഡ് ടെക്‌നോളജി തുടങ്ങിയ മേഖലകളിലെ ഗവേഷണ പ്രോജക്ടുകളാണ് വിദ്യാര്‍ത്ഥികള്‍ മേളയില്‍ അവതരിപ്പിച്ചത്.

മേളയോടനുബന്ധിച്ച്, പ്രതിഭകളായ വിദ്യാര്‍ത്ഥികളെ കണ്ടെത്തുന്നതിനും അവരെ അന്താരാഷ്ട്ര മത്സരങ്ങള്‍ക്കായി പ്രാപ്തരാക്കുന്നതിനും രാജ്യം സ്വീകരിക്കുന്ന തന്ത്രങ്ങളെക്കുറിച്ച് 'മാവ്ഹിബ' പ്രത്യേക സെമിനാറും സംഘടിപ്പിച്ചു. രാജ്യത്തെ ശാസ്ത്ര വ്യവസ്ഥിതിയെ ശക്തിപ്പെടുത്തുന്നതിന്റെ ഭാഗമായി സയന്‍സ് എക്‌സിബിഷനുകള്‍ സംഘടിപ്പിക്കുക, അന്താരാഷ്ട്ര മത്സരങ്ങള്‍ക്ക് വിദ്യാര്‍ത്ഥികളെ ഒരുക്കുക, ജീവനക്കാര്‍ക്ക് പരിശീലനം നല്‍കുക തുടങ്ങിയ കാര്യങ്ങള്‍ സെമിനാര്‍ ചര്‍ച്ച ചെയ്തു.

യുവജനങ്ങളില്‍ നിക്ഷേപം ഇറക്കാനും മുന്‍നിര അന്താരാഷ്ട്ര ശാസ്ത്ര വേദികളില്‍ മത്സരിക്കാന്‍ അവരെ പ്രാപ്തരാക്കാനുമുള്ള സൗദി അറേബ്യയുടെ പ്രതിബദ്ധതയുടെ പ്രതിഫലനമാണ് ഈ നേട്ടമെന്ന് യു.എസിലെയും കാനഡയിലെയും സൗദി കള്‍ച്ചറല്‍ അറ്റാഷെ ഡോ. തഹാനി അല്‍ബൈസ് പറഞ്ഞു. രാജ്യം മുന്‍ഗണന നല്‍കുന്ന ഊര്‍ജ്ജം, എഞ്ചിനീയറിംഗ്, മെഡിക്കല്‍ സയന്‍സ്, ഭാവി സാങ്കേതികവിദ്യകള്‍ തുടങ്ങിയ മേഖലകളിലാണ് വിദ്യാര്‍ത്ഥികള്‍ പ്രോജക്ടുകള്‍ തയ്യാറാക്കിയത്. ഇത് രാജ്യത്തിന്റെ മത്സരശേഷി വര്‍ദ്ധിപ്പിക്കുന്നതിനും സാമ്പത്തിക വൈവിധ്യവത്കരണ ലക്ഷ്യങ്ങളെ പിന്തുണയ്ക്കുന്നതിനും അത്യന്താപേക്ഷിതമാണെന്ന് അവര്‍ കൂട്ടിച്ചേര്‍ത്തു. ലോകത്തെ മികച്ച 30 സര്‍വ്വകലാശാലകളില്‍ പഠിക്കുന്ന 1,500-ലധികം സൗദി സ്‌കോളര്‍ഷിപ്പ് വിദ്യാര്‍ത്ഥികളെ യു.എസിലെ സൗദി അറേബ്യന്‍ കള്‍ച്ചറല്‍ മിഷന്‍ മേല്‍നോട്ടം വഹിക്കുന്നുണ്ടെന്നും, ഐസെഫില്‍ പങ്കെടുത്ത പല വിദ്യാര്‍ത്ഥികളും ഭാവിയില്‍ ഈ സ്ഥാപനങ്ങളുടെ ഭാഗമാകുമെന്നും അവര്‍ പ്രത്യാശ പ്രകടിപ്പിച്ചു.

വിദ്യാര്‍ത്ഥികളെ 'അഭിലാഷങ്ങളുടെ അംബാസഡര്‍മാര്‍' എന്ന് വിശേഷിപ്പിച്ച ഡോ. തഹാനി അല്‍ബൈസ്, ആഗോള ശാസ്ത്ര വേദികളില്‍ രാജ്യത്തിനായി കൂടുതല്‍ നേട്ടങ്ങള്‍ കൈവരിക്കാന്‍ പ്രതിനിധി സംഘത്തെ പ്രോത്സാഹിപ്പിച്ചു.

ഫോട്ടോ: ഡോ. തഹാനി അല്‍ബൈസ് വിദ്യാര്‍ഥികളുമായി സംവദിക്കുന്നു.