.jpg)
ന്യൂഡല്ഹി: പ്രവാസി ലീഗല് സെല് സൗദി അറേബ്യ ചാപ്റ്റര് കോര്ഡിനേറ്ററായി പീറ്റര് വര്ഗ്ഗീസ് നിയമിതനായി. സൗദി അറേബ്യയിലെ റിയാദില് 33 വര്ഷമായി ഓട്ടോമേഷന് എഞ്ചിനീയര് ആയി ജോലി ചെയ്യുന്ന പീറ്റര് വര്ഗീസ് സൗദി അറേബ്യയിലും ഇന്ത്യയിലെയും വ്യവസായിക മേഖലയില് വിവിധ ഇന്ഡസ്ട്രിയല് ഓട്ടോമേഷന് പദ്ധതികള്ക്ക് തന്റെ പരിചയസമ്പത്ത് പ്രയോജനപ്പെടുത്തിയിട്ടുണ്ട്. മിഡില് ഈസ്റ്റില് ദുബായി ആസ്ഥാനമായി പ്രവര്ത്തിക്കുന്ന ജിസിസി ഗള്ഫ് അലൂമിനിയം കൗണ്സില് കമ്മിറ്റി മെമ്പറായി സേവനമനുഷ്ഠിക്കുന്ന പീറ്റര് വര്ഗീസ് ഇന്ത്യന് ഇന്സ്റ്റിറ്റിയൂഷന് ഓഫ് എന്ജിനീയേഴ്സിലെ അംഗവുമാണ്. റിയാദ് ഇന്ത്യന് അസോസിയേഷന്റെ എക്സിക്യൂട്ടീവ് കമ്മിറ്റി മെമ്പറായും ജോയിന്റ് കണ്വീനറായും സേവനമനുഷ്ഠിക്കുന്ന ഇദ്ദേഹം റിയാദിലെ വിവിധതരത്തിലുള്ള സാമൂഹിക സാംസ്കാരിക മേഖലകളില് സജീവ സാന്നിധ്യമാണ്.
പീറ്റര് വര്ഗ്ഗീസ് ഫൗണ്ടര് ആയ പവിത്രം വെല്ഫെയര് ഫൗണ്ടേഷന് കേരളത്തില് വിവിധ ക്ഷേമ പ്രവര്ത്തനങ്ങള് ചെയ്തുവരുന്നു. പ്രവാസി ഇന്ത്യക്കാര് ഏറെയുള്ള സൗദി അറേബ്യയില് ഈ നിയമനം പ്രവാസി ലീഗല് സെല് പ്രവര്ത്തനം കൂടുതല് സജീവമാക്കാന് സഹായകരമാവുമെന്ന് പ്രവാസി ലീഗല് സെല് ഗ്ലോബല് പ്രസിഡന്റ് അഡ്വ. ജോസ് എബ്രഹാം പറഞ്ഞു.
ലോകത്തെമ്പാടുമുള്ള പ്രവാസികളെ നിയമപരമായി ശാക്തീകരിക്കുകയെന്ന ലക്ഷ്യത്തോടെ ഒന്നര പതിറ്റാണ്ടുകളായി ഡല്ഹി ആസ്ഥാനമായി പ്രവര്ത്തിച്ചു വരുന്ന സര്ക്കാരിതര സംഘടനയാണ് പ്രവാസി ലീഗല് സെല്. നിലവില് വിദേശ ജോലികളുടെ മറവില് ക്രമാതീതമായി വര്ധിച്ചു വരുന്ന മനുഷ്യക്കടത്തുകള്ക്കിരയായ നിരവധി പ്രവാസികള്ക്കാണ് ഇതിനോടകം പ്രവാസി ലീഗല് സെല്ലിന്റെ നിയമപരമായ ഇടപെടലുകളിലൂടെ പ്രയോജനം ലഭിച്ചത്. വിദേശത്തേക്കുള്ള തൊഴില് തട്ടിപ്പുകള് തടയാന് കേരളാ ഹൈക്കോടതിയില് സമര്പ്പിച്ച കേസിലും പ്രവാസി ലീഗല് സെല്ലിന് അനുകൂല വിധി നേടാനായി. ഇതിന്റെ ഭാഗമായി കേരളാ സര്ക്കാര് നടപ്പിലാക്കിയ സ്പെഷ്യല് ടാസ്ക് ഫോഴ്സ് ഉള്പ്പടെയുള്ള സൗകര്യങ്ങളും പ്രാബല്യത്തില് വന്നിട്ടുണ്ട്. വിദേശപഠനത്തിനായി പോകുന്ന ഇന്ത്യന് വിദ്യാര്ത്ഥികള്ക്ക് നിയമ പരിരക്ഷ ഉറപ്പുവരുത്താനായി കേന്ദ്ര സര്ക്കാരിനുള്ള നിര്ദേശവും ലീഗല് സെല് നല്കിയ പൊതുതാല്പര്യ ഹര്ജിയില് ഡല്ഹി ഹൈക്കോടതി നല്കിയിട്ടുണ്ട്.
പ്രവാസികളെ നിയമപരമായി ശാക്തീകരിക്കുന്നതിനായി കൂടുതല് രാജ്യങ്ങളിലേക്കും വ്യത്യസ്ത മേഖലകളിലേക്കും ലീഗല് സെല് പ്രവര്ത്തനം വ്യാപിപ്പിക്കുമെന്ന് പ്രവാസി ലീഗല് സെല് ഗ്ലോബല് വക്താവും ബഹറിന് ചാപ്റ്റര് അധ്യക്ഷനുമായ സുധീര് തിരുനിലത്ത്, ദുബായ് ചാപ്റ്റര് അധ്യക്ഷന് ടി.എന്. കൃഷ്ണകുമാര് അബുദാബി ചാപ്റ്റര് അധ്യക്ഷന് ജയപാല് ചന്ദ്രസേനന്, ഷാര്ജ-അജ്മാന് ചാപ്റ്റര് അധ്യക്ഷ ഹാജിറാബി വലിയകത്ത്, കേരള ചാപ്റ്റര് ജനറല് സെക്രട്ടറി അഡ്വ. ആര് മുരളീധരന്, യൂകെ ചാപ്റ്റര് അധ്യക്ഷ അഡ്വ. സോണിയ സണ്ണി, ഒമാന് ചാപ്റ്റര് ഓര്ഡിനേറ്റര് രാജേഷ് കുമാര് എന്നിവര് പത്രക്കുറിപ്പില് അറിയിച്ചു.
Related News
