ലിസ്ബണ്: 2026 ഫുട്ബോള് ലോകകപ്പിനുള്ള പോര്ച്ചുഗല് ടീമിനെ പ്രഖ്യാപിച്ചു. 27 അംഗ സ്ക്വാഡിനെയാണ് പരിശീലകന് റൊബര്ട്ടോ മാര്ട്ടിനസ് പ്രഖ്യാപിച്ചത്. സൂപ്പര് താരം ക്രിസ്റ്റ്യാനോ റൊണാള്ഡോയ്ക്കൊപ്പം മുന്നിര ലീഗുകളിലെ ഒട്ടേറെ താരങ്ങളും ടീമില് ഇടംപിടിച്ചിട്ടുണ്ട്. ആറാം ലോകകപ്പിനാണ് ക്രിസ്റ്റ്യാനോ ബൂട്ടുകെട്ടുന്നത്.
ബ്രൂണോ ഫെര്ണാണ്ടസ്, ബെര്ണാഡോ സില്വ, റൂബന് നെവസ്, ഗോണ്സാലോ റാമോസ് തുടങ്ങി സൂപ്പര് താരങ്ങളെയെല്ലാം ഉള്ക്കൊള്ളിച്ചാണ് മാര്ട്ടിനസ് സ്ക്വാഡിനെ പ്രഖ്യാപിച്ചത്. അല്നസറില് ക്രിസ്റ്റ്യലനോയുടെ സഹതാരമായ ജാവോ ഫെലിക്സും ടീമിലുണ്ട്. മുന്നേറ്റ നിരയില് ഇവരെക്കൂടാതെ പെഡ്രോ നെറ്റോ, റാഫേല് ലിയോ എന്നിവരുമുണ്ട്. നെല്സണ് സെമെഡോ, ഡിയോഗോ ഡാലോ, റൂബന് ഡയസ്, ജാവോ കാന്സലോ, ന്യൂനോ മെന്ഡിസ് തുടങ്ങിയ പേരുകേട്ട പ്രതിരോധനിരയുമായാണ് പോര്ച്ചുഗീസ് സംഘം ലോകകപ്പിനെത്തുന്നത്. ഡിയോഗോ കോസ്റ്റ, റൂയി സില്വ എന്നിവര് ഗോള്കീപ്പര്മാരുടെ നിരയിലുണ്ട്. മുതിര്ന്ന താരങ്ങളടങ്ങിയ മധ്യനിരും കരുത്തുറ്റതാണ്.
നായകന് ക്രിസ്റ്റ്യാനോ റൊണാള്ഡോ തന്നെയാണ് ടീമിന്റെ കുന്തമുന. ലോകകപ്പോടെ കരിയറിന് വിരാമമിടാമെന്ന പ്രതീക്ഷയുമായാണ് റോണോ ലോകകപ്പിനെത്തുന്നത്. യൂറോ കപ്പും യുവേഫ നാഷന്സ് ലീഗ് കിരീടവും നേടിയിട്ടുണ്ടെങ്കിലും പോര്ച്ചുഗലിന് ഇതുവരെ ലോകകിരീടം നേടാനായിട്ടില്ല. ലോകകപ്പില് ഗ്രൂപ്പ് കെയിലാണ് പോര്ച്ചുഗല്. കോംഗോ, ഉസ്ബക്കിസ്ഥാന്, കൊളംബിയ ടീമുകളാണ് ഗ്രൂപ്പിലെ മറ്റ് ടീമുകള്. ജൂണ് 17 ന് കോംഗോയ്ക്കെതിരേയാണ് ആദ്യ മത്സരം.
Related News
