മക്ക: പരിശുദ്ധ കഅ്ബയെ പുതിയ പുടവ (കിസ്വ) അണിയിച്ചു. മുഹറം ഒന്നായ വ്യാഴാഴ്ച പുലര്‍ച്ചെയായിരുന്നു കിസ്‌വ അണിയിക്കല്‍ ചടങ്ങു നടന്നത്. കറുത്ത ശുദ്ധമായ പ്രകൃതിദത്ത പട്ട് ഉപയോഗിച്ചാണ് കിസ്വ നിര്‍മിച്ചിരിക്കുന്നത്. ഇതിന് 14 മീറ്റര്‍ ഉയരവും 12 മീറ്റര്‍ നീളവുമാണുള്ളത്. 1,415 കിലോഗ്രാമാണ് കിസ് വയുടെ ഭാരം. 120 കിലോഗ്രാം സ്വര്‍ണം വെള്ളി നൂലുകള്‍, 60 കലോഗ്രാം ശുദ്ധമായ വെള്ളി, 825 ഗ്രാം പട്ട്, 410 കിലോ ഗ്രാം അസംസ്‌കൃത പരുത്തി എന്നിവ ഉപയോഗിച്ചാണ് കിസ് വ നിര്‍മിക്കുന്നത്. 154 വിദഗ്ധ തൊഴിലാളികളാണ് കിസ് വ മാറ്റത്തില്‍ പങ്കെടുത്തത്. കിങ് അബ്ദുല്‍ അസീസ് കിസ് വ കോംപ്ലക്സില്‍നിന്ന് പ്രത്യേക ട്രെയിലറിലാണ് കിസ്വ മക്ക മസ്ജിദുല്‍ ഹറാമില്‍ എത്തിച്ചത്. ഇതിന് മുന്നോടിയായി ബുധനാഴ്ച വൈകീട്ട് പഴയ കിസ്വയുടെ സ്വര്‍ണം പൂശിയ ഭാഗങ്ങള്‍ നീക്കം ചെയ്യുന്ന പ്രക്രിയ പൂര്‍ത്തിയായിക്കിയിരുന്നു.

11 മാസം കൊണ്ടാണ് ഉമ്മുല്‍-ജൂദിലെ കിസ്വ നിര്‍മാണശാലയായ കിങ് അബ്ദുല്‍ അസീസ് കോംപ്ലക്സില്‍ കിസ്‌വ നിര്‍മാണം പൂര്‍ത്തിയായത്. ഹിജ്‌റ 1447ന്റെ തുടക്കമാണ് മുഹറം ഒന്ന്. മുഹറം ഒന്നിനാണ് എല്ലാവര്‍ഷവും കിസവ മാറ്റം. നിര്‍മാണം പൂര്‍ത്തിയായ പുതിയ പുടവ കഅ്ബയെ അണിയിക്കാനായി ഈ മാസം ഏഴിനാണ് മക്ക മേഖല ഡെപ്യൂട്ടി ഗവര്‍ണര്‍ അമീര്‍ സഊദ് ബിന്‍ മിശ്അല്‍ കഅ്ബയുടെ സുക്ഷിപ്പുകാരന്‍ അബ്ദുല്‍മലിക് ബിന്‍ ത്വഹ അല്‍ശൈബിക്ക് കൈമാറിയത്. കൈമാറ്റ രേഖയില്‍ ഹജ്ജ്, ഉംറ മന്ത്രിയും ഇരുഹറം ജനറല്‍ പ്രസിഡന്‍സി ഡയറക്ടര്‍ ബോര്‍ഡ് ചെയര്‍മാനുമായ ഡോ. തൗഫീഖ് അല്‍റബീഅയും അബ്ദുല്‍മലിക് ബിന്‍ ത്വഹ അല്‍ശൈബിയും ഒപ്പുവെക്കുകയും ചെയ്തിരുന്നു.