റിയാദ്: സൗദി അറേബ്യയില് ജോലി ചെയ്യുന്ന വിദേശി തൊഴിലാളികള്ക്കും തൊഴില് സ്ഥാപനങ്ങള്ക്കും വലിയ ആശ്വാസം നല്കിക്കൊണ്ട്, വര്ക്ക് പെര്മിറ്റ് (തൊഴില് അനുമതി) സ്റ്റാറ്റസ് നിയമവിധേയമാക്കുന്നതിനുള്ള സമയപരിധി മാനവ വിഭവശേഷി, സാമൂഹിക വികസന മന്ത്രാലയം ഈ വര്ഷം അവസാനം വരെ നീട്ടി. ജൂണ് 30ന് അവസാനിച്ച ഇളവുകാലാവധിയാണ് ഇപ്പോള് ആറു മാസത്തേക്ക് കൂടി ദീര്ഘിപ്പിച്ചിരിക്കുന്നത്. ഈ അവസരം പരമാവധി പ്രയോജനപ്പെടുത്താന് ബന്ധപ്പെട്ടവര് ഉടന് തന്നെ തങ്ങളുടെ 'ഖിവ' (Qiwa) പ്ലാറ്റ്ഫോം വഴിയോ മന്ത്രാലയത്തിന്റെ ഔദ്യോഗിക പോര്ട്ടല് വഴിയോ സ്റ്റാറ്റസ് പരിശോധിക്കേണ്ടതാണ്. സമയപരിധി അവസാനിക്കുന്നതിന് മുന്പ് തന്നെ ആവശ്യമായ രേഖകള് ശരിയാക്കാന് തൊഴിലുടമകളുമായി സഹകരിക്കണമെന്നും അധികൃതര് ഓര്മ്മിപ്പിക്കുന്നു.
തൊഴില് രേഖകളിലെ അപാകതകള് പരിഹരിക്കാനും നിയമനടപടികളില് നിന്ന് ഒഴിവാകാനും പ്രവാസികള്ക്ക് ലഭിച്ച സുവര്ണ്ണാവസരമാണിത്. സ്പോണ്സര്ഷിപ്പ് മാറ്റം അടക്കമുള്ള സാങ്കേതിക തടസ്സങ്ങള് മൂലം ഇഖാമയും വര്ക്ക് പെര്മിറ്റും പുതുക്കാന് കഴിയാതെ ആശങ്കയിലായിരുന്ന ആയിരക്കണക്കിന് തൊഴിലാളികള്ക്ക് ഈ തീരുമാനം വലിയ ആശ്വാസമാകും.
പ്രധാനപ്പെട്ട ഇളവുകള് ആര്ക്കൊക്കെ?
മന്ത്രാലയത്തിന്റെ പുതിയ അറിയിപ്പ് പ്രകാരം ഈ ഇളവിന്റെ ഗുണം ലഭിക്കുന്നവര്: വര്ക്ക് പെര്മിറ്റ് കാലാവധി കഴിഞ്ഞവര്: പെര്മിറ്റ് കാലാവധി അവസാനിച്ചിട്ട് മൂന്ന് മാസത്തില് കൂടുതല് ആയവര്. 12 മാസത്തിലധികം കാലഹരണപ്പെട്ടവര്: വര്ക്ക് പെര്മിറ്റ് കാലാവധി കഴിഞ്ഞ് 12 മാസത്തില് കൂടുതല് ആയവര്ക്ക് സ്റ്റാറ്റസ് ശരിയാക്കാന് ഇനി വര്ഷാവസാനം വരെ അവസരമുണ്ട്.
തൊഴിലുടമ മാറിയവര്: പുതിയ തൊഴിലുടമയുടെ കീഴില് എത്തിയിട്ടും ആറ് മാസം കഴിഞ്ഞിട്ടും വര്ക്ക് പെര്മിറ്റ് ലഭിക്കാത്ത തൊഴിലാളികള്ക്ക് ഈ അവസരം ഉപയോഗപ്പെടുത്താം.
മന്ത്രാലയത്തിന്റെ ലക്ഷ്യം
തൊഴില് വിപണിയിലെ നിയമങ്ങള് കൂടുതല് കാര്യക്ഷമമായി നടപ്പിലാക്കുകയാണ് ഈ നടപടിയിലൂടെ മന്ത്രാലയം ലക്ഷ്യമിടുന്നത്. തൊഴിലുടമയുടെയും തൊഴിലാളിയുടെയും അവകാശങ്ങള് സംരക്ഷിക്കുന്നതിനൊപ്പം, തൊഴില് കരാറുകള് നിയമപരമായി നിലനിര്ത്താനും ഇത് സഹായിക്കും. സ്ഥാപനങ്ങള്ക്കും ജീവനക്കാര്ക്കും ആവശ്യമായ നടപടിക്രമങ്ങള് പൂര്ത്തിയാക്കാന് ആവശ്യമായ സാവകാശം നല്കുന്നതിലൂടെ തൊഴില് വിപണിയിലെ സുസ്ഥിരത ഉറപ്പാക്കുകയാണ് ലക്ഷ്യം.
Related News
