ദുബായ്: തങ്ങളുടെ രാജ്യങ്ങള്ക്ക് നേരെയുണ്ടായ ഇറാന് ആക്രമണത്തെ ശക്തമായി അപലപിച്ച് ബഹ്റൈനും കുവൈത്തും. ഇറാന് വിക്ഷേപിച്ച ഏഴ് മിസൈലുകള് തങ്ങള് പ്രതിരോധിച്ചതായും, ഈ ആക്രമണം പരമാധികാരത്തിന് നേരെയുള്ള കടന്നുകയറ്റമാണെന്നും ഇരുരാജ്യങ്ങളും വ്യക്തമാക്കി.
ബഹ്റൈന്, കുവൈത്ത് എന്നീ രാജ്യങ്ങള്ക്ക് നേരെ ഇറാന് നടത്തിയ ആക്രമണം അങ്ങേയറ്റം അപലപനീയമാണെന്ന് ബഹ്റൈന് വിദേശകാര്യ മന്ത്രാലയം പ്രസ്താവനയില് പറഞ്ഞു. മിസൈലുകള് കൊണ്ടോ ഖനികള് സ്ഥാപിച്ചുകൊണ്ടോ സുരക്ഷയോ സ്ഥിരതയോ കൈവരിക്കാന് കഴിയില്ലെന്ന് മന്ത്രാലയം ഓര്മ്മിപ്പിച്ചു. ഇത്തരം ആക്രമണങ്ങള് ഉടന് നിര്ത്തിവെക്കണമെന്നും അവര് ഇറാനോട് ആവശ്യപ്പെട്ടു. പൗരന്മാരുടെയും താമസക്കാരുടെയും ജീവന് നേരെയുള്ള നേരിട്ടുള്ള ഭീഷണിയാണ് ഈ ആക്രമണമെന്ന് കുവൈത്തും വ്യക്തമാക്കി.
കുവൈത്തിലെ അലി അല് സലിം വ്യോമതാവളം, ബഹ്റൈനിലെ യുഎസ് നാവികസേനയുടെ അഞ്ചാം ഫ്ലീറ്റ് എന്നിവയാണ് തങ്ങള് ലക്ഷ്യമിട്ടതെന്ന് ഇറാനിയന് റെവല്യൂഷണറി ഗാര്ഡ് വ്യക്തമാക്കിയതായി ഇറാന്റെ ഔദ്യോഗിക വാര്ത്താ ഏജന്സിയായ ഐആര്എന്എ റിപ്പോര്ട്ട് ചെയ്തു.
അതേസമയം, വെള്ളിയാഴ്ച ഹോര്മുസ് കടലിടുക്കിന് നേരെ ഇറാന് വിക്ഷേപിച്ച ബാലിസ്റ്റിക് മിസൈലുകളും ഡ്രോണുകളും തങ്ങള് വെടിവെച്ചിട്ടതായി യുഎസ് സൈനിക നേതൃത്വം (യുഎസ് സെന്ട്രല് കമാന്ഡ്) അറിയിച്ചു. തിരിച്ചടിയെന്നോണം ഇറാന്റെ തീരദേശ നിരീക്ഷണ റഡാര് കേന്ദ്രങ്ങള്ക്ക് നേരെ യുഎസ് ആക്രമണം നടത്തി. ഏഴ് ബാലിസ്റ്റിക് മിസൈലുകള് ഇറാന് വിക്ഷേപിച്ചതില് ആറെണ്ണം തങ്ങള് തകര്ത്തെന്നും ഏഴാമത്തേത് ലക്ഷ്യത്തിലെത്തിയില്ലെന്നും യുഎസ് അറിയിച്ചു. യുഎസ് സൈനികര്ക്ക് ആര്ക്കും പരിക്കേറ്റിട്ടില്ല.
ഹോര്മുസ് കടലിടുക്കിലെ ഗതാഗതത്തിന് ഭീഷണിയായതിനെ തുടര്ന്ന് നാല് ഇറാനിയന് ഡ്രോണുകളും വെള്ളിയാഴ്ച നേരത്തെ യുഎസ് സൈന്യം വെടിവെച്ചിട്ടിരുന്നു. ആഗോള ഇന്ധന നീക്കത്തിന് നിര്ണ്ണായകമായ ഈ പാതയില് ഇറാന്റെ ഇടപെടലുകള് വര്ദ്ധിച്ചതിനെത്തുടര്ന്ന് യുഎസ് സൈന്യം ഇറാനിയന് തുറമുഖങ്ങളില് ഉപരോധം ഏര്പ്പെടുത്തിയിരിക്കുകയാണ്. ഇന്ധനവില കുതിച്ചുയരുന്നത് യുഎസ് ഭരണകൂടത്തിന് വലിയ രാഷ്ട്രീയ പ്രതിസന്ധികള് സൃഷ്ടിക്കുന്നുണ്ട്. ഇറാനുമായുള്ള സംഘര്ഷം അവസാനിപ്പിക്കാന് അമേരിക്ക സമ്മര്ദ്ദം ശക്തമാക്കുന്നതിനിടെയാണ് മേഖലയില് വീണ്ടും സംഘര്ഷം രൂക്ഷമായിരിക്കുന്നത്.
Related News
