മട്ടന്നൂര്‍: കണ്ണൂര്‍ അന്താരാഷ്ട്ര വിമാനത്താവളത്തിന് സമീപം ഉംറ തീര്‍ത്ഥാടകര്‍ സഞ്ചരിച്ച ടൂറിസ്റ്റ് ബസ് കത്തിയമര്‍ന്നപ്പോള്‍, രക്ഷകരായത് ലോകകപ്പ് ഫുട്‌ബോള്‍ മത്സരം ആസ്വദിച്ചിരുന്ന ഒരു സംഘം യുവാക്കള്‍. പുലര്‍ച്ചെ ശിവപുരത്തുണ്ടായ തീപിടുത്തത്തില്‍ ബസിലുണ്ടായിരുന്ന 42 തീര്‍ത്ഥാടകരും അത്ഭുതകരമായാണ് രക്ഷപ്പെട്ടത്.

വയനാട്ടില്‍ നിന്ന് തിങ്കളാഴ്ച രാത്രി പുറപ്പെട്ട ബസ് മട്ടന്നൂരിനടുത്തുള്ള ശിവപുരത്തെത്തിയപ്പോള്‍ ബസിന്റെ പിന്‍ഭാഗത്തുനിന്ന് തീ പടരുന്നത് ശ്രദ്ധയില്‍പ്പെട്ട ഡ്രൈവര്‍ ഉടന്‍ തന്നെ വണ്ടി നിര്‍ത്തി. യാത്രക്കാരെ വേഗത്തില്‍ പുറത്തിറക്കാന്‍ ഡ്രൈവര്‍ ശ്രമിക്കുന്നതിനിടെ, സമീപത്ത് ഫുട്‌ബോള്‍ മത്സരം കണ്ടുകൊണ്ടിരുന്ന യുവാക്കള്‍ ഈ കാഴ്ച കണ്ട് ഓടിയെത്തുകയായിരുന്നു.

ഒരു നിമിഷം പോലും വൈകാതെ രക്ഷാപ്രവര്‍ത്തനത്തില്‍ പങ്കാളികളായ ഇവര്‍, യാത്രക്കാരെ സുരക്ഷിതരാക്കുന്നതിനൊപ്പം ബസിനുള്ളിലുണ്ടായിരുന്ന ലഗേജുകള്‍ പുറത്തെടുക്കാനും മുന്‍കൈ എടുത്തു. തീ കൂടുതല്‍ വ്യാപിക്കുന്നതിന് മുന്‍പ് തന്നെ യാത്രക്കാരെ സുരക്ഷിതമായ അകലത്തിലേക്ക് മാറ്റാന്‍ ഇവര്‍ക്ക് സാധിച്ചു.

പിന്നാലെ മട്ടന്നൂരില്‍ നിന്നും കൂത്തുപറമ്പില്‍ നിന്നും ഫയര്‍ഫോഴ്‌സ് സംഘമെത്തി തീയണച്ചതോടെയാണ് സ്ഥിതി നിയന്ത്രണവിധേയമായത്. ഫുട്‌ബോള്‍ ആവേശത്തിനിടയിലും നാടിന്റെ രക്ഷകരായി മാറിയ ഈ യുവാക്കളുടെ ഇടപെടലാണ് വലിയൊരു ദുരന്തം ഒഴിവാക്കിയത്. ബസിന് തീപിടിച്ചതിനൊപ്പം സമീപത്തെ ഒരു പഴക്കടയും പൂര്‍ണ്ണമായും നശിച്ചു. യാത്രക്കാരെല്ലാം സുരക്ഷിതരാണെന്നും ആര്‍ക്കും പരിക്കുകളില്ലെന്നും അധികൃതര്‍ അറിയിച്ചു.