റിയാദ്: സൗദി ഫുഡ് ആന്ഡ് ഡ്രഗ് അതോറിറ്റിയുടെ മാര്ഗ്ഗനിര്ദ്ദേശങ്ങള് ലംഘിച്ച്, അംഗീകാരമില്ലാത്ത 'എക്സോസോം' (exosome) ഇന്ജക്ഷന് സോഷ്യല് മീഡിയയിലൂടെ പ്രചരിപ്പിച്ച ആരോഗ്യ പ്രവര്ത്തകനെതിരെ കര്ശന നിയമനടപടികളുമായി സൗദി ആരോഗ്യ മന്ത്രാലയം. മന്ത്രാലയത്തിന്റെ ചട്ടങ്ങളും മെഡിക്കല് എത്തിക്സും ലംഘിച്ചതിന് ഇദ്ദേഹത്തിന്റെ പ്രൊഫഷണല് ലൈസന്സ് സസ്പെന്ഡ് ചെയ്തു.
പ്രസ്തുത ആരോഗ്യ പ്രവര്ത്തകന് ഉന്നയിച്ച അവകാശവാദങ്ങള് മന്ത്രാലയത്തിന്റെ അന്വേഷണത്തില് വ്യാജമാണെന്ന് കണ്ടെത്തി. മരുന്നിന്റെ അംഗീകൃത ഉപയോഗത്തിന് പുറത്തുള്ള കാര്യങ്ങള്ക്കായി ഇത് ഉപയോഗിക്കാന് പ്രേരിപ്പിച്ചു. ശാസ്ത്രീയമായ തെളിവുകളില്ലാതെ, സ്വന്തം അനുഭവങ്ങളുടെ അടിസ്ഥാനത്തില് മരുന്നിന്റെ സുരക്ഷിതത്വത്തെയും ഫലപ്രാപ്തിയെയും കുറിച്ച് തെറ്റായ വിവരങ്ങള് സമൂഹത്തിന് നല്കി. മറ്റ് ആരോഗ്യ പ്രവര്ത്തകരെ പരസ്യമായി വിമര്ശിച്ചത് മെഡിക്കല് എത്തിക്സിന് വിരുദ്ധമാണെന്ന് മന്ത്രാലയം ചൂണ്ടിക്കാട്ടി. മരുന്നിന്റെ പാര്ശ്വഫലങ്ങളെക്കുറിച്ചോ പരിമിതികളെക്കുറിച്ചോ വ്യക്തമായ വിവരങ്ങള് നല്കാതെ രോഗികളുടെ തീരുമാനങ്ങളെ വഴിതെറ്റിക്കാന് ശ്രമിച്ചുവെന്നും കണ്ടെത്തിയതിനെത്തുടര്ന്നാണ് നടപടി.
വ്യക്തിപരമായ അനുഭവങ്ങളോ കേട്ടുകേള്വികളോ ഒരിക്കലും ശാസ്ത്രീയമായ തെളിവുകളായി കണക്കാക്കാനാവില്ലെന്ന് മന്ത്രാലയം വ്യക്തമാക്കി. മനുഷ്യരില് നടത്തുന്ന ഏത് ചികിത്സാ പരീക്ഷണങ്ങളും കര്ശനമായ നിയമ-ശാസ്ത്രീയ മാനദണ്ഡങ്ങള്ക്ക് വിധേയമായിരിക്കണം. മെഡിക്കല് രംഗത്തെ അഭിപ്രായവ്യത്യാസങ്ങള് പരസ്യമായല്ല, മറിച്ച് തെളിവുകളുടെ അടിസ്ഥാനത്തിലുള്ള ശാസ്ത്രീയ ചര്ച്ചകളിലൂടെയാണ് പരിഹരിക്കേണ്ടതെന്നും അധികൃതര് ഓര്മ്മിപ്പിച്ചു.
സൗദി ഫുഡ് ആന്ഡ് ഡ്രഗ് അതോറിറ്റിയുമായും സൗദി കമ്മീഷന് ഫോര് ഹെല്ത്ത് സ്പെഷ്യാലിറ്റീസുമായും സഹകരിച്ച് സോഷ്യല് മീഡിയയിലെ ഇത്തരം ആരോഗ്യ സംബന്ധിയായ ഉള്ളടക്കങ്ങള് കര്ശനമായി നിരീക്ഷിക്കുമെന്ന് മന്ത്രാലയം വ്യക്തമാക്കി. ആരോഗ്യ സംബന്ധിയായ നിയമലംഘനങ്ങള് ശ്രദ്ധയില്പ്പെട്ടാല് പൊതുജനങ്ങള്ക്ക് '937' എന്ന ഹെല്പ്പ് ലൈന് നമ്പറില് വിളിച്ച് റിപ്പോര്ട്ട് ചെയ്യാവുന്നതാണ്. രോഗികളുടെ സുരക്ഷ ഉറപ്പാക്കാനും ആരോഗ്യരംഗത്തെ വിശ്വാസ്യത കാത്തുസൂക്ഷിക്കാനും വിട്ടുവീഴ്ചയില്ലാത്ത നടപടികള് തുടരുമെന്നും മന്ത്രാലയം അറിയിച്ചു.
Related News
