റിയാദ്: സൗദി അറേബ്യയില്‍ ഗാര്‍ഹിക തൊഴിലാളികളുടെയും സമാന വിഭാഗത്തില്‍പ്പെട്ടവരുടെയും ഇഖാമ (താമസരേഖ) മൂന്ന് മാസം കൂടുമ്പോള്‍ ഇഷ്യൂ ചെയ്യാനും പുതുക്കാനും അനുവദിക്കാന്‍ കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരന്റെ അധ്യക്ഷതയില്‍ ചേര്‍ന്ന മന്ത്രിസഭായോഗം തീരുമാനിച്ചു.

മന്ത്രിസഭായോഗത്തില്‍ മറ്റ് സുപ്രധാന തീരുമാനങ്ങളും കൈക്കൊണ്ടു. വിനോദ പ്രവര്‍ത്തനങ്ങള്‍, കള്ളപ്പണം വെളുപ്പിക്കല്‍, ഭീകരവാദ ഫണ്ടിംഗ് എന്നിവയുമായി ബന്ധപ്പെട്ട കേസുകളിലെ സ്വത്തുക്കള്‍ കൈകാര്യം ചെയ്യുന്നതുമായി ബന്ധപ്പെട്ട രണ്ട് നിയമങ്ങള്‍ മന്ത്രിസഭ അംഗീകരിച്ചു. രാജ്യത്തിന്റെ ഭീകരവാദ വിരുദ്ധ ഫണ്ടിംഗ് നിയമത്തിലും അതിന്റെ എക്‌സിക്യൂട്ടീവ് റെഗുലേഷനുകളിലും ഭേദഗതികള്‍ വരുത്തിയിട്ടുണ്ട്.

ഇന്‍ഷുറന്‍സ് തര്‍ക്കങ്ങളും ലംഘനങ്ങളും തീര്‍പ്പാക്കുന്നതിനായി റിയാദില്‍ രണ്ട് പുതിയ ഫസ്റ്റ്-ഇന്‍സ്റ്റന്‍സ് കമ്മിറ്റികള്‍ കൂടി സ്ഥാപിക്കാന്‍ തീരുമാനിച്ചു. സൗദി വ്യവസായ-ധാതുവിഭവ മന്ത്രാലയവും കാനഡയുടെ നാച്ചുറല്‍ റിസോഴ്സസ് (NRCan) തമ്മില്‍ ഖനന മേഖലയിലെ സഹകരണത്തിനായി ധാരണാപത്രം അംഗീകരിച്ചു. കൂടാതെ, റിയാദ് ഡിസൈന്‍ ലോ ട്രീറ്റി (RDLT) അംഗീകരിച്ചു. ഫാമിലി അഫയേഴ്സ് കൗണ്‍സിലിലേക്ക് ഒരു അംഗത്തിന്റെ കാലാവധി നീട്ടുകയും മൂന്ന് പുതിയ അംഗങ്ങളെ നിയമിക്കുകയും ചെയ്തു.

2026-ലെ ആര്‍ട്ടിക്കിള്‍ IV കണ്‍സള്‍ട്ടേഷനുകള്‍ക്ക് ശേഷം അന്താരാഷ്ട്ര നാണയനിധി വിദഗ്ധര്‍ പുറത്തിറക്കിയ പ്രസ്താവനയെ മന്ത്രിസഭ സ്വാഗതം ചെയ്തു. സൗദി വിഷന്‍ 2030-ന്റെ ഭാഗമായുള്ള പരിഷ്‌കാരങ്ങളും ശക്തമായ സാമ്പത്തിക അടിത്തറയും രാജ്യത്തിന്റെ സാമ്പത്തിക രംഗത്തെ കൂടുതല്‍ കരുത്തുറ്റതാക്കുന്നുവെന്ന് IMF വിലയിരുത്തുന്നു.

2025-ല്‍ നാഷണല്‍ ട്രാന്‍സ്‌ഫോര്‍മേഷന്‍ പ്രോഗ്രാം കൈവരിച്ച നേട്ടങ്ങളെ മന്ത്രിസഭ അഭിനന്ദിച്ചു. പരിസ്ഥിതി സംരക്ഷണം, ഭക്ഷ്യ-ജല സുരക്ഷ, സാമൂഹിക വികസനം, തൊഴില്‍ പങ്കാളിത്തം എന്നിവയില്‍ ശ്രദ്ധ കേന്ദ്രീകരിച്ചുകൊണ്ട് പ്രോഗ്രാമിലെ 71 ശതമാനം സംരംഭങ്ങളും ഇതിനകം പൂര്‍ത്തിയായിട്ടുണ്ടെന്നും യോഗം വിലയിരുത്തി.

കൂടാതെ, വിദ്യാഭ്യാസം, പരിശീലനം, സൗദി പ്രതിഭകളുടെ മത്സരക്ഷമത വര്‍ദ്ധിപ്പിക്കല്‍, നവീകരണങ്ങള്‍ പ്രോത്സാഹിപ്പിക്കല്‍, ആധുനിക സാങ്കേതികവിദ്യകളുടെ ഉപയോഗം, ദേശീയ സ്വത്വവും സാംസ്‌കാരിക സാന്നിധ്യവും ശക്തിപ്പെടുത്തല്‍ എന്നിവയില്‍ ഹ്യൂമന്‍ ക്യാപ്പബിലിറ്റി ഡെവലപ്മെന്റ് പ്രോഗ്രാം കൈവരിച്ച നേട്ടങ്ങളെയും മന്ത്രിസഭ എടുത്തുപറഞ്ഞു.