തബൂക്ക്: മാനവരാശിക്ക് മാര്‍ഗദര്‍ശനവുമായി സര്‍വ്വലോക രക്ഷിതാവായ അല്ലാഹു അവതരിപ്പിച്ച വിശുദ്ധ ഖുര്‍ആന്റെ മലയാള വിവര്‍ത്തനവും ആശയവും ഉള്‍ക്കൊള്ളിച്ചുകൊണ്ട്, പ്രസിദ്ധ പണ്ഡിതനും വാഗ്മിയുമായ മുഹമ്മദ് അമാനി മൗലവിയുടെ തഫ്‌സീറിനെ ആസ്പദമാക്കി 'ഖുര്‍ആന്‍ ഹദീസ് ലേണിംഗ് കോഴ്‌സ്' ആരംഭിക്കുന്നു. കേരള ഇസ്ലാഹി നോര്‍ത്തേണ്‍ റീജിയന്‍ കമ്മിറ്റിയുടെ ആഭിമുഖ്യത്തില്‍ ഓഗസ്റ്റ് രണ്ടാം തീയതി (ഞായറാഴ്ച) മുതല്‍ കോഴ്‌സ് ആരംഭിക്കും. തുടര്‍ന്നുള്ള എല്ലാ ഞായറാഴ്ചകളിലും രാത്രി 10 മണിക്കായിരിക്കും ക്ലാസുകള്‍ ഉണ്ടായിരിക്കുക. പണ്ഡിതന്‍ ഉസ്താദ് മുബാറക്ക് മദീനി ക്ലാസിന് നേതൃത്വം നല്‍കും. ഗൂഗിള്‍ മീറ്റ് പ്ലാറ്റ്‌ഫോം വഴിയായിരിക്കും ക്ലാസുകള്‍ നടക്കുക.

സൗദി അറേബ്യയിലെ വടക്കന്‍ പ്രവിശ്യയായ ഉംലൂജ് മുതല്‍ തബൂക്ക് വരെയുള്ള പ്രദേശങ്ങളിലുള്ള മലയാളികളെ ലക്ഷ്യമാക്കിക്കൊണ്ടാണ് സംഘാടകര്‍ ഈ പ്രോഗ്രാം സംഘടിപ്പിക്കുന്നത്. ക്ലാസ് നടക്കുന്ന ദിവസങ്ങളില്‍ കോഴ്‌സ് സംബന്ധമായ വാട്‌സ്ആപ്പ് ഗ്രൂപ്പിലും അതുപോലെതന്നെ ഫെയ്‌സ്ബുക്ക് പേജിലും ഗൂഗിള്‍ മീറ്റിംഗ് ലിങ്ക് കേരള ഇസ്ലാഹി നോര്‍ത്ത് റീജിയന്‍ കമ്മിറ്റിയുടെ കീഴില്‍ ലഭ്യമാകുന്നതായിരിക്കും.