റിയാദ്: സൗദി അറേബ്യയിലെ ആദ്യത്തെ വിനോദകേന്ദ്രീകൃത ബിസിനസ് പാര്‍ക്കിന്റെയും കോര്‍പ്പറേറ്റ് റിസോര്‍ട്ടിന്റെയും നിര്‍മ്മാണം പൂര്‍ത്തിയായതായി ജനറല്‍ എന്റര്‍ടൈന്‍മെന്റ് അതോറിറ്റി (ജി.ഇ.എ) മേധാവി അറിയിച്ചു. ഒരു ബില്യണ്‍ സൗദി റിയാലിലധികം (267 മില്യണ്‍ ഡോളര്‍) ചെലവില്‍ നിര്‍മ്മിച്ച ബൊലേവാര്‍ഡ് ബിസിനസ് പാര്‍ക്ക്, റിയാദിലെ ബൊലേവാര്‍ഡ് സിറ്റിക്കുള്ളിലാണ് സ്ഥിതി ചെയ്യുന്നത്. സ്വകാര്യ മേഖലയുമായുള്ള പങ്കാളിത്തത്തോടെ ബൊലേവാര്‍ഡ് ജില്ലയുടെ നവീകരണത്തിന്റെ ആദ്യ ഘട്ടമായാണ് ഇത് രൂപീകരിച്ചിരിക്കുന്നത്.

ഒന്‍പത് കെട്ടിടങ്ങളിലായി 60,000 ചതുരശ്ര മീറ്ററിലധികം വിസ്തീര്‍ണ്ണമുള്ള ഓഫീസ് സ്ഥലങ്ങള്‍, കോര്‍പ്പറേറ്റ് ആസ്ഥാനങ്ങള്‍, സഹകരണത്തോടെ പ്രവര്‍ത്തിക്കുന്ന വര്‍ക്കിംഗ് ഫെസിലിറ്റികള്‍, റീട്ടെയില്‍ ഔട്ട്‌ലെറ്റുകള്‍, 1,300-ല്‍ അധികം വാഹനം പാര്‍ക്ക് ചെയ്യാനുള്ള സൗകര്യം എന്നിവ പദ്ധതിയിലുണ്ട്.

രാജാവിന്റെയും കിരീടാവകാശിയുടെയും പിന്തുണയോടെയാണ് പദ്ധതി പൂര്‍ത്തിയാക്കിയതെന്ന് ജി.ഇ.എ ചെയര്‍മാന്‍ തുര്‍ക്കി അല്‍ അല്‍ഷെയ്ഖ് പറഞ്ഞു. രാജ്യത്തിന്റെ സാമ്പത്തിക വൈവിധ്യവല്‍ക്കരണ പദ്ധതിയായ വിഷന്‍ 2030-ന്റെ മറ്റൊരു നാഴികക്കല്ലാണിത് അദ്ദേഹം വിശേഷിപ്പിച്ചു.

സൗദിയുടെ നിശ്ചയദാര്‍ഢ്യത്തിന് അതിരുകളില്ലെന്നും വരും ദിവസങ്ങളില്‍ മികച്ച നേട്ടങ്ങള്‍ ഉണ്ടാകുമെന്നും അദ്ദേഹം കൂട്ടിച്ചേര്‍ത്തു. ഹേ ഡെവലപ്‌മെന്റ്‌സ്, ബി.എസ്.എഫ് ക്യാപിറ്റല്‍ നിയന്ത്രിക്കുന്ന ആര്‍.ഇ.ക്യു റിയല്‍ എസ്റ്റേറ്റ് ഫണ്ട് എന്നിവയുടെ പങ്കാളിത്തത്തോടെയാണ് ഇത് വികസിപ്പിച്ചെടുത്തത്. സെല ആയിരിക്കും ഇതിന്റെ നടത്തിപ്പും പ്രവര്‍ത്തനവും നിര്‍വ്വഹിക്കുന്നത്.