ജിദ്ദ: പ്രവാസികള് നേരിടുന്ന എല്ലാ പ്രശ്നങ്ങളും പരിഹരിക്കുന്നതിന് സംസ്ഥാന സര്ക്കാര് പ്രതിജ്ഞാബദ്ധമാണെന്ന് മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങള് പറഞ്ഞു. മുഖ്യമന്ത്രി വി.ഡി. സതീശന് ഇക്കാര്യത്തില് ഏറെ ശ്രദ്ധ പതിപ്പിക്കുന്നുണ്ടെന്നും, പ്രവാസികളുടെ ആശങ്കകള് ദൂരീകരിക്കുന്നതിനുള്ള നടപടികള് സര്ക്കാരിന്റെ ഭാഗത്തുനിന്നും ഉണ്ടാകുമെന്നും അദ്ദേഹം കൂട്ടിച്ചേര്ത്തു. ജിദ്ദ കെ.എം.സി.സി സെന്ട്രല് കമ്മിറ്റി ലയാലി ഓഡിറ്റോറിയത്തില് നല്കിയ സ്വീകരണ സമ്മേളനത്തില് സംസാരിക്കുകയായിരുന്നു അദ്ദേഹം.
ഇന്ത്യയും സൗദി അറേബ്യയും തമ്മിലുള്ള നൂറ്റാണ്ടുകള് പഴക്കമുള്ള ചരിത്രപരമായ സൗഹൃദം ഊഷ്മളമാക്കുന്നതില് പ്രവാസികള് വഹിക്കുന്ന പങ്ക് നിസ്തുലമാണെന്ന് തങ്ങള് ഓര്മ്മിപ്പിച്ചു. പ്രവാചക കാലം മുതല്ക്കേ അറബ് ലോകവും ഇന്ത്യയുമായി നിലനിന്ന വാണിജ്യ-സാംസ്കാരിക ബന്ധങ്ങളെ അദ്ദേഹം എടുത്തുപറഞ്ഞു. സൗദി ഭരണാധികാരികളുടെ കാരുണ്യവും മാനുഷിക മൂല്യങ്ങളും പ്രവാസികള്ക്ക് വലിയ പിന്തുണയാണ് നല്കുന്നത്. സൗദി അറേബ്യയുടെ വികസനത്തില് നിര്ണായക പങ്കുവഹിക്കുന്ന പ്രവാസികള്, അവിടുത്തെ നിയമവ്യവസ്ഥകള് പാലിച്ച് മാതൃകാപരമായ ജീവിതം നയിക്കണമെന്നും അദ്ദേഹം ആഹ്വാനം ചെയ്തു.
കെ.എം.സി.സിയുടെ കരുത്തുറ്റ സംഘടനാ സംവിധാനങ്ങളെയും ക്ഷേമപ്രവര്ത്തനങ്ങളെയും അദ്ദേഹം പ്രത്യേകം അഭിനന്ദിച്ചു. ജിദ്ദ കെ.എം.സി.സി പ്രസിഡന്റ് അബൂബക്കര് അരിമ്പ്ര അധ്യക്ഷത വഹിച്ച ചടങ്ങില്, സൗദി കെ.എം.സി.സി പ്രസിഡന്റ് കുഞ്ഞിമോന് കാക്കിയ ഉദ്ഘാടനം നിര്വഹിച്ചു. ശറഫുദ്ദീന് ഹുദവി ആനമങ്ങാട് മുഖ്യപ്രഭാഷണം നടത്തി.
അശ്റഫ് വേങ്ങാട്, നസീംപുളിക്കല്, അഹമ്മദ് പാളയാട്ട്, ഖാദര് ചെങ്കള, വി.പി മുഹമ്മദലി, വി.കെ ഹുസൈന് കുട്ടി, ഹാരിസ് കല്ലായി എന്നിവര് ആശംസ നേര്ന്നു. പ്രസിഡന്റ് അബൂബക്കര് അരിമ്പ്ര തങ്ങള്ക്ക് കെഎംസിസിയുടെ ആദരപത്രം സമര്പ്പിച്ചു. സി.കെ റസാഖ് മാസ്റ്റര് പ്രവാസി പ്രശ്നങ്ങള് അടങ്ങിയ നിവേദനം നല്കി. സെന്ട്രന് കമ്മിറ്റി ഭാരവാഹികളും ജില്ലാ കമ്മിറ്റി ഭാരവാഹികളും തങ്ങളെ ഷാള് അണിയിച്ചു. വന് ജനാവലി തിങ്ങി നിറഞ്ഞ ചടങ്ങില് തങ്ങളെക്കുറിച്ച് തയ്യാറാക്കിയ പുതിയ പുസ്തകത്തിന്റെ പോസ്റ്റര് റിലീസിംഗും നടന്നു.
ഫോട്ടോ: ജിദ്ദ കെ.എം.സി സി സെന്ട്രല് കമ്മറ്റിയുടെ ആദരപത്രം പ്രസിഡന്റ് അബൂബക്കര് അരിമ്പ്ര പാണക്കാട് സയ്യിദ് സാദിഖലി ശിഹാബ് തങ്ങള്ക്ക് സമര്പ്പിക്കുന്നു.
