.jpg)
റിയാദ്: ഇന്ഷുറന്സ്, വിദ്യാഭ്യാസം, പൊതുഗതാഗതം, വാര്ത്താവിനിമയം തുടങ്ങി രാജ്യത്തെ സുപ്രധാന മേഖലകളില് വന് പരിഷ്കാരങ്ങള് വരുത്താന് ലക്ഷ്യമിട്ടുള്ള നിര്ണായക ശുപാര്ശകളുമായി സൗദി ശൂറ കൗണ്സില്. പൊതുജനങ്ങളുടെ ജീവിതനിലവാരം ഉയര്ത്തുന്നതിനൊപ്പം ആധുനിക സാങ്കേതികവിദ്യകളുടെ സാധ്യത പരമാവധി പ്രയോജനപ്പെടുത്താനും ലക്ഷ്യമിട്ടാണ് പുതിയ നീക്കം.
രാജ്യത്തെ ആരോഗ്യ, വാഹന ഇന്ഷുറന്സ് നിരക്കുകള് നിശ്ചയിക്കുന്നതിനുള്ള നിയന്ത്രണ ചട്ടക്കൂട് കൂടുതല് ശക്തമാക്കാന് ശൂറ കൗണ്സില് ഇന്ഷുറന്സ് അതോറിറ്റിയോട് ആവശ്യപ്പെട്ടു. ഇന്ഷുറന്സ് ക്ലെയിം ഡാറ്റ, അപകടസാധ്യതകള്, ഉപഭോക്താക്കളുടെ വാഹന ഉപയോഗ രീതികള് എന്നിവയുമായി ബന്ധിപ്പിച്ച് ഇന്ഷുറന്സ് വിലനിര്ണ്ണയം വികസിപ്പിക്കാനാണ് നിര്ദേശം. കൂടാതെ, ഉയര്ന്ന അപകട സാധ്യതയുള്ള മേഖലകളില് നിര്ബന്ധിത ഇന്ഷുറന്സ് സംവിധാനം വ്യാപിപ്പിക്കാനും, വാഹന ക്ലെയിമുകളില് ക്യാഷ് കോമ്പന്സേഷന് പകരം ഗുണനിലവാരമുള്ള റിപ്പയറിങ് സംവിധാനത്തിലേക്ക് ഘട്ടംഘട്ടമായി മാറാനും കൗണ്സില് ശുപാര്ശ ചെയ്തു.
വിദ്യാഭ്യാസ മേഖലയില് അധ്യാപകരുടെ നേരത്തെയുള്ള വിരമിക്കലിന് (ഏര്ലി റിട്ടയര്മെന്റ്) കാരണമാകുന്ന പ്രശ്നങ്ങള് പഠിച്ച് പരിഹരിക്കാന് വിദ്യാഭ്യാസ മന്ത്രാലയത്തോട് കൗണ്സില് ആവശ്യപ്പെട്ടു. ക്ലാസ് മുറികളില് പരമാവധി വിദ്യാര്ഥികളുടെ എണ്ണം നിജപ്പെടുത്തുക, സ്കൂള് സൗകര്യങ്ങളുടെ അറ്റകുറ്റപ്പണികള്ക്കായി പ്രത്യേക കരാര് കമ്പനികളെ ചുമതലപ്പെടുത്തുക, 'നൂര്' പ്ലാറ്റ്ഫോമിന്റെ പ്രവര്ത്തനം മെച്ചപ്പെടുത്തുക എന്നിവയാണ് മറ്റ് പ്രധാന നിര്ദേശങ്ങള്. ഒപ്പം, നിര്മ്മിത ബുദ്ധി (എഐ), ഡാറ്റാ അനാലിസിസ്, പ്രോഗ്രാമിംഗ്, സൈബര് സുരക്ഷ തുടങ്ങിയ ആധുനിക നൈപുണ്യങ്ങള് സ്കൂള് പാഠ്യപദ്ധതിയില് ഉള്പ്പെടുത്താനും സ്കോളര്ഷിപ്പ് വിവരങ്ങള്ക്കായി ഏകീകൃത ഡാറ്റാബേസ് നിര്മ്മിക്കാനും ആവശ്യപ്പെട്ടിട്ടുണ്ട്.
പൊതുഗതാഗത മേഖലയില് ആധുനിക സാങ്കേതികവിദ്യകളുടെ ഉപയോഗം വര്ദ്ധിപ്പിക്കാന് പബ്ലിക് ട്രാന്സ്പോര്ട്ട് അതോറിറ്റിക്ക് കൗണ്സില് നിര്ദേശം നല്കി. പ്രമുഖ നഗരങ്ങളിലെ ഗതാഗതക്കുരുക്ക് പ്രവചിക്കുന്നതിനായി ബിഗ് ഡാറ്റ, ആര്ട്ടിഫിഷ്യല് ഇന്റലിജന്സ് സാങ്കേതികവിദ്യകള് ഉപയോഗിക്കാനും സ്വയം നിയന്ത്രിത വാഹനങ്ങളുടെ സുരക്ഷാ സര്ട്ടിഫിക്കേഷന് ശക്തമാക്കാനും ആവശ്യപ്പെട്ടു. പരിസ്ഥിതി മലിനീകരണം കുറയ്ക്കുന്നതിനായി കാര്ബണ് ഉദ്വമനം നിയന്ത്രിക്കുന്നതിനൊപ്പം ഇലക്ട്രിക് വാഹനങ്ങളുടെ അടിസ്ഥാന സൗകര്യ വികസനത്തില് സ്വകാര്യ നിക്ഷേപം പ്രോത്സാഹിപ്പിക്കാനും കൗണ്സില് നിര്ദേശിച്ചു.
സൗദി മാധ്യമരംഗത്തിന്റെ ആഗോള സാന്നിധ്യം ശക്തമാക്കുന്നതിനായി ബ്രോഡ്കാസ്റ്റിംഗ് ആന്ഡ് ടെലിവിഷന് അതോറിറ്റിക്ക് കീഴില് പ്രത്യേക ഇംഗ്ലീഷ് ചാനല് ആരംഭിക്കാന് കൗണ്സില് ശുപാര്ശ ചെയ്തു. സൗദി മാധ്യമങ്ങളുടെ ചരിത്രം വ്യക്തമാക്കുന്ന ഒരു ഇന്ററാക്ടീവ് നാഷണല് മ്യൂസിയം സ്ഥാപിക്കുക, അരാംകോ ടിവി ആര്ക്കൈവ് ഒരു പ്രൊഡക്ഷന് സെന്ററായി മാറ്റുക എന്നിവയാണ് മറ്റ് നിര്ദേശങ്ങള്. കൂടാതെ, സാങ്കേതിക-വൊക്കേഷണല് പരിശീലന രംഗത്തെ കോഴ്സുകളുടെ ആവര്ത്തനം ഒഴിവാക്കി തൊഴില് വിപണിക്ക് അനുയോജ്യമായ രീതിയില് മാറ്റാനും ടെക്നിക്കല് ആന്ഡ് വൊക്കേഷണല് ട്രെയിനിങ് കോര്പ്പറേഷനോട് കൗണ്സില് ആവശ്യപ്പെട്ടു.
പരിസ്ഥിതി, ജലം, കൃഷി മന്ത്രാലയത്തോട് കാര്ഷിക നയങ്ങള് കര്ഷകരുടെ ജീവിതനിലവാരത്തില് ഉണ്ടാക്കുന്ന സ്വാധീനം വിലയിരുത്താനും തന്ത്രപ്രധാനമായ വിളകള്ക്കായി പ്രാദേശിക വിത്ത് വ്യവസായം വികസിപ്പിക്കാനും ആവശ്യപ്പെട്ടു. പടിഞ്ഞാറന് തീരദേശ നഗരങ്ങളില് അടിസ്ഥാന സൗകര്യങ്ങള് സംരക്ഷിക്കുന്നതിനായി മലിനജല ശൃംഖലയുടെ വ്യാപ്തി വര്ദ്ധിപ്പിക്കാന് നാഷണല് വാട്ടര് കമ്പനിയോട് നിര്ദേശിച്ചു. കൂടാതെ, ചരിത്രരേഖകളുടെ ഇന്ഡെക്സിംഗ് വേഗത്തിലാക്കാനും ഇന്ഡസ്ട്രിയല് ഡെവലപ്മെന്റ് സെന്ററിന് കീഴിലുള്ള നിക്ഷേപ സാധ്യതകള് മെച്ചപ്പെടുത്താനും കൗണ്സില് ആവശ്യപ്പെട്ടു.
ആരോഗ്യ രംഗത്ത് സുരക്ഷ ഉറപ്പാക്കുന്നതിനായി നിര്മ്മിത ബുദ്ധിയില് അധിഷ്ഠിതമായ 'സ്മാര്ട്ട് ഏര്ളി വാണിംഗ് സിസ്റ്റം' വഴി പ്രാദേശിക ഔഷധ നിര്മാണ ശാലകള്ക്ക് ലൈസന്സ് നല്കാന് ഫുഡ് ആന്ഡ് ഡ്രഗ് അതോറിറ്റിക്ക് ശൂറ കൗണ്സില് നിര്ദേശം നല്കി. ഹലാല് ഭക്ഷണ സര്ട്ടിഫിക്കേഷനില് ആഗോള റഫറന്സായി അതോറിറ്റിയെ മാറ്റാനും നിര്ദേശമുണ്ട്. കായിക മേഖലയില് പ്രത്യേകിച്ച് ഫുട്ബോളില് കഴിവുള്ള പ്രതിഭകളെ കണ്ടെത്തുന്നതിനായി മഹ്ദ് സ്പോര്ട്സ് അക്കാദമി കൂടുതല് പങ്കാളിത്തം ഉറപ്പാക്കണമെന്നും കൗണ്സില് യോഗം ആവശ്യപ്പെട്ടു.
Related News
