റിയാദ്: 2024-25 അധ്യായന വര്‍ഷത്തെ സിബിഎസ്ഇ പത്താം ക്ലാസ് പരീക്ഷയില്‍ ഉന്നത വിജയം നേടിയ വിദ്യാര്‍ത്ഥികളെ ആദരിച്ച് അലിഫ് ഇന്റര്‍നാഷണല്‍ സ്‌കൂള്‍. 'വാലഡിക്റ്ററി ഫങ്ഷന്‍' എന്ന ശീര്‍ഷകത്തില്‍ നടന്ന പ്രതിഭാ സംഗമത്തില്‍ വിദ്യാര്‍ത്ഥികളും രക്ഷിതാക്കളും ഉള്‍പ്പെടെ നിരവധി പേര്‍ പങ്കെടുത്തു. പരിപാടി പ്രിന്‍സിപ്പള്‍ മുഹമ്മദ് മുസ്തഫ ഉദ്ഘാടനം ചെയ്തു. അലിഫ് ഗ്രൂപ്പ് ഓഫ് സ്‌കൂള്‍സ് സി ഇ ഒ ലുഖ്മാന്‍ അഹമ്മദ് അധ്യക്ഷനായി.

ആയിഷ അഞ്ചല കെ ടി, സിദ്ധാര്‍ത്ഥ് സുനില്‍, ഫര്‍ഹ മണിപ്പറമ്പത്ത്, നുഹ ഫാത്തിമ, നഹ് ല ഷാഹുല്‍, മുഹമ്മദ് ഫാദില്‍ ലുഖ്മാന്‍ എന്നിവരാണ് 24-25 അധ്യയന വര്‍ഷത്തെ സ്‌കൂള്‍ ടോപ്പേഴ്സ്. പരീക്ഷ എഴുതിയ കുട്ടികളില്‍ 68 ശതമാനം വിദ്യാര്‍ത്ഥികള്‍ ഡിസ്റ്റിങ്ഷനും 32 ശതമാനം കുട്ടികള്‍ ഫസ്റ്റ് ക്ലാസും കരസ്ഥമാക്കി.

വിദ്യാര്‍ത്ഥികള്‍ക്ക് മികച്ച വിജയം സമ്മാനിക്കുന്നതിനായി പരിശ്രമിച്ച രക്ഷിതാക്കളെയും അധ്യാപകരെയും സി ഇ ഒ ലുഖ്മാന്‍ അഹമ്മദ് അഭിനന്ദിച്ചു. സമ്മാനദാന ശേഷം രക്ഷിതാക്കളും വിദ്യാര്‍ത്ഥികളും അധ്യാപകരും കഴിഞ്ഞ വര്‍ഷത്തെ അനുഭവങ്ങള്‍ പങ്കുവെച്ചു. സംഗമത്തില്‍ ബോയ്‌സ് സെക്ഷന്‍ ഹെഡ്മാസ്റ്റര്‍ നൗഷാദ് നാലകത്ത് സ്വാഗതവും ഗേള്‍സ് സെക്ഷന്‍ പ്രധാനാധ്യാപിക ഫാത്തിമ ഖൈറുന്നിസ നന്ദിയും പറഞ്ഞു.