റിയാദ്- സൗദി തലസ്ഥാനത്തെ ഏറ്റവും പുതിയ ആകര്ഷണമായ സ്പോര്ട്സ് ബൊളിവാര്ഡിലൂടെ നടക്കുമ്പോള് നിങ്ങളുടെ കണ്ണില് ഉടക്കുന്ന ഒരു പുതിയ നിര്മ്മിതിയുണ്ട്. പ്രിന്സ് മുഹമ്മദ് ബിന് സല്മാന് ബിന് അബ്ദുല് അസീസ് റോഡും പ്രിന്സ് തുര്ക്കി ബിന് അബ്ദുല് അസീസ് അല് അവ്വല് റോഡും ചേരുന്ന കവലയില് നിറങ്ങളാലും സ്വഭാവ സവിശേഷതകളാലും വേറിട്ടുനില്ക്കുന്ന ഒരു ഗോപുരം.
'ദി ആര്ട്സ് ടവര്' എന്ന് പേരിട്ടിരിക്കുന്ന ഈ നിര്മ്മിതിക്ക് പിന്നില് പ്രശസ്ത സൗദി കലാകാരന് അബ്ദുല്നാസര് ഗാരമാണ്. 'സിറാത്ത്' (പാത), 'റോഡ് ടു മക്ക' തുടങ്ങിയ തന്റെ ആദ്യകാല സൃഷ്ടികളിലൂടെ വാസ്തുവിദ്യയുടെ പശ്ചാത്തലത്തില് സാധാരണ കാര്യങ്ങളെ അദ്ദേഹം മനോഹരമായി ചിത്രീകരിച്ചിട്ടുണ്ട്.
'ഇവിടെ നടന്നുകൊണ്ടിരിക്കുന്ന പരിവര്ത്തനത്തിന് ഈ സൃഷ്ടി ഒരു സാക്ഷിയാണ്,' ഗാരം പറഞ്ഞു. 'ഇതൊരു സമൂഹത്തിന് സംസ്കാരം എത്രത്തോളം പ്രധാനമാണെന്നതിന്റെ തെളിവാണ്. സാംസ്കാരിക അടിസ്ഥാന സൗകര്യങ്ങളിലെ നിക്ഷേപത്തിന്റെ പ്രതീകമാണിത്. ഊര്ജ്ജത്തിന്റെ ഒരു പ്രതീകത്തെ സര്ഗാത്മക ആവിഷ്കാരത്തിനുള്ള ഒരു ദീപസ്തംഭമാക്കി മാറ്റുന്നതിലൂടെ ഈ ഗോപുരം ഈ പരിവര്ത്തനത്തെ പ്രതിനിധീകരിക്കുന്നു.'
83.5 മീറ്റര് ഉയരമുള്ള നിരവധി വൈദ്യുതി ടവറുകളില് ഒന്നായിരുന്ന ഇത് സ്പോര്ട്സ് ബൊളിവാര്ഡ് പദ്ധതിക്ക് വേണ്ടി നീക്കം ചെയ്യാന് ഉദ്ദേശിച്ചിരുന്നതാണ്. 'ഒരെണ്ണം എനിക്ക് കിട്ടുമോ എന്ന് ഞാന് ചോദിച്ചു,' ഗാരം വിശദീകരിച്ചു. ബൊളിവാര്ഡ് മനോഹരമാക്കാന് നിര്ദ്ദേശം സമര്പ്പിച്ച കലാകാരന്മാരില് ഒരാളെന്ന നിലയില് നിലവിലുള്ള ഈ നിര്മ്മിതി ഉപയോഗിക്കാന് അദ്ദേഹം താല്പര്യപ്പെടുകയായിരുന്നു.
ആകെ 691 വര്ണ്ണാഭമായ പാനലുകളാണ് ഗോപുരത്തിന് ജീവന് നല്കാനായി സ്ഥാപിച്ചത്. ഉപയോഗിച്ചിരിക്കുന്ന ഭാഗങ്ങളെല്ലാം രാജ്യത്തിന്റെ മഹത്തായ കഥയുമായി ബന്ധപ്പെട്ടതാണ്, അതില് സാമ്പത്തിക വൈവിധ്യം, സാംസ്കാരിക പരിവര്ത്തനങ്ങള്, സാമൂഹിക മാറ്റങ്ങള് എന്നിവ ഉള്പ്പെടുന്നു.
ഈ സൃഷ്ടിയെക്കുറിച്ച് എഴുത്തുകാരനും ക്യുറേറ്ററുമായ നാറ്റോ തോംസണ് പറഞ്ഞു: 'ഊര്ജ അടിസ്ഥാന സൗകര്യങ്ങളുടെ ഒരു പ്രതീകത്തെ പുനരുപയോഗിച്ച് കലാപരമായ ആവിഷ്കാരത്തിന്റെ ഒരു ദീപസ്തംഭമാക്കി മാറ്റുന്നതിലൂടെ, സൗദി അറേബ്യയുടെ വികസന യാത്രയില് കലയുടെയും സംസ്കാരത്തിന്റെയും വളര്ന്നുവരുന്ന പങ്ക് ഗാരം ഉയര്ത്തിക്കാട്ടുന്നു.'
'എണ്ണയും ഊര്ജവും മുന്പ് ഉണ്ടായിരുന്നതുപോലെ, കലയും സര്ഗാത്മകതയും അതിന്റെ സ്വത്വത്തിന്റെ അവിഭാജ്യ ഘടകമാക്കി, അതിന്റെ സാംസ്കാരിക ഭൂമികയെ പരിപോഷിപ്പിക്കുന്നതിനുള്ള രാജ്യത്തിന്റെ പ്രതിബദ്ധതയുടെ ജീവിക്കുന്ന തെളിവായി ഗോപുരം നിലകൊള്ളുന്നുവെന്നും അദ്ദേഹം പറഞ്ഞു.
