മദീന- മദീനയിലെ സെന്ട്രല് ഈത്തപ്പഴ മാര്ക്കറ്റില് പുതിയ സീസണിലെ ഈത്തപ്പഴങ്ങളുടെ വില്പ്പന ആരംഭിച്ചു. ലൂണ, റബിയ, അജ്വ തുടങ്ങിയ ഇനം ഈത്തപ്പഴങ്ങളാണ് വിപണിയിലെത്തിയിട്ടുള്ളതെന്ന് സൗദി പ്രസ് ഏജന്സി റിപ്പോര്ട്ട് ചെയ്തു.
പുതിയ സീസണിലെ വിളവെടുപ്പ് മദീനയുടെ പടിഞ്ഞാറന് ഭാഗങ്ങളിലുള്ള തോട്ടങ്ങളില് നിന്നുള്ള ആദ്യ ഉല്പാദനമാണ്. പുതിയ സീസണ് ഉല്പന്നങ്ങള് കാരണം മാര്ക്കറ്റ് സജീവമായിരിക്കുകയാണെങ്കിലും, വിലകളില് കാര്യമായ വര്ദ്ധനവ് രേഖപ്പെടുത്തിയിട്ടുണ്ട്. സീസണിന്റെ തുടക്കത്തില് ഈത്തപ്പഴങ്ങളുടെ ലഭ്യത കുറവായതാണ് കാരണം. എങ്കിലും, ഈ സീസണില് പ്രാദേശിക വിപണികളുടെ ആവശ്യങ്ങള് നിറവേറ്റാന് കഴിയുന്ന സമൃദ്ധമായ വിളവെടുപ്പ് ഉണ്ടാകുമെന്നും വരും ആഴ്ചകളില് വിതരണം സ്ഥിരവും സമൃദ്ധവുമാകുമെന്നും പ്രതീക്ഷിക്കുന്നു.
ഈ സീസണിലെ ആദ്യ ഉല്പാദനം ലൂണ, അല്-അജ്വ ഇനങ്ങളില് നിന്നുള്ള പരിമിത അളവിലാണെന്ന് മദീന ഈത്തപ്പഴ മാര്ക്കറ്റ് മേധാവി മുഹമ്മദ് അദ്ദാഹിയാബി പറഞ്ഞു. 'മൂന്ന് കിലോഗ്രാം ലൂണ ഈത്തപ്പഴത്തിന് 70 റിയാലും, ഒരു ബോക്സ് അജ്വക്ക് 45 റിയാലുമാണ് വില,' അദ്ദേഹം കൂട്ടിച്ചേര്ത്തു.
Related News
