ദോഹ : ഖത്തറിലെ അമേരിക്കന്‍ സൈനിക താവളത്തിന് നേരെ ഇറാന്‍ ആക്രമണമുണ്ടായ ജൂണ്‍ 23 താങ്കളാഴ്ചയിലെ എല്ലാ ഗതാഗത നിയമലംഘനങ്ങളും ഒഴിവാക്കുമെന്ന് ആഭ്യന്തര മന്ത്രാലയം അറിയിച്ചു. രാജ്യം സാക്ഷ്യം വഹിച്ച അസാധാരണ സാഹചര്യത്തിലാണ്, തിങ്കളാഴ്ച രേഖപ്പെടുത്തിയ എല്ലാ ഗതാഗത നിയമലംഘനങ്ങളില്‍ നിന്നും ഡ്രൈവര്‍മാരെ ഒഴിവാക്കുന്നതെന്ന് ആഭ്യന്തര മന്ത്രാലയം എക്‌സ് അക്കൗണ്ടില്‍ വ്യക്തമാക്കി.

തിങ്കളാഴ്ച രാത്രി ഏഴു മണിയോടെ ഖത്തറിന്റെ ആകാശത്ത് മിസൈല്‍ ദൃശ്യങ്ങള്‍ പ്രത്യക്ഷപ്പെട്ടതും വലിയ സ്‌ഫോടന ശബ്ദങ്ങളും ജനങ്ങളില്‍ പരിഭ്രാന്തിയുണ്ടാക്കിയിരുന്നു. ജനങ്ങള്‍ എത്രയും വേഗം സുരക്ഷിത സ്ഥാനങ്ങളില്‍ എത്തുന്നതിനിടയില്‍ ഗതാഗത നിയമങ്ങള്‍ പാലിക്കുന്നതില്‍ വീഴ്ചകളുണ്ടാവാനുള്ള സാധ്യതകള്‍ കൂടി പരിഗണിച്ചാണ് നടപടി.

അപകടകരമായ സാഹചര്യത്തില്‍ വേഗത്തില്‍ പ്രതികരിക്കുന്നതിനും ജോലിസ്ഥലങ്ങളിലേക്കും സേവന സ്ഥലങ്ങളിലേക്കും മാറുന്നതിനും നടത്തിയ ശ്രമങ്ങളെ അഭിനന്ദിച്ചുകൊണ്ടാണ് ആ ദിവസം രേഖപ്പെടുത്തിയ എല്ലാ ഗതാഗത നിയമലംഘനങ്ങളും ആഭ്യന്തര മന്ത്രാലയം ഒഴിവാക്കിയത്. അതേസമയം, അന്നത്തെ ദിവസത്തേക്ക് മാത്രം ബാധകമാകുന്ന അസാധാരണമായ നടപടിയാണ് തീരുമാനമെന്ന് വ്യക്തമാക്കിയ മന്ത്രാലയം രാജ്യത്തെ ഗതാഗത നിയമങ്ങളും മാര്‍ഗനിര്‍ദേശങ്ങളും കൃത്യമായി പിന്തുടരാനും ആവശ്യപ്പെട്ടു.