റിയാദ്- സൗദി അറേബ്യയിലെ കിംഗ് സല്‍മാന്‍ ബിന്‍ അബ്ദുല്‍ അസീസ് റോയല്‍ റിസര്‍വിന്റെ വിശാലമായ ഭൂമിയില്‍ തഴച്ചുവളരുന്ന കാട്ടുചെടികളും മരങ്ങളും, ജൈവവൈവിധ്യം സംരക്ഷിക്കുന്നതിനും പ്രകൃതിദത്ത ആവാസവ്യവസ്ഥകളെ പുനരുജ്ജീവിപ്പിക്കുന്നതിനും അതോറിറ്റി നടത്തുന്ന വലിയ ശ്രമങ്ങളുടെ പ്രതിഫലനമാണ്. ഇത് മണ്ണിന്റെ സംരക്ഷണത്തിനും ജീവികള്‍ക്ക് അഭയവും ഭക്ഷണവും നല്‍കുന്നതിനും വലിയ സംഭാവന നല്‍കുന്നു.

മണലാരണ്യങ്ങള്‍ക്ക് മനോഹാരിത നല്‍കുന്ന ഒരു പ്രധാന സസ്യം ലാവെന്‍ഡര്‍ ആണ്. ഫെബ്രുവരി ആദ്യവാരം മുതല്‍ ഏപ്രില്‍ അവസാനം വരെ പൂവിടുന്ന, പര്‍പ്പിള്‍ നിറത്തിലുള്ള പൂക്കളുള്ള വാര്‍ഷിക സസ്യമാണിത്. 1.5 സെന്റീമീറ്റര്‍ വീതിയുള്ള ചിറകുകളുള്ള ഡിസ്‌ക് ആകൃതിയിലുള്ള കായ്കളാണ് ഇതിന്റെ പ്രത്യേകത. റിസര്‍വിന്റെ മിക്ക പ്രദേശങ്ങളിലും, പ്രത്യേകിച്ച് മണല്‍ മണ്ണില്‍ ഇത് വ്യാപകമായി കാണപ്പെടുന്നു. ലാവെന്‍ഡര്‍ ചെടികള്‍ക്ക് ഏകദേശം 40 സെന്റീമീറ്റര്‍ വരെ ഉയരം വയ്ക്കും.

റിസര്‍വ് ഡെവലപ്‌മെന്റ് അതോറിറ്റിയുടെ ശ്രമഫലമായി ലാവെന്‍ഡറും മറ്റ് നിരവധി സസ്യ, ജന്തുജാലങ്ങളും റിസര്‍വിനുള്ളിലെ സ്വാഭാവിക ആവാസവ്യവസ്ഥകളില്‍ തഴച്ചുവളരുകയാണ്. അടുത്തിടെ ഈ റിസര്‍വ് രാജ്യത്തെ ആദ്യത്തെ പ്രധാന അംഗീകൃത ജൈവവൈവിധ്യ സൈറ്റായി മാറി. സസ്യങ്ങളെ സംരക്ഷിക്കുന്നതിനും ആവാസവ്യവസ്ഥകളുടെ സുസ്ഥിരത വര്‍ദ്ധിപ്പിക്കുന്നതിനും അതോറിറ്റി ശാസ്ത്രീയ മാര്‍ഗ്ഗങ്ങള്‍ അവലംബിക്കുന്നുണ്ട്. ഇതില്‍ അധിനിവേശ സസ്യങ്ങളെ ചെറുക്കുക, വിറകുശേഖരണത്തില്‍ നിന്നും അമിത മേച്ചിലില്‍ നിന്നും സംരക്ഷിക്കുക, സസ്യ ജനിതക വിഭവങ്ങള്‍ സംരക്ഷിക്കുക, ആധുനിക നിരീക്ഷണ സാങ്കേതിക വിദ്യകള്‍ ഉപയോഗിക്കുക, സുസ്ഥിര കൃഷിരീതികള്‍ പ്രോത്സാഹിപ്പിക്കുക, രോഗങ്ങളെയും കീടങ്ങളെയും തടയുക എന്നിവയെല്ലാം ഉള്‍പ്പെടുന്നു.

ഈ റിസര്‍വ് അക്കേഷ്യ, സിദ്ര്, ഷഫ്‌ല, റാംത്ത് തുടങ്ങിയ നിരവധി കാട്ടു മരങ്ങള്‍ക്കും ആവാസകേന്ദ്രമാണ്. ഇവ മരുഭൂവത്്കരണം കുറയ്ക്കുന്നതിനും പാരിസ്ഥിതിക സന്തുലിതാവസ്ഥ വര്‍ദ്ധിപ്പിക്കുന്നതിനും സഹായിക്കുന്നു. മരുഭൂമിയിലെ മരങ്ങള്‍ തേനീച്ചകളുടെ ജീവിതത്തില്‍ ഒരു പ്രധാന പങ്ക് വഹിക്കുന്നുണ്ട്. തേനീച്ചക്കൂടുകള്‍ നിര്‍മ്മിക്കാന്‍ സ്വാഭാവികമായ ഇടങ്ങളും തേന്‍ ഉല്‍പാദനത്തിന് ആവശ്യമായ പൂന്തേനും ഇവ നല്‍കുന്നു.

വരള്‍ച്ചയെയും മരുഭൂവത്്കരണത്തെയും ചെറുക്കുന്നതിന് അതോറിറ്റി മികച്ച അന്താരാഷ്ട്ര രീതികളും ആര്‍ട്ടിഫിഷ്യല്‍ ഇന്റലിജന്‍സ് സാങ്കേതിക വിദ്യകളും ഉപയോഗിച്ച് നൂതനവും സുസ്ഥിരവുമായ പരിഹാരങ്ങള്‍ നടപ്പാക്കുന്നുണ്ട്. സസ്യജാലങ്ങളെ സംരക്ഷിക്കുന്നതിനും പാരിസ്ഥിതിക സന്തുലിതാവസ്ഥയെ പിന്തുണയ്ക്കുന്നതിനുമുള്ള അതോറിറ്റിയുടെ പദ്ധതികളുടെ ഭാഗമായി റിസര്‍വിന്റെ ഭൂമിയില്‍ 3 ദശലക്ഷത്തിലധികം വിവിധതരം തൈകള്‍ നട്ടു. കൂടാതെ, 7.5 ലക്ഷം ഹെക്ടറിലധികം നശിച്ച പ്രകൃതിദത്ത ആവാസവ്യവസ്ഥകളെ പുനരുജ്ജീവിപ്പിക്കുകയും, വന്യജീവികള്‍ക്ക് ഹാനികരമായ 119 ടണ്‍ മാലിന്യങ്ങള്‍ നീക്കം ചെയ്യുകയും, 7.5 ടണ്ണിലധികം പ്രാദേശിക വിത്തുകള്‍ വിതറുകയും ചെയ്തിട്ടുണ്ട്.