ജിദ്ദ: പത്തനംതിട്ട ജില്ലാ സംഗമം വനിതാ ദിനം 'പെണ് കരുത്ത് 2025' എന്ന പേരില് സുലൈമാനിയയ്ക്കു സമീപം അബു തുര്ക്കി ഇസ്തിറായില് വിവിധ കലാപരിപാടികളോട് കൂടി ആഘോഷിച്ചു. വനിതാ വിഭാഗം കണ്വീനര് ദീപിക സന്തോഷിന്റെ അധ്യക്ഷതയില് കൂടിയ പരിപാടികള് പിജെസ് പ്രസിഡന്റ് അയൂബ് ഖാന് പന്തളം ഉദ്ഘാടനം ചെയ്തു. ജിദ്ദ അല് ഹുക്കുമ ഇന്റര്നാഷണല് സ്കൂള് അധ്യാപികയും, കൗണ്സിലിംഗ് സൈക്കോളജിസ്റ്റും, എഴുത്തുകാരിയും, ജിദ്ദ സിജി വുമണ് കളക്റ്റീവ് വൈസ് ചെയര് പേഴ്സണുമായ നബീല അബുബക്കര് മുഖ്യ അതിഥി ആയിരുന്നു.
സ്ത്രീകളുടെ അവകാശത്തിനായി പോരാടുവാന് പുതിയ തലമുറയിലെ വനിതകള് സ്വയം പ്രാപ്തരാവണമെന്നും, കുടുംബ ബന്ധങ്ങള്ക്കും, ഔദ്യോഗിക സ്ഥാനമാനങ്ങള്ക്കും ഉപരിയായി സ്വന്തം കഴിവുകളെ ഉത്തേജിപ്പിക്കാനും, സര്ഗ്ഗാത്മകമായ കഴിവുകള് സമൂഹത്തിന് പ്രയോജനമാകുന്ന വിധം പ്രകടിപ്പിക്കാനും, കലാ സാംസ്കാരിക പ്രവര്ത്തനങ്ങളില് പങ്കാളിയാകുന്നതിനുമൊപ്പം മറ്റൊരാളെ സഹായിക്കുകയും ചെയ്യുന്ന കാര്യത്തിലും വനിതകള് പ്രാമുഖ്യം കൊടുക്കണമെന്ന് തന്റെ മുഖ്യ പ്രഭാഷണത്തില് നബീല അബുബക്കര് പറഞ്ഞു.
വനിതാ വിഭാഗം വാര്ഷിക റിപ്പോര്ട്ട് ലിയാ ജെനി അവതരിപ്പിച്ചു. പിജെഎസ് വൈസ് പ്രസിഡന്റ് (ആക്ടിവിറ്റി) അനില് കുമാര് പത്തനംതിട്ട, കള്ച്ചറല് കണ്വീനര് വര്ഗീസ് ഡാനിയല്, ഷബാന നൗഷാദ് എന്നിവര് ആശംസ പ്രസംഗം നടത്തി. വൈഷ്ണവി വിനോദ് അവതാരക ആയിരുന്നു. പ്രിയ സഞ്ജയ് സ്വാഗതവും, ജിയ അബീഷ് നന്ദിയും പറഞ്ഞു.
വനിതാ വിഭാഗം അവതരിപ്പിച്ച ഗ്രൂപ്പ് ഡാന്സ്, ഗാന സന്ധ്യ, നാദിയ നൗഷാദും ദീപിക സന്തോഷും ചിട്ടപ്പെടുത്തി കുട്ടികള് അവതരിപ്പിച്ച വിവിധ കലാ പരിപാടികള് ഹൃദ്യമായിരുന്നു. ബിജി സജി, സുശീല ജോസഫ്, നിഷ ഷിബു, ബീന അനില് കുമാര്, സൈന അലി, അനില മാത്യു, അനു ഷിജു, മോളി സന്തോഷ്, ജിഷ വിനോദ് കുമാര്, ലിജി ബൈജു, ജിനിമോള് ജോയ്, അശ്വതി അജയഘോഷ്, ആശ, മഞ്ചു ജിനു എന്നിവര് വിവിധ പരിപാടികള് അവതരിപ്പിക്കുകയും, നേതൃത്വം നല്കുകയും ചെയ്തു.
പുതിയ വനിതാ വിങ്ങ് ഭാരവാഹികളെ തെരഞ്ഞെടുത്തു.
ദീപിക സന്തോഷ് കണ്വീനറായും, ജിയ അബീഷ് ജോയിന്റ് കണ്വീനറായും തെരഞ്ഞെടുത്തു. വനിതാ ദിനാഘോഷത്തോടനുബന്ധിച്ചു നടന്ന യോഗത്തില് പുതിയ ഭാരവാഹികള് ചുമതലയേറ്റു.
