ജിദ്ദ: പ്രവാസി സമൂഹത്തിന്റെ വായനാസംസ്കാരത്തെക്കുറിച്ചും അവര് അഭിമുഖീകരിക്കുന്ന സമകാലിക വെല്ലുവിളികളെക്കുറിച്ചും ചര്ച്ച ചെയ്ത്, കലാലയം സാംസ്കാരിക വേദി ജിദ്ദ സിറ്റിയുടെ നേതൃത്വത്തില് വിചാരസദസ്സ് സംഘടിപ്പിച്ചു. 'പ്രവാസി രിസാല' മാസികയുടെ 'അതിജീവനത്തിന്റെ അക്ഷര ഭൂപടം' ക്യാമ്പയിനിന്റെ ഭാഗമായി നടന്ന പരിപാടി, വിവിധ സാംസ്കാരിക-സാമൂഹിക മേഖലകളിലെ പ്രമുഖരുടെ സാന്നിധ്യം കൊണ്ട് ശ്രദ്ധേയമായി.
ആര്.എസ്.സി ജിദ്ദ സിറ്റി ചെയര്മാന് ഖാജ സഖാഫി അധ്യക്ഷത വഹിച്ച ചടങ്ങ്, ആര്.എസ്.സി സൗദി വെസ്റ്റ് നാഷനല് എക്സിക്യൂട്ടീവ് അംഗം ഡോ. ഇജാസ് അഹ്മദ് ഉദ്ഘാടനം ചെയ്തു. പ്രവാസികള്ക്കിടയില് വായനയും ചിന്തയും വളര്ത്തുന്നതില് 'രിസാല' മാസിക വഹിക്കുന്ന പങ്ക് ചര്ച്ചയില് വിലയിരുത്തി. പ്രവാസികളുടെ ജീവിതാനുഭവങ്ങള്, പ്രശ്നങ്ങള്, പുതിയ സാധ്യതകള് എന്നിവ വായനക്കാരിലേക്ക് എത്തിക്കുന്നതില് രിസാല നിര്വഹിക്കുന്ന സാംസ്കാരിക ദൗത്യത്തെക്കുറിച്ചും, സമൂഹത്തിലെ ബൗദ്ധിക ഇടപെടലുകള് ശക്തിപ്പെടുത്തുന്നതിന് ഇത്തരം ക്യാമ്പയിനുകള് കൂടുതല് വ്യാപിപ്പിക്കേണ്ടതിന്റെ ആവശ്യകതയെക്കുറിച്ചും ചര്ച്ചയില് പങ്കെടുത്തവര് അഭിപ്രായപ്പെട്ടു.
ആര്.എസ്.സി സൗദി വെസ്റ്റ് നാഷനല് മീഡിയ സെക്രട്ടറി സുഹൈല് വേങ്ങര ക്യാമ്പയിന് പ്രമേയം അവതരിപ്പിച്ചു. കലാലയം സെക്രട്ടറി സദകത്തുള്ള ചര്ച്ചകള്ക്ക് നേതൃത്വം നല്കി. ഒ.ഐ.സി.സി പ്രതിനിധി ആസാദ് പോരൂര്, നവോദയ പ്രതിനിധി ഫൈസല് കോടശ്ശേരി, ഐ.സി.എഫ് പ്രതിനിധി സാദിഖ് ചാലിയാര് എന്നിവര് ആശംസകള് നേര്ന്നു സംസാരിച്ചു. ആര്.എസ്.സി ജിദ്ദ സിറ്റി സോണ് സെക്രട്ടറി സല്മാനുല് ഫാരിസി സ്വാഗതവും ഇര്ഫാദ് വിളത്തൂര് നന്ദിയും പറഞ്ഞു.
Related News
