തിരുവനന്തപുരം: നിയുക്ത മുഖ്യമന്ത്രി വി.ഡി സതീശന് തന്റെ മന്ത്രിസഭയില് ഉള്പ്പെടുത്തേണ്ടവരുടെ പട്ടിക ലോക്ഭവനിലെത്തി ഗവര്ണര് രാജേന്ദ്ര അര്ലേക്കര്ക്ക് കൈമാറി. മന്ത്രിമാര് ആരെന്നത് സംബന്ധിച്ച് പ്രസ്താവന ഉണ്ടാകില്ല. നാളെ സത്യപ്രതിജ്ഞ ചെയ്യുന്നതിനായി ഗവര്ണര് വിളിക്കുമ്പോഴേ മന്ത്രിമാരുടെ പേരുകള് ഔദ്യോഗികമായി പുറത്തുവരൂ.
കോണ്ഗ്രസില്നിന്ന് 11 മന്ത്രിമാരുണ്ടാകും. മുസ്ലിം ലീഗിന് അഞ്ചും. കേരളകോണ്ഗ്രസ്, സി.എം.പി, ആര്.എസ്.പി എന്നിവര്ക്ക് ഓരോ സ്ഥാനങ്ങളുമുണ്ടാകും. വകുപ്പുകള് സംബന്ധിച്ചും വിവിധ പാര്ട്ടികളുമായി ധാരണയായിട്ടുണ്ടെങ്കിലും അത് സത്യപ്രതിജ്ഞക്ക് ശേഷം മുഖ്യമന്ത്രിയുടെ പത്രക്കുറിപ്പായി മാത്രമാകും പുറത്തുവരിക.
കോണ്ഗ്രസില്നിന്ന്് മുഖ്യമന്ത്രിക്ക് പുറമേ രമേശ് ചെന്നിത്തല (ആഭ്യന്തരം, വിജിലന്സ്), സണ്ണി ജോസഫ് (റവന്യൂ), എ.പി അനില്കുമാര് (ആരോഗ്യം), കെ. മുരളീധരന് (വൈദ്യുതി), പി.സി വിഷ്ണുനാഥ് (ടൂറിസം, സാംസ്കാരികം), ടി. സിദ്ദീഖ് (വനം), ബിന്ദുകൃഷ്ണ (വനിത, ശിശുക്ഷേമം), ഒ.ജെ. ജനീഷ് (യുവജനക്ഷേമം), എം. ലിജു (എക്സൈസ്) റോജി എം. ജോണ്,
കെ.എ തുളസി എന്നിവരായിരിക്കും മന്ത്രിമാരെന്നാണ് സൂചന.
മുസ്ലിം ലീഗില്നിന്ന് പി.കെ. കുഞ്ഞാലിക്കുട്ടി, പി.കെ. ബഷീര്, കെ.എം. ഷാജി, എന്. ഷംസുദ്ദീന്, വി.ഇ. അബ്ദുല് ഗഫൂര് എന്നിവരായിരിക്കും മന്ത്രിമാര്. കൂടാതെ സി.പി. ജോണ്, മോന്സ് ജോസഫ്, ഷിബുബേബി ജോണ്, അനൂപ് ജേക്കബ് എന്നിവരും മന്ത്രിമാരായേക്കും.
ഗവര്ണര്ക്ക് സമര്പ്പിച്ച പട്ടികയില് മന്ത്രിമാരുടെ പേരുകള് മാത്രമാണ് ഉള്ളതെന്നാണ് വിവരം. ഘടകകക്ഷികളുടെ വകുപ്പുകളുടെ കാര്യത്തിലാണ് അനിശ്ചിതത്വം. ജലവകുപ്പിനായി കേരള കോണ്ഗ്രസും ആര്എസ്പിയും ആവശ്യമുന്നയിച്ചിട്ടുണ്ട് . ഒടുവില് ലഭിക്കുന്ന വിവരമനുസരിച്ച് ജലവകുപ്പ് കേരള കോണ്ഗ്രസിനാണെന്നാണ് സൂചന.
ആര്എസ്പിക്ക് ജലസേചനവകുപ്പ് നല്കാമെന്ന് വെള്ളിയാഴ്ച കോണ്ഗ്രസ് നേതാക്കള് ഉറപ്പുനില്കിയിരുന്നു. എന്നാല് ശനിയാഴ്ച മറിച്ചൊരു നിലപാടാണ് കോണ്ഗ്രസ് നേതൃത്വം സ്വീകരിച്ചത്. വകുപ്പുകളുടെ കാര്യത്തില് പുനര്വിചിന്തനം വേണമെന്നാണ് ആര്സ്പിയെ കോണ്ഗ്രസ് നേതാക്കള് അറിയിച്ചിട്ടുള്ളത്. കേരള കോണ്ഗ്രസും ജലവകുപ്പിന് ആവശ്യമുന്നയിച്ചതോടെയാണ് ചര്ച്ച നീണ്ടുപോയത്.
കെപിസിസി ആസ്ഥാനത്ത് വകുപ്പുകള് സംബന്ധിച്ച ചര്ച്ചകള് തുടരുന്നതിനിടെയാണ് ഘടകകക്ഷികള് തങ്ങളുടെ നിലപാടറിയിച്ചത്. രണ്ട് മന്ത്രി സ്ഥാനം വേണമെന്നായിരുന്നു ആഗ്യഘട്ടത്തിലെ കേരള കോണ്ഗ്രസിന്റെ നിലപാട്. എന്നാല് ഇത് കോണ്ഗ്രസ് അംഗീകരിച്ചില്ല. കേരള കോണ്ഗ്രസിന് ഒരു മന്ത്രിസ്ഥാനം മാത്രമായിരിക്കും ലഭിക്കുകയെന്ന് പാര്ട്ടി നേതൃത്വത്തെ അറിയിച്ചു. അതോടെ തങ്ങള്ക്ക് ജലവകുപ്പ് തന്നെ വേണമെന്നും കൃഷി വകുപ്പ് വേണ്ടെന്നും കേരള കോണ്ഗ്രസ് നിലപാടെടുത്തത്. ചര്ച്ചകള്ക്കൊടുക്കം ജലവകുപ്പ് നല്കാന് ധാരണയായതായാണ് വിവരം. ഇതിന് പുറമേ ചീഫ് വിപ്പ് സ്ഥാനവും കേരള കോണ്ഗ്രസിന് ലഭിക്കും. മോന്സ് ജോസഫ് ജലവകുപ്പ് മന്ത്രിയും അപു ജോണ് ജോസഫ് ചീഫ് വിപ്പുമായേക്കും.
മന്ത്രിമാരുടെ ചര്ച്ചകള്ക്കൊപ്പം വകുപ്പുകള് സംബന്ധിച്ച ചര്ച്ചകള്കൂടിയാണ് കെ.പി.സി.സി. ആസ്ഥാനത്ത് തുടരുന്നത്. അനൂപ് ജേക്കബിനും മാണി സി. കാപ്പനും ടേം വ്യവസ്ഥയിലായിരിക്കും മന്ത്രിസ്ഥാനങ്ങള് നല്കുക. ഇതില് ഇരുവരും അതൃപ്തി അറിയിച്ചിട്ടുണ്ടെങ്കിലും തീരുമാനം മാറാനിടയില്ല. ലീഗ് മന്ത്രിമാരില് എ.കെ.എം. അഷ്റഫിനും വി.ഇ. അബ്ദുല് ഗഫൂറിനും ടേം വ്യവസ്ഥയില് മന്ത്രിസ്ഥാനങ്ങള് നല്കുമെന്ന സൂചനയുണ്ട്. ആഭ്യന്തരവും വിജിലന്സും മുതിര്ന്ന നേതാവ് രമേശ് ചെന്നിത്തലയ്ക്ക് ലഭിക്കുമെന്ന് ഉറപ്പായി. മുഖ്യമന്ത്രിയായ വി.ഡി. സതീശന് ധനം, തുറമുഖ വകുപ്പുകളാണ് കൈകാര്യം ചെയ്യുക.
Related News
