ലണ്ടന്‍: ബെഡ്ഫോര്‍ഡില്‍ രണ്ട് ട്രെയിനുകള്‍ കൂട്ടിയിടിച്ചുണ്ടായ അപകടത്തില്‍ ഒരാള്‍ മരിച്ചു. നിരവധി പേര്‍ക്ക് പരിക്കേറ്റതായാണ് റിപ്പോര്‍ട്ട്. വെള്ളിയാഴ്ച വൈകുന്നേരം 5.15-ഓടെയാണ് അപകടം നടന്നത്. സംഭവത്തെത്തുടര്‍ന്ന് അധികൃതര്‍ 'മേജര്‍ ഇന്‍സിഡന്റ്' അഥവാ അടിയന്തരാവസ്ഥ പ്രഖ്യാപിച്ചു.

ഈസ്റ്റ് മിഡ്ലാന്‍ഡ്‌സ് റെയില്‍വേയുടെ രണ്ട് ട്രെയിനുകളാണ് കൂട്ടിയിടിച്ചത്. 16:40-ന് കോര്‍ബിയില്‍ നിന്ന് ലണ്ടന്‍ സെന്റ് പാന്‍ക്രാസിലേക്കുള്ള ട്രെയിനും, 15:50-ന് നോട്ടിംഗ്ഹാമില്‍ നിന്ന് ലണ്ടന്‍ സെന്റ് പാന്‍ക്രാസിലേക്കുള്ള ട്രെയിനുമാണ് അപകടത്തില്‍പ്പെട്ടതെന്ന് റെയില്‍വേ അധികൃതര്‍ സ്ഥിരീകരിച്ചു.

ബ്രിട്ടീഷ് ട്രാന്‍സ്പോര്‍ട്ട് പോലീസ്, ബെഡ്ഫോര്‍ഡ്ഷയര്‍ പോലീസ്, ഫയര്‍ ആന്‍ഡ് റെസ്‌ക്യൂ, ആംബുലന്‍സ് സര്‍വീസുകള്‍ എന്നിവര്‍ സംയുക്തമായി സ്ഥലത്ത് രക്ഷാപ്രവര്‍ത്തനം തുടരുകയാണ്. അപകടത്തില്‍പ്പെട്ട യാത്രക്കാരെ സുരക്ഷിതമായി മാറ്റുന്നതിനായി പ്രത്യേക ബസുകള്‍ അപകടസ്ഥലത്ത് എത്തിച്ചിട്ടുണ്ട്.

അപകടത്തില്‍ പരിക്കേറ്റവരെ ബെഡ്ഫോര്‍ഡ് ഹോസ്പിറ്റലിലും ലൂട്ടണ്‍ & ഡണ്‍സ്റ്റബിള്‍ യൂണിവേഴ്സിറ്റി ഹോസ്പിറ്റലിലുമാണ് പ്രവേശിപ്പിച്ചിരിക്കുന്നത്. അടിയന്തര സാഹചര്യത്തില്‍ അല്ലാതെ ആശുപത്രികളിലെ എമര്‍ജന്‍സി വിഭാഗത്തിലേക്ക് പൊതുജനങ്ങള്‍ എത്തരുതെന്ന് ആശുപത്രി അധികൃതര്‍ നിര്‍ദ്ദേശിച്ചു.

സംഭവം അതീവ ഗൗരവകരമാണെന്നും, എന്താണ് സംഭവിച്ചതെന്ന് കണ്ടെത്താനുള്ള ശ്രമങ്ങള്‍ ദ്രുതഗതിയില്‍ നടക്കുകയാണെന്നും ബ്രിട്ടീഷ് ട്രാന്‍സ്പോര്‍ട്ട് പോലീസ് ഡെപ്യൂട്ടി ചീഫ് കോണ്‍സ്റ്റബിള്‍ സ്റ്റുവര്‍ട്ട് കണ്ടി അറിയിച്ചു. അപകടത്തില്‍പ്പെട്ടവരുടെ വിവരങ്ങള്‍ അറിയാന്‍ സാധിക്കാത്ത ബന്ധുക്കള്‍ക്ക് സഹായം നല്‍കാന്‍ പോലീസ് പ്രത്യേക സംവിധാനം ഒരുക്കിയിട്ടുണ്ട്.