കുവൈറ്റ് സിറ്റി: കുവൈറ്റിലെ ഇന്ത്യന് പാസ്പോര്ട്ട്, വിസ, കോണ്സുലര് സേവനങ്ങളുടെ ഉയര്ന്ന സര്വീസ് ചാര്ജ് അടിയന്തരമായി പിന്വലിക്കണമെന്നാവശ്യപ്പെട്ട് പ്രവാസി ലീഗല് സെല് നിവേദനം സമര്പ്പിച്ചു. പ്രവാസി ലീഗല് സെല് ഗ്ലോബല് പ്രസിഡണ്ടും സുപ്രീം കോടതി അഭിഭാഷകനുമായ അഡ്വ. ജോസ് അബ്രഹാം, കുവൈറ്റ് കണ്ട്രി ഹെഡ് ബാബു ഫ്രാന്സീസ് എന്നിവര് കേന്ദ്ര വിദേശകാര്യമന്ത്രി ഡോ. എസ്. ജയശങ്കറിനാണ് നിവേദനം സമര്പ്പിച്ചത്.
നിലവിലെ സേവന ദാതാക്കളായ ബി.എല്.എസ് ഇന്റര്നാഷണലിന് പകരം, ജൂലൈ ഒന്നു മുതല് ചുമതലയേല്ക്കുന്ന 'ഡൂ ഡിജിറ്റല് ഗ്ലോബല്' (DU Digital Global) കമ്പനിയാണ് സേവന നിരക്കുകള് ഇരട്ടിയിലധികമായി പുതുക്കി നിശ്ചയിച്ചിരിക്കുന്നത്. നിലവില് ഒരു ദിനാര് മാത്രമായിരുന്ന സര്വീസ് ചാര്ജ്, പുതിയ പരിഷ്കാരത്തോടെ എല്ലാ സേവനങ്ങളും ചേര്ത്ത് ആറു ദിനാറായി വര്ധിപ്പിച്ചത് പ്രവാസികള്ക്ക് വലിയ സാമ്പത്തിക ബാധ്യതയാണ് ഉണ്ടാക്കുന്നത്. കൂടാതെ, പല സേവനങ്ങളും നിര്ബന്ധിതമായി സ്വീകരിക്കേണ്ട സാഹചര്യവും പുതിയ നിയമത്തിലൂടെ വരുന്നുണ്ട്.
പശ്ചിമേഷ്യയിലെ യുദ്ധസാഹചര്യം, തൊഴില് നഷ്ടപ്പെടല്, ഉയര്ന്ന റെസിഡന്സ് വിസ ചാര്ജ്, ഇന്ഷുറന്സ് നിരക്ക് വര്ധന, സ്കൂള് ഫീസ് വര്ധന തുടങ്ങി കടുത്ത സാമ്പത്തിക പ്രതിസന്ധി നേരിടുന്ന പ്രവാസികളെ ഈ അധിക സര്വീസ് ചാര്ജ് പിന്വലിച്ച് സഹായിക്കണമെന്ന് നിവേദനത്തില് ആവശ്യപ്പെട്ടു. പ്രവാസികള് ഏറെ ആശ്രയിച്ചിരുന്ന അബ്ബാസിയയിലെ സേവന കേന്ദ്രം പൂര്ണമായും നിര്ത്തിവെച്ച് ദജീജിലേക്ക് മാറ്റുന്ന നടപടി സാധാരണക്കാരായ തൊഴിലാളികള്ക്ക് അധിക ടാക്സി യാത്രാച്ചെലവിന് കാരണമാകുമെന്നും, അതിനാല് അബ്ബാസിയയില് തന്നെ കേന്ദ്രം നിലനിര്ത്താന് നടപടി സ്വീകരിക്കണമെന്നും നിവേദനത്തില് ചൂണ്ടിക്കാട്ടി.
സമീപരാജ്യങ്ങളില് വളരെ കുറഞ്ഞ സര്വീസ് ചാര്ജ് നിരക്കില് ഈ സേവനങ്ങള് ലഭിക്കുമ്പോഴാണ് കുവൈറ്റില് ഇത്തരമൊരു നിരക്ക് വര്ധന നടപ്പിലാക്കുന്നത്. കുറഞ്ഞ വരുമാനക്കാരായ തൊഴിലാളികളുടെ പ്രയാസങ്ങള് കണക്കിലെടുത്ത്, പുതുതായി നിശ്ചയിച്ച ആറു ദിനാര് സര്വീസ് ചാര്ജ് വിഷയത്തില് കേന്ദ്ര വിദേശകാര്യമന്ത്രാലയത്തിന്റെ ഭാഗത്തുനിന്ന് അനുകൂലമായ നടപടി പ്രതീക്ഷിക്കുന്നതായി പ്രവാസി ലീഗല് സെല് ഭാരവാഹികള് അറിയിച്ചു.
Related News
