ജിദ്ദ: മലയാള ചലച്ചിത്ര ചരിത്രത്തില് പുതിയൊരു അധ്യായം കുറിച്ചുകൊണ്ട് സൗദി അറേബ്യയില് പൂര്ണ്ണമായും ചിത്രീകരിച്ച 'മസ്റ' എന്ന മലയാള സിനിമ പ്രമുഖ ഒ.ടി.ടി പ്ലാറ്റ്ഫോമായ സിസ്പേസില് (CSPACE) റിലീസ് ചെയ്തു. ഏറെ നാളത്തെ കാത്തിരിപ്പിന് വിരാമമിട്ട് വെള്ളിയാഴ്ച ഉച്ചയ്ക്ക് ഒരു മണിയോടെയാണ് ചിത്രം പ്രേക്ഷകരിലേക്ക് എത്തിയത്. ഒരുപിടി പ്രവാസികളുടെ കഠിനാധ്വാനത്തിന്റെയും സിനിമാസ്വപ്നങ്ങളുടെയും സാക്ഷാത്കാരമാണ് ഈ ചിത്രം.
പ്രതിഭാധനനായ സംവിധായകന് അലി അരീക്കത്ത് കഥ പറയുന്ന 'മസ്റ', നഗരത്തില് നിന്ന് ചില പ്രത്യേക സാഹചര്യങ്ങളാല് കാണാതാവുന്ന ഒരാളുടെ സംഭവബഹുലമായ മരുഭൂമിയിലൂടെയുള്ള പ്രയാണവും തുടര്ന്നുള്ള സംഭവവികാസങ്ങളുമാണ് ദൃശ്യവല്ക്കരിക്കുന്നത്. നാസര് തിരുനിലത്ത് നിര്മ്മിച്ച ഈ ചിത്രത്തില് സുബൈര് ആലുവ, അബ്ദുല്ല മുക്കണ്ണി തുടങ്ങി ജിദ്ദയിലെ ഒട്ടനവധി പ്രവാസി കലാകാരന്മാര് പ്രധാന വേഷങ്ങളില് അണിനിരക്കുന്നു. പ്രവാസലോകത്തിന്റെ പശ്ചാത്തലത്തില് മരുഭൂമിയുടെ ദൃശ്യഭംഗിയും മനുഷ്യബന്ധങ്ങളുടെ തീക്ഷ്ണതയും ഒപ്പിയെടുക്കുന്ന ഹൃദയസ്പര്ശിയായ സൃഷ്ടിയെ ഇരുുകൈയും നീട്ടി സ്വീകരിക്കണമെന്നും, പ്രവാസികളുടെ ഈ ചെറിയ പരീക്ഷണത്തിന് ഏവരുടെയും പിന്തുണയുണ്ടാകണമെന്നും ചിത്രത്തിന്റെ അണിയറപ്രവര്ത്തകര് അഭ്യര്ത്ഥിച്ചു.
