റിയാദ് - നഗരത്തില് നിര്മാണ പ്രവര്ത്തനങ്ങള്ക്കിടയിലെ പൊടിപടലങ്ങള് നിയന്ത്രിക്കുന്നതിനുള്ള മാര്ഗ്ഗനിര്ദ്ദേശങ്ങള് ലംഘിച്ചതിന് നാഷണല് സെന്റര് ഫോര് എന്വയോണ്മെന്റല് കോംപ്ലയന്സ് 557 പരിസ്ഥിതി ലംഘനങ്ങള് രേഖപ്പെടുത്തി. ചട്ടങ്ങള് പാലിക്കാത്ത കമ്പനികളില്നിന്നായി 16 ദശലക്ഷത്തിലധികം (1.6 കോടി) സൗദി റിയാലാണ് പിഴ ഈടാക്കിയത്. നഗരപരിധിയിലെ വിവിധ നിര്മാണ പദ്ധതികളില് പാരിസ്ഥിതിക മാനദണ്ഡങ്ങള് ഉറപ്പാക്കാനും വായുവിന്റെ ഗുണനിലവാരം മെച്ചപ്പെടുത്താനുമുള്ള നിരന്തര ശ്രമങ്ങളുടെ ഭാഗമായാണ് ഈ നടപടി.
റോയല് കമ്മീഷന് ഫോര് റിയാദ് സിറ്റി, റിയാദ് മുനിസിപ്പാലിറ്റി എന്നിവയുമായി സഹകരിച്ച് കഴിഞ്ഞ ഫെബ്രുവരിയിലാണ് ഈ പരിശോധനാ കാമ്പയിന് ആരംഭിച്ചതെന്ന് എന്സിഇസി റിയാദ് ബ്രാഞ്ച് ഡയറക്ടര് എഞ്ചിനീയര് ഫവാസ് അല്-മുജ്തില് അറിയിച്ചു. ഈ കാലയളവില് ഫീല്ഡ് ടീമുകള് മൂവായിരത്തിലധികം നിര്മാണ സൈറ്റുകളില് പരിശോധന നടത്തി. പല പ്രമുഖ പദ്ധതികളും വായുനിലവാരം നിരീക്ഷിക്കുന്നതിനുള്ള ഉപകരണങ്ങള് സ്ഥാപിക്കുക, പൊടി അടക്കിനിര്ത്താന് വെള്ളം തളിക്കുക, മണ്ണ് കൊണ്ടുപോകുന്ന ട്രക്കുകള് മൂടുക തുടങ്ങിയ സാങ്കേതിക നിര്ദ്ദേശങ്ങള് പാലിക്കുന്നതില് പരാജയപ്പെട്ടതായി അദ്ദേഹം വ്യക്തമാക്കി.
പരിസരവാസികളില്നിന്നുള്ള പരാതികളും എയര് ക്വാളിറ്റി മോണിറ്ററിംഗ് സ്റ്റേഷനുകളില് നിന്നുള്ള വിവരങ്ങളും അടിസ്ഥാനമാക്കിയാണ് ഇന്സ്പെക്ടര്മാര് കൃത്യമായ പരിശോധന നടത്തിയത്. പിഴ ഈടാക്കിയതിനെ തുടര്ന്ന് ലംഘനങ്ങള് കണ്ടെത്തിയ സൈറ്റുകളില് പൊടി നിയന്ത്രണ സംവിധാനങ്ങള് ഉടന് തന്നെ നടപ്പിലാക്കി തുടങ്ങിയതായി അധികൃതര് അറിയിച്ചു. റിയാദിലെ വായുവിന്റെ ഗുണനിലവാരം ഉയര്ത്താനും പൊതുജനാരോഗ്യം സംരക്ഷിക്കാനും നിര്മാണ കമ്പനികളും കരാറുകാരും ഈ പാരിസ്ഥിതിക നിര്ദ്ദേശങ്ങള് കര്ശനമായി പാലിക്കണമെന്ന് കേന്ദ്രം ആവശ്യപ്പെട്ടു.
Related News
