ഫിലാഡല്ഫിയ: കടുത്ത ചൂടിനെ അവഗണിച്ച് പൊരുതിയ പരാഗ്വേയെ ഏകപക്ഷീയമായ ഒരു ഗോളിന് മറികടന്ന് ഫ്രാന്സ് ലോകകപ്പ് ഫുട്ബോള് ക്വാര്ട്ടറില് കടന്നു. ശനിയാഴ്ച നടന്ന പ്രീക്വാര്ട്ടര് പോരാട്ടത്തില് സൂപ്പര് താരം കിലിയന് എംബാപ്പെയുടെ വകയായിരുന്നു ഫ്രാന്സിന്റെ വിജയഗോള്. ഈ വിജയത്തോടെ അടുത്ത വ്യാഴാഴ്ച ഫോക്സ്ബറോയില് നടക്കുന്ന ക്വാര്ട്ടര് ഫൈനലില് മൊറോക്കോയാണ് ഫ്രാന്സിന്റെ എതിരാളികള്. 2022 ലോകകപ്പ് സെമിഫൈനലിന്റെ ആവര്ത്തനമാകും ഈ മത്സരം.
മത്സരത്തിന്റെ 70-ാം മിനിറ്റില് ലഭിച്ച പെനാല്റ്റി കിക്കിലൂടെയാണ് എംബാപ്പെ ഫ്രാന്സിന് വിജയം സമ്മാനിച്ചത്. പകരക്കാരനായി ഇറങ്ങിയ ഡെസിറെ ഡൗയുടെ തകര്പ്പന് മുന്നേറ്റമാണ് പരാഗ്വേ ബോക്സില് പെനാല്റ്റിക്ക് വഴിയൊരുക്കിയത്. ഡീഗോ ഗോമസിന്റെ ഫൗളിനെത്തുടര്ന്ന് വാര് (VAR) പരിശോധനയ്ക്ക് ശേഷമാണ് റഫറി പെനാല്റ്റി അനുവദിച്ചത്.
ഈ ഗോളോടെ നിലവിലെ ലോകകപ്പില് ഏഴ് ഗോളുകളുമായി അര്ജന്റീനയുടെ ലയണല് മെസ്സിക്കൊപ്പം ഗോള്ഡന് ബൂട്ട് പോരാട്ടത്തില് എംബാപ്പെ ഒന്നാമതെത്തി. ലോകകപ്പ് ചരിത്രത്തില് ആകെ 19 ഗോളുകള് നേടിയ എംബാപ്പെ, മെസ്സിയുടെ റെക്കോര്ഡിനൊപ്പമെത്താന് ഇനി ഒരു ഗോള് കൂടി മാത്രം മതി.
ഏകദേശം 38 ഡിഗ്രി സെല്ഷ്യസോളം ചൂടുള്ള കാലാവസ്ഥയില് പ്രതിരോധത്തില് ഊന്നിയാണ് പരാഗ്വേ കളിച്ചത്. ജര്മ്മനിയെ അട്ടിമറിച്ച് പ്രീക്വാര്ട്ടറിലെത്തിയ ടീം ഫ്രാന്സിനെതിരെയും മികച്ച പ്രതിരോധമാണ് കാഴ്ചവെച്ചത്. ആദ്യ പകുതിയിലുടനീളം ഫ്രഞ്ച് മുന്നേറ്റങ്ങളെ പരാഗ്വേ തടഞ്ഞുനിര്ത്തി. എന്നാല്, 61-ാം മിനിറ്റില് ബ്രാഡ്ലി ബാര്ക്കോലയ്ക്ക് പകരം ഡെസിറെ ഡൗ കളത്തിലിറങ്ങിയത് ഫ്രാന്സിന് ഗുണകരമായി.
കളിയുടെ അവസാന മിനിറ്റുകളില് സമനിലയ്ക്കായി പരാഗ്വേ കിണഞ്ഞു പരിശ്രമിച്ചെങ്കിലും ഫ്രഞ്ച് ഗോള്മുഖത്ത് കാര്യമായ ഭീഷണിയുയര്ത്താനായില്ല. 90-ാം മിനിറ്റില് മൗറീഷ്യോ തൊടുത്ത ഷോട്ട് മാത്രമാണ് പരാഗ്വേയുടെ ഭാഗത്തുനിന്നുണ്ടായ ഏക ലക്ഷ്യത്തിലേക്കുള്ള ഷോട്ട്. മത്സരത്തിന്റെ അവസാന നിമിഷങ്ങളില് എംബാപ്പെയുടെ ഗോളെന്നുറച്ച രണ്ട് ഷോട്ടുകള് പരാഗ്വേ ഗോള്കീപ്പര് ഒര്ലാന്ഡോ ഗില് അത്ഭുതകരമായി രക്ഷപ്പെടുത്തിയെങ്കിലും ടീമിന്റെ തോല്വി ഒഴിവാക്കാന് കഴിഞ്ഞില്ല.
2010-ലെ ലോകകപ്പ് ക്വാര്ട്ടര് ഫൈനല് പ്രകടനത്തിന് ശേഷം വലിയൊരു ഇടവേളയ്ക്ക് ശേഷമെത്തിയ പരാഗ്വേയ്ക്ക്, ഇത്തവണ പ്രീക്വാര്ട്ടറില് തന്നെ മടക്കയാത്ര നടത്തേണ്ടി വന്നു. അതേസമയം, കിരീടപ്രതീക്ഷയുമായി മുന്നേറുന്ന ഫ്രാന്സിന് മൊറോക്കയ്ക്കെതിരായ ക്വാര്ട്ടര് പോരാട്ടം കടുപ്പമേറിയതാകും.
