ദമ്മാം: മഹാത്മാഗാന്ധി സര്വകലാശാലയുടെ ബി.എസ്.സി ബയോ ഇന്ഫര്മാറ്റിക്സ് പരീക്ഷയില് മൂന്നാം റാങ്ക് നേടി ദമ്മാമിലെ ഇന്റര്നാഷണല് ഇന്ത്യന് സ്കൂളിലെ മുന് വിദ്യാര്ത്ഥിനിയായ തന്സീറാ സിദ്ധിഖ് ശ്രദ്ധേയമായ നേട്ടം കൈവരിച്ചു. ദമ്മാമിലെ അറിയപ്പെടുന്ന കരകൗശല നിര്മാണ വിദഗ്ധനായ സിദ്ദീഖ് ആലുവയുടെയും നസീമയുടെയും മകളായ തന്സീറാ, തന്റെ അക്കാദമിക മികവിലൂടെ കുടുംബത്തിനും അധ്യാപകര്ക്കും സുഹൃത്തുക്കള്ക്കും അഭിമാനമായി മാറിയിരിക്കുകയാണ്.
ഏഴാം ക്ലാസ് വരെ ദമ്മാമിലെ ഇന്റര്നാഷണല് ഇന്ത്യന് സ്കൂളിലും കുറച്ചുകാലം അല്-മുന സ്കൂളിലും വിദ്യാഭ്യാസം തുടര്ന്ന തന്സീറാ, ബാല്യകാലം മുതല് തന്നെ പഠനത്തിലും , ചിത്ര രചന , കരകൗശല നിര്മ്മാണം എന്നിവയില് മികവ് പുലര്ത്തിയിരുന്നതായി ദമ്മാം സലാമത്ത് കോര്ണര് റെസിഡന്സ് കൂട്ടായ്മയുടെ കണ്വീനര് അഷ്റഫ് വടകര പറഞ്ഞു. തന്സീറയുടെ ഈ നേട്ടം പ്രവാസി സമൂഹത്തിന് അഭിമാനകരമാണ്.
മഹാത്മാഗാന്ധി സര്വകലാശാലയുടെ ബയോ ഇന്ഫര്മാറ്റിക്സ് ബിരുദ പരീക്ഷയില് മൂന്നാം റാങ്ക് നേടിക്കൊണ്ട് തന്സീറാ തന്റെ കഴിവും അര്പ്പണബോധവും ഒരിക്കല് കൂടി തെളിയിച്ചിരിക്കുകയാണ്. വിവിധ മേഖലകളില് നിന്നുള്ള നിരവധി പേര് തന്സീറയ്ക്കും കുടുംബത്തിനും അഭിനന്ദനങ്ങള് അറിയിച്ചു. ഈ നേട്ടം ഭാവിയില് ശാസ്ത്ര-സാങ്കേതിക രംഗങ്ങളില് കൂടുതല് ഉയരങ്ങള് കീഴടക്കാനുള്ള പ്രചോദനമാകട്ടെയെന്ന് അധ്യാപകരും സുഹൃത്തുക്കളും ആശംസിച്ചു.
Related News
