ജിദ്ദ: കുറച്ചുകാലമായി നിലച്ചുപോയ ജിദ്ദയിലെ പ്രാദേശിക ഫുട്ബോള്‍ മത്സരങ്ങള്‍ നവജീവന്‍ വീണ്ടെടുക്കുന്നു. നിലച്ചുപോയ കളിയാരവങ്ങള്‍ക്ക് വീണ്ടും തുടക്കമിട്ട് നിസ്സ് അറേബ്യ എന്ന പുതിയ ഇവന്റ്സ് കമ്പനിയാണ് ലോകകപ്പ് മത്സരങ്ങളോടനുബന്ധിച്ച് ആറു ടീമുകളുമായി നയന്‍സ് ടൂര്‍ണമെന്റ് സംഘടിപ്പിക്കുന്നത്.

എന്‍-കംഫര്‍ട്ട് ധമാക്ക വേള്‍ഡ് കപ്പ് എന്ന പേരില്‍ ജൂണ്‍ 18, 19 തീയതികളിലാണ് ജിദ്ദയിലെ ഒളിമ്പിക് വില്ലേജ് സ്റ്റേഡിയത്തില്‍ മത്സരം നടത്തുകയെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. ഫിക്സ്ചര്‍ റിലീസും ട്രോഫി അനാച്ഛാദനവും ഇന്നലെ ശറഫിയയില്‍ നടന്നു.

സൗദി സ്പോര്‍ട്‌സ് അതോറിറ്റിയുടെ ഔദ്യോഗിക അംഗീകാരത്തോടെയും നിയമാനുസൃത നടപടിക്രമങ്ങള്‍ പൂര്‍ത്തിയാക്കിയുമാണ് ടൂര്‍ണമെന്റ് സംഘടിപ്പിക്കുന്നതെന്ന് ഭാരവാഹികള്‍ അറിയിച്ചു. ബ്ലാക്ക് റൈഡ് എഫ്.സി, അറബ് ഡ്രീംസ് എഫ്.സി, ചാംസ് എഫ്.സി, ബാന്‍ ബേക്കറി എഫ്.സി, സെവന്‍ സ്റ്റാര്‍ എഫ്.സി, 'റീം അല്‍ ഉല എഫ്.സി എന്നീ ടീമുകളാണ് മത്സരിക്കുക. ആറ് ടീമുകള്‍ തമ്മില്‍ ലീഗ് അടിസ്ഥാനത്തില്‍ നയന്‍സ് രൂപത്തില്‍ ആണ് മത്സരങ്ങള്‍ നടക്കുക. ഓരോ ടീമിനും രണ്ട് മത്സരങ്ങള്‍ വീതം ലഭിക്കുന്ന രീതിയിലാണ് ഫിക്‌സ്ചര്‍ ക്രമീകരിച്ചിരിക്കുന്നത്.

ജൂണ്‍ 18-ന് രാത്രി 9.30 മുതല്‍ പുലര്‍ച്ചെ 2.00 വരെ നാല് ലീഗ് മത്സരങ്ങളും, ജൂണ്‍ 19-ന് രാത്രി 8.00 മുതല്‍ രണ്ട് ലീഗ് മത്സരങ്ങളും നടക്കും. ഓരോ മത്സരവും 25 മിനിറ്റ് വീതമുള്ള രണ്ട് ഹാഫുകളും അഞ്ച് മിനിറ്റ് ഇടവേളയും ഉള്‍പ്പെടുന്നതായിരിക്കും. രണ്ടാം ദിവസത്തെ രണ്ട് ലീഗ് മത്സരങ്ങള്‍ പൂര്‍ത്തിയായ ശേഷം ഇന്ത്യന്‍ കമ്മ്യൂണിറ്റിയിലെ 17 വയസ്സിനു താഴെയുള്ള കുട്ടികള്‍ക്കായി പ്രത്യേക സൗഹൃദ ഫുട്്ബോള്‍ മത്സരവും സംഘടിപ്പിക്കും. സിഫിലെ ഫൈനലിസ്റ്റുകളായ ടാലന്റ് ടിന്‍സും ഇന്ത്യന്‍ ഇന്റര്‍നാഷണല്‍ സ്‌കൂള്‍ ടീമും തമ്മിലാണ് മത്സരം. സൗദി കായിക മന്ത്രാലയത്തിനു കീഴിലുള്ള ലൈസന്‍സ് ഉള്ള അമ്പയര്‍മാരായിരിക്കും കുട്ടികളുടേതുള്‍പ്പെടെയുള്ള മത്സരങ്ങള്‍ നിയന്ത്രിക്കുക. ടൂര്‍ണമെന്റിന്റെ സുഗമമായ നടത്തിപ്പിന് ഫുട്്ബോള്‍ രംഗത്തെ പരിചയ സമ്പന്നരായ 30 അംഗങ്ങളെ ഉള്‍പ്പെടുത്തി വിപുലമായ പ്രവര്‍ത്തക സമിതി രൂപീകരിച്ചിട്ടുണ്ട്.

നൗഷാദ് ചെത്തല്ലൂര്‍ സ്വാഗതം പറഞ്ഞ പരിപാടിയില്‍ നാണി മാസ്റ്റര്‍, ഷിബു തിരുവനന്തപുരം, ഹക്കീം പാറക്കല്‍, ഹിഫ്സു റഹ്‌മാന്‍, ജലീല്‍ കണ്ണമംഗലം, കബീര്‍ കൊണ്ടോട്ടി, മുസാഫിര്‍, അബു കട്ടുപ്പാറ, മന്‍സൂര്‍ (റീം എഫ്സി,യാമ്പു ) തുടങ്ങിയവര്‍ സംസാരിച്ചു. നാസര്‍ ശാന്തപുരം നന്ദി പറഞ്ഞു. സ്‌നേഹ സാം കൂത്തൂര്‍ അവതാരകയായിരുന്നു. നൗഷാദ് പാലക്കല്‍, ഇസ്ഹാഖ് പരപ്പനങ്ങാടി,, ജംഷി, സഫീര്‍, ഷഫീക് പട്ടാമ്പി, ഉവൈസ്, അദ്‌നു ഷബീര്‍, ഇസ്ഹാഖ് കോട്ടപ്പുറം, റാഫി പറവൂര്‍, ആഷിഖ്, ഡോ. ഇന്ദു ചന്ദ്രശേഖര്‍, റംല, ഷമീം ടീച്ചര്‍, എന്നിവരാണ് പരിപാടികള്‍ നിയന്ത്രിച്ചത്.

ചടങ്ങിനോടനുബന്ധിച്ചു നടന്ന പത്രസമ്മേളനത്തില്‍ വി പി മുഹമ്മദ് അലി, മുഹ്സിന്‍ എന്‍ കംഫര്‍ട്, മുജീബ് റീഗള്‍, നാസര്‍ എമറാള്‍ഡ്, ഡോ. ഇന്ദു ചന്ദ്രശേഖര്‍, നൗഷാദ് ചാത്തല്ലൂര്‍, റാഫി ബീമാപള്ളി, അയൂബ് മാസ്റ്റര്‍, നാസര്‍ ശാന്തപുരം, ഷമീം ടീച്ചര്‍ എന്നിവര്‍ പങ്കെടുത്തു.