വാഷിംഗ്ടണ്: ഹോര്മുസ് കടലിടുക്കിന്റെ നിയന്ത്രണം ഏറ്റെടുക്കുമെന്നും അവിടെ കാവല് നില്ക്കുന്നതിന് അമേരിക്കയ്ക്ക് പ്രതിഫലം നല്കണമെന്നും അമേരിക്കന് പ്രസിഡന്റ് ഡൊണാള്ഡ് ട്രംപ്. 'ഞങ്ങള് കടലിടുക്കിന്റെ കാവല്ക്കാരാകും,' ഫോക്സ് ആന്ഡ് ഫ്രണ്ട്സ് പരിപാടിയില് സംസാരിക്കവെ ട്രംപ് പറഞ്ഞു. ഇതുവരെ പ്രതിഫലമില്ലാതെയാണ് അമേരിക്ക കാവല് നിന്നിരുന്നതെന്നും എന്നാല് ഇനി ധനികരായ രാജ്യങ്ങള് ഇതിനായി പണം നല്കേണ്ടിവരുമെന്നും അദ്ദേഹം കൂട്ടിച്ചേര്ത്തു. 'കാവല് നില്ക്കുന്നതിന് ഞങ്ങള് പണം വാങ്ങും. വലിയൊരു തുക. ഞങ്ങള് ചെയ്യുന്ന ഈ കാര്യങ്ങള്ക്കും ഞങ്ങളുടെ ആളുകളെ അപകടത്തിലാക്കുന്നതിനും പകരമായി പ്രതിഫലം ലഭിക്കണം എന്ന് മാത്രമാണ് ഞങ്ങള് ആഗ്രഹിക്കുന്നത്,' അദ്ദേഹം പറഞ്ഞു.
മിഡില് ഈസ്റ്റ് സംഘര്ഷത്തില് കഴിഞ്ഞ ഏപ്രിലിലുണ്ടായ വെടിനിര്ത്തലിനു ശേഷം ഇതുവരെ കണ്ടിട്ടില്ലാത്ത വിധത്തിലുള്ള യുഎസ്-ഇറാന് ആക്രമണങ്ങള്ക്ക് പിന്നാലെയാണ് അമേരിക്കന് പ്രസിഡന്റിന്റെ ഈ പ്രസ്താവന. കടലിടുക്കിലൂടെയുള്ള കപ്പല് ഗതാഗതം സ്തംഭിപ്പിച്ച ഈ യുദ്ധത്തിന് ശാശ്വതമായ ഒരു പരിഹാരം കാണാനുള്ള ശ്രമങ്ങളെ ഇത് കൂടുതല് പ്രതിസന്ധിയിലാക്കിയിട്ടുണ്ട്.
കഴിഞ്ഞ ആഴ്ചകളിലെ സംഘര്ഷങ്ങളെല്ലാം നിര്ണായകമായ ഈ ഊര്ജ്ജ വ്യാപാര പാതയെ കേന്ദ്രീകരിച്ചുള്ളതാണ്. ഇതിന്റെ നിയന്ത്രണമാണ് വാഷിംഗ്ടണും ടെഹ്റാനും തമ്മിലുള്ള പ്രധാന തര്ക്ക വിഷയം. വാരാന്ത്യത്തില് മണിക്കൂറുകള് നീണ്ട ചര്ച്ചകളില് ധാരണയായ കാര്യങ്ങളില് മാറ്റം വരുത്താന് ഇറാന് ചര്ച്ചാ സംഘം ശ്രമിക്കുന്നതിനെ അഭിമുഖത്തില് ട്രംപ് വിമര്ശിച്ചു.
'ഞങ്ങള് കടലിടുക്കിന്റെ നിയന്ത്രണം ഏറ്റെടുക്കുകയാണ്. അവര്ക്ക് യാതൊരു നിയന്ത്രണവുമില്ല,' ട്രംപ് പറഞ്ഞു. 'ഞായറാഴ്ച അവര് 11 മണിക്കൂര് നീണ്ട മീറ്റിംഗ് നടത്തി... എല്ലാ കാര്യങ്ങളും ഇന്നലെ സമ്മതിച്ചതാണ്. എന്നാല് അവര് മുറിയില് നിന്ന് പുറത്തിറങ്ങി ഫോണ് വിളിച്ച് ചില മാറ്റങ്ങള് വരുത്തണമെന്ന് പറയുന്നു,' ചര്ച്ചയില് ആവശ്യപ്പെട്ട മാറ്റങ്ങള് എന്താണെന്ന് വ്യക്തമാക്കാതെ അദ്ദേഹം പറഞ്ഞു.
യുദ്ധം കൂടുതല് വഷളാകുന്നത് തടയാനായി ഖത്തര്, പാകിസ്ഥാന്, ഒമാന് എന്നീ രാജ്യങ്ങളിലെ മധ്യസ്ഥരുമായി ചര്ച്ചകള് നടത്തിവരികയാണെന്ന് ഇറാന്റെ വിദേശകാര്യ മന്ത്രാലയ വക്താവ് തിങ്കളാഴ്ച വ്യക്തമാക്കി. ഹോര്മുസ് കടലിടുക്ക് പൂര്ണ്ണമായും അടച്ചിരിക്കുകയാണെന്നാണ് ഇറാന്റെ റെവല്യൂഷണറി ഗാര്ഡ് കോര്പ്സ് അവകാശപ്പെടുന്നത്. എന്നാല് കടലിടുക്ക് തുറന്നുകിടക്കുകയാണെന്നും ഇറാന്റെ നിയന്ത്രണത്തിലല്ലെന്നും അമേരിക്ക പറയുന്നു.
Related News
