.jpg)
ജിസാന്: ജിസാന് ബെയിഷില് ജോലിസ്ഥലത്ത് വെച്ച് ഉറക്കത്തിനിടെ ഹൃദയാഘാതം മൂലം മരിച്ച കോഴിക്കോട് ഫറോക്ക് പരുത്തിപ്പാറ വടക്കെണി പൂവത്തുംകണ്ടി വീട്ടില് അഫ്സല് താഹ(35)യുടെ മൃതദേഹം സഹപ്രവര്ത്തകരുടെയും സുഹൃത്തുക്കളുടെയും സാന്നിധ്യത്തില് ബെയിഷ് അല്രാജി ഖബര്സ്ഥാനില് ഖബറടക്കി. അല്ദര്ബ് ജനറല് ആശുപത്രി മോര്ച്ചറിയില് സൂക്ഷിച്ചിരുന്ന മൃതദേഹം ഇന്ന് രാവിലെയാണ് ബെയിഷിലേക്ക് കൊണ്ടുവന്നത്. അല്രാജി മസ്ജിദില് നടന്ന മയ്യിത്ത് നമസ്കാരത്തിലും ഖബറടക്ക ചടങ്ങുകളിലും ജിസാനിലെ സാമൂഹിക പ്രവര്ത്തകരും പ്രവാസികളുമടക്കം നിരവധിപേര് പങ്കെടുത്തു. കെ.എം.സി.സി സൗദി ദേശീയ സെക്രട്ടറി ഹാരിസ് കല്ലായിയുടെ നേതൃത്വത്തില് കെ.എം.സി.സി പ്രവര്ത്തകരാണ് മൃതദേഹം ഖബറടക്കുന്നതിനുള്ള നിയമനടപടികള് പൂര്ത്തീകരിച്ചത്.
കഴിഞ്ഞ എട്ടു വര്ഷമായി ജിസാന് ബെയിഷില് റിവൈവ കമ്പനിയില് ജോലിചെയ്യുകയായിരുന്ന അഫ്സല് ഈ മാസം 15 നാണ് മരിച്ചത്. ബെയിഷിലെ ജോലിസ്ഥലത്ത് രാത്രി മുറിയില് ഉറങ്ങുകയായിരുന്ന അഫ്സലിനെ സഹപ്രവര്ത്തകര് മരിച്ചനിലയില് കണ്ടെത്തുകയായിരുന്നു. അഫ്സല് ദീര്ഘകാലമായി അപസ്മാര രോഗ ബാധിതനായിരുന്നു. വടക്കെണി കോയാലിയുടെയും ഖദീജയുടെയും മകനാണ്. വിവാഹിതനും മൂന്നു കുട്ടികളുടെ പിതാവുമാണ്.
Related News
