ജിസാന്: കോട്ടയം സ്വദേശിനിയായ നഴ്സ് ഹൃദയാഘാതം മൂലം ജിസാന് അല്ദര്ബില് നിര്യാതയായി. സൗദി ആരോഗ്യമന്ത്രാലയത്തിനു കീഴിലുള്ള ജിസാന് അല്ഷുഖൈഗ് പ്രാഥമികാരോഗ്യ കേന്ദ്രത്തിലെ സ്റ്റാഫ് നഴ്സ് അനുഷ്മ ആനന്ദാണ് (42) മരിച്ചത്. കോട്ടയം തോട്ടയ്ക്കാട് സന്ധ്യാ സദനത്തില് സന്തോഷ് കുമാര് സുകുമാരന്റെ ഭാര്യയാണ്. ഇന്ന് രാവിലെ താമസസ്ഥലത്ത് വെച്ച് നെഞ്ചുവേദനയുണ്ടായതിനെ തുടര്ന്ന് അല്ദര്ബ് ജനറല് ആശുപത്രിയില് പ്രവേശിപ്പിച്ചിരുന്ന അനുഷ്മയ്ക്ക് ഹൃദയാഘാതമുണ്ടാകുകയും ഉടന് അന്ത്യം സംഭവിക്കുകയുമായിരുന്നു. സൗദി ആരോഗ്യ മന്ത്രാലയത്തില് നിന്ന് സേവനം അവസാനിപ്പിച്ച് നാട്ടിലേക്ക് മടങ്ങാനുള്ള ഒരുക്കത്തിനിടെയാണ് ആകസ്മിക വിയോഗമുണ്ടായത്.
കഴിഞ്ഞ പതിനേഴ് വര്ഷമായി ജിസാനില് നഴ്സായിരുന്നു അനുഷ്മ. ഭര്ത്താവ് സന്തോഷ് കുമാറും ഏക മകളും നാട്ടിലാണ്. ബ്രഹ്മാനന്ദന്- ഐഷാ ബായി ദമ്പതികളുടെ മകളാണ്. അല്ദര്ബ് ജനറല് ആശുപത്രി മോര്ച്ചറിയില് സൂക്ഷിച്ചിരിക്കുന്ന മൃതദേഹം നിയമനടപടികള് പൂര്ത്തിയാക്കി നാട്ടിലയ്ക്കുമെന്ന് കെ.എം.സി.സി പ്രവര്ത്തകര് അറിയിച്ചു. കെ.എം.സി.സി ജിസാന് സെന്ട്രല് കമ്മിറ്റി പ്രസിഡന്റ് ശംസു പൂക്കോട്ടൂരിന്റെ നേതൃത്വത്തില് അല്ദര്ബ് ഏരിയ ഭാരവാഹികള് നിയമനടപടികള് ആരംഭിച്ചിട്ടുണ്ട്.
Related News
