ആലപ്പുഴ: മാരാരിക്കുളം ഓമനപ്പുഴയില് മകളെ പിതാവ് തോര്ത്ത് ഉപയോഗിച്ച് കഴുത്തു ഞെരിച്ചു കൊലപ്പെടുത്തിയതിനു പിന്നില് മകളുടെ രാത്രി സഞ്ചാരം. ഭര്ത്താവു മായി പിണങ്ങി കഴിയുന്ന മകള് രാത്രി പുറത്തു പോകുന്നതിനെ പിതാവ് എതിര്ത്തിരുന്നു. സംഭവ ദിവസവും മകള് രാത്രി പുറത്തു പോയി മടങ്ങിവന്നപ്പോഴുണ്ടായ തര്ക്കം കൊലപാതകത്തില് കലാശിക്കുകയായിരുന്നു. മാരാരിക്കുളം തെക്ക് പഞ്ചായത്ത് പതിനഞ്ചാം വാര്ഡ് കുടിയാംശേരി വീട്ടില് എയ്ഞ്ചല് ജാസ്മിനാണ് (28) കൊല്ലപ്പെട്ടത്. സംഭവത്തില് പിതാവ് ഫ്രാന്സിസിനെ (ജോസ് മോന്, 53) മണ്ണഞ്ചേരി പൊലീസ് കസ്റ്റഡിയിലെടുത്തു.
എയ്ഞ്ചല് സ്ഥിരമായി രാത്രി ഒറ്റയ്ക്കു പുറത്തു പോകുന്നതിനെ ചൊല്ലി ഇതിനു മുന്പും വീട്ടില് തര്ക്കങ്ങള് ഉണ്ടായിട്ടുണ്ടെന്ന് പൊലീസ് വെളിപ്പെടുത്തി. നാട്ടുകാരില് ചിലര് എയ്ഞ്ചലിന്റെ രാത്രിയാത്ര ശരിയല്ലെന്ന മട്ടില് ഫ്രാന്സിസിനോട് പറഞ്ഞിരുന്നു. ഇതു ഫ്രാന്സിനെ വേദനിപ്പിച്ചു. ചൊവ്വാഴ്ച രാത്രി എയ്ഞ്ചല് പുറത്തുപോയി വന്നപ്പോള് ഫ്രാന്സിസ് വഴക്കു പറഞ്ഞു. ഇതു വാക്കുതര്ക്കത്തിലേക്കും കയ്യാങ്കളിയിലേക്കുമെത്തുകയായിരുന്നു. വഴക്കിനിടെ ഫ്രാന്സിസ് എയ്ഞ്ചലിന്റെ കഴുത്തില് ഞെരിച്ചു. തുടര്ന്ന് തോര്ത്തിട്ടു മുറുക്കി. ഫ്രാന്സിസിന്റെ പിതാവ് സേവ്യറും, മാതാവ് സൂസിയും, ഭാര്യ സിന്ധുവും സംഭവസമയം വീട്ടിലുണ്ടായിരുന്നു.
പഞ്ചായത്തംഗം ഉള്പ്പെടെയുള്ളവര് വീട്ടിലെത്തുമ്പോള് കട്ടിലില് കിടക്കുന്ന നിലയിലായിരുന്നു മൃതദേഹം. തുടര്ന്ന് ചെട്ടികാട് താലൂക്ക് ആശുപത്രിയിലേക്കു മാറ്റി. മണ്ണഞ്ചേരി പൊലീസ് നടത്തിയ പരിശോധനയില് കഴുത്തിലെ പാട് ശ്രദ്ധയില്പെട്ടതോടെയാണ് കൊലപാതകമാണെന്ന സംശയം തോന്നിയത്. തുടര്ന്നു ഫ്രാന്സിസിനെ സ്റ്റേഷനില് വിളിച്ചു വരുത്തി ചോദ്യം ചെയ്തപ്പോള് കൊലപാതകമാണെന്നു സമ്മതിക്കുകയായിരുന്നു.
എയ്ഞ്ചല് മരിച്ചുവെന്ന് ഉറപ്പായതോടെ ഭയപ്പെട്ട കുടുംബം രാവിലെ വരെ വീടിനുള്ളില്ത്തന്നെ ഇരുന്നു. പുലര്ച്ചെ 6 മണിയോടെ എയ്ഞ്ചലിനെ മരിച്ച നിലയില് കണ്ടെത്തിയെന്നു പറഞ്ഞു കരഞ്ഞതോടെയാണ് അയല്വാസികള് വിവരം അറിഞ്ഞത്. കരച്ചില് കേട്ടെത്തിയ അയല്വാസികളോട് മകള് വിളിച്ചിട്ട് അനങ്ങുന്നില്ലെന്നാണ് കുടുംബം പറഞ്ഞത്. ഇന്നലെ രാത്രി മണ്ണഞ്ചേരി പൊലീസ് ഇന്സ്പെക്ടര് ടോള്സണ് പി. ജോസഫിന്റെ നേതൃത്വത്തിലുള്ള സംഘം വീട്ടിലെത്തി വീട്ടുകാരെ പ്രത്യേകം ചോദ്യം ചെയ്തു. ഫ്രാന്സിസിന്റെ ഭാര്യ സിന്ധുവിനെ കേസില് പ്രതി ചേര്ത്തേക്കും.
ആലപ്പുഴയിലെ സ്വകാര്യ ആശുപത്രിയില് ലാബ് ടെക്നിഷ്യനായ എയ്ഞ്ചല് ഭര്ത്താവുമായി പിണങ്ങി ആറു മാസമായി സ്വന്തം വീട്ടിലായിരുന്നു താമസം. ഭര്ത്താവ്: പ്രഹിന് (മനു). പോസ്റ്റ്മാര്ട്ടത്തിനു ശേഷം ആലപ്പുഴ മെഡിക്കല് കോളജ് ആശുപത്രിയില് സൂക്ഷിച്ചിരിക്കുന്ന മൃതദേഹം ഇന്നു രാവിലെ 11ന് വീട്ടിലെത്തിക്കും. സംസ്കാരം 12ന് ഓമനപ്പുഴ സെന്റ് ഫ്രാന്സിസ് സേവ്യേഴ്സ് പള്ളിയില് നടത്തും.
Related News
