ജിദ്ദ: മലബാര് അടുക്കളയും ജിദ്ദയിലെ പ്രമുഖ ആരോഗ്യ സംരക്ഷണ കേന്ദ്രമായ അല് റയാന് പോളിക്ലിനിക്കും സംയുക്തമായി മാതൃദിനാഘോഷവും സൗജന്യ മെഡിക്കല് ക്യാമ്പും സംഘടിപ്പിച്ചു. പ്രവാസി മലയാളി അമ്മമാരുടെ സജീവ സാന്നിധ്യം കൊണ്ട് ശ്രദ്ധേയമായ ചടങ്ങിന്റെ ഔദ്യോഗിക ഉദ്ഘാടനം അല് റയാന് എക്സിക്യൂട്ടീവ് ഡയറക്ടര് ഡോ. മുഷ്താഖ് നിര്വ്വഹിച്ചു. മലബാര് അടുക്കളയുടെ മോഡറേറ്ററും ജിദ്ദ കോര്ഡിനേറ്ററുമായ പ്രശസ്ത ഷെഫ് കുബ്രാ ലത്തീഫ് ചടങ്ങില് സ്വാഗതം ആശംസിക്കുകയും പരിപാടികള് നിയന്ത്രിക്കുകയും ചെയ്തു.
ചടങ്ങിനോടനുബന്ധിച്ച് ഡോ. വിനിത പിള്ള നയിച്ച പ്രത്യേക ആരോഗ്യ ബോധവല്ക്കരണ ക്ലാസ് ഏറെ ജനശ്രദ്ധയാകര്ഷിച്ചു. അമ്മമാരുടെ ആരോഗ്യം എത്രത്തോളം പ്രധാനമാണെന്ന് ലളിതമായ വാക്കുകളിലൂടെ അവര് സദസ്സിന് പകര്ന്നുനല്കി. ഒരു നല്ല അധ്യാപികയെപ്പോലെയും സ്നേഹനിധിയായ സുഹൃത്തിനെപ്പോലെയും രോഗവിവരങ്ങളും സംശയങ്ങളും കേട്ടറിഞ്ഞ് അവര് നല്കിയ നിര്ദ്ദേശങ്ങള് പങ്കെടുത്തവര്ക്ക് വലിയൊരു കൈത്താങ്ങായി മാറി.
പരിപാടിയുടെ വിജയത്തിനായി അല് റയാന് പോളിക്ലിനിക്കിലെ എച്ച്.ആര് വിഭാഗത്തിലെ വിത്തു രാജ്, ലാബ് ടെക്നീഷ്യന് ആര്ദ്ര സൂരജ്, സ്റ്റാഫ് നഴ്സ് മുംതാസ് ബീഗം ഉണ്ണിയക എന്നിവര് പരിപാടികള് നിയന്ത്രിച്ചു. അതോടൊപ്പം മലബാര് അടുക്കള എക്സിക്യൂട്ടീവുകളായ ഷംസീറ, സാഹിറ, സബ്രീന, ഹസീന, സുരുമി, സുനീറ എന്നിവര് പരിപാടിയുടെ വിവിധ പ്രവര്ത്തനങ്ങള്ക്ക് നേതൃത്വം നല്കി.
മാതൃദിനത്തിന്റെ മഹത്വം ആരോഗ്യ ബോധവല്ക്കരണവുമായി ചേര്ത്ത് പ്രവാസി സമൂഹത്തിന് ഒരു മനോഹരമായ സന്ദേശം പകര്ന്ന ഈ പരിപാടി പങ്കെടുത്ത എല്ലാവര്ക്കും ഹൃദയസ്പര്ശിയായ അനുഭവമായി മാറി.
Related News
