മദീന- മദീനയിലെ കേന്ദ്ര മേഖലയിലെ ഏറ്റവും പുതിയ വികസന പദ്ധതികള്‍ മദീന റീജിയണല്‍ മുനിസിപ്പാലിറ്റി പൂര്‍ത്തിയാക്കി. പ്രധാന റോഡുകള്‍, കാല്‍നടയാത്രക്കാര്‍ക്ക് സൗകര്യപ്രദമായ നടപ്പാതകള്‍, സുരക്ഷിതമായ പൊതു ചത്വരങ്ങള്‍, ലാന്‍ഡ്സ്‌കേപ്പിംഗ് എന്നിവ പദ്ധതികളില്‍ ഉള്‍പ്പെടുന്നു. പ്രവാചകന്റെ പള്ളിക്ക് ചുറ്റുമുള്ള നഗരവികസനം മെച്ചപ്പെടുത്തുന്നതിനും മദീന സന്ദര്‍ശിക്കുന്ന തീര്‍ത്ഥാടകരുടെ അനുഭവം സമ്പന്നമാക്കുന്നതിനും ഈ പദ്ധതി ലക്ഷ്യമിടുന്നു.

കേന്ദ്ര മേഖലയിലെ നിരവധി പ്രധാന റോഡുകളുടെ പുനരുദ്ധാരണവും വികസനവും മുനിസിപ്പാലിറ്റി ഏറ്റെടുത്തു. തീര്‍ത്ഥാടകര്‍ക്ക് കൂടുതല്‍ സുഖകരവും മനോഹരവുമായ അന്തരീക്ഷം ഒരുക്കുന്നതിനായി മെച്ചപ്പെടുത്തിയ വെളിച്ചത്തോടുകൂടിയ സുരക്ഷിതമായ കാല്‍നട പാതകളും വികസിപ്പിച്ച ഹരിത ഇടങ്ങളും ഇതില്‍ ഉള്‍പ്പെടുത്തിയിട്ടുണ്ട്.

പദ്ധതികളില്‍ 68,196 ചതുരശ്ര മീറ്റര്‍ റോഡുകള്‍, 67,396.57 ചതുരശ്ര മീറ്റര്‍ ഹരിത ഇടങ്ങള്‍, 41,156.09 ദശലക്ഷം ചതുരശ്ര മീറ്റര്‍ നടപ്പാതകളും പൊതു ചത്വരങ്ങളും ഉള്‍പ്പെട്ടതായി മദീന മുനിസിപ്പാലിറ്റി അറിയിച്ചു. കൂടാതെ, 41,586.51 ദശലക്ഷം ചതുരശ്ര മീറ്റര്‍ സുരക്ഷിതമായ വാഹന പാതകള്‍ ഒരുക്കുകയും, 192 അലങ്കാര ലൈറ്റ് തൂണുകള്‍ സ്ഥാപിക്കുകയും, 6,210 വിവിധയിനം മരങ്ങള്‍ നടുകയും ചെയ്തു. 5,509 ചതുരശ്ര മീറ്റര്‍ നടീല്‍ തടങ്ങളും ഈ പദ്ധതിയുടെ ഭാഗമായി നിര്‍മ്മിച്ചു.