ദമാം: മലയാളി കുടുംബം സഞ്ചരിച്ച വാഹനം അപകടത്തില്‍പെട്ട് ഒരു കുട്ടി മരിച്ചു. തൃശൂര്‍ നാട്ടിക സ്വദേശി കല്ലിപറമ്പില്‍ സിദ്ദീഖ് ഹസൈനാറിന്റെ ഇരട്ടക്കുട്ടികളിലൊരാളായ ഫര്‍ഹാന ഷെറിന്‍ (18) ആണ് മരിച്ചത്. ബഹ്‌റൈനില്‍ പോയി റിയാദിലേക്കു മടങ്ങുമ്പോള്‍ ഹുറൈറയില്‍ വച്ചായിരുന്നു അപകടം. ചൊവ്വാഴ്ച പുലര്‍ച്ചെയുണ്ടായ അപകടത്തില്‍ സിദ്ദീഖും ഭാര്യയും മറ്റ് രണ്ട് കുട്ടികളും പരിക്കുകളോടെ ആശുപത്രിയില്‍ ചികിത്സയിലാണ്. ഫര്‍ഹാന ഷെറിന്‍ സംഭവ സ്ഥലത്ത് തന്നെ മരിച്ചു. പരിക്കേറ്റവരില്‍ ഒരാളുടെ നില ഗുരതരമെന്നു പറയുന്നു.

റിയാദില്‍ ജോലി ചെയ്യുന്ന സിദ്ദീഖ് സന്ദര്‍ശന വിസയിലെത്തിയ കുടുംബത്തിന്റെ വിസ പുതുക്കാനാണ് ബഹ്‌റൈനില്‍ പോയത്. ദമാം-റിയാദ് ഹൈവേയില്‍ ഖുറൈസ് പട്ടണത്തിന് സമീപം ഹുറൈറ എന്ന സ്ഥലത്ത് വെച്ച് ഇവര്‍ സഞ്ചരിച്ച കാര്‍ അപകടത്തില്‍പ്പെടുകയായിരുന്നു.