ദുബായ് : വേനല്‍ക്കാല വിമാന യാത്രാനിരക്ക് മുന്‍വര്‍ഷങ്ങളെ അപേക്ഷിച്ച് കുറവാണെന്ന് വിലയിരുത്തല്‍. അബൂദബിയില്‍ നിന്ന് മുംബൈയിലേക്കുള്ള ടിക്കറ്റുകള്‍ക്ക് ജൂലൈ 15നും 31നും ഇടയില്‍ യാത്ര ചെയ്യാന്‍ 708 ദിര്‍ഹമാണ്. അതേസമയം കോമണ്‍വെല്‍ത്ത് ഓഫ് ഇന്‍ഡിപെന്‍ഡന്റ് സ്റ്റേറ്റ്‌സ് (സി ഐ എസ്), ഇന്ത്യ എന്നിവിടങ്ങളിലെ ചില റൂട്ടുകളില്‍ ടിക്കറ്റ് 610 ദിര്‍ഹമിന് ലഭ്യമാണ്. ദുബായില്‍ നിന്ന് ലണ്ടനിലേക്കുള്ള ഇക്കണോമി ക്ലാസ് നിരക്കുകള്‍ കണക്റ്റിംഗ് ഫ്‌ലൈറ്റുകളില്‍ ശരാശരി 1,300 ദിര്‍ഹത്തിലും താഴെ ലഭിക്കുന്നുണ്ട്.

'കഴിഞ്ഞ ജൂലൈയില്‍ വിമാന നിരക്കുകള്‍ കൂടുതലായിരുന്നു. കഴിഞ്ഞ രണ്ട് വര്‍ഷങ്ങളെ അപേക്ഷിച്ച് നിരവധി സ്ഥലങ്ങളിലേക്കുള്ള നിരക്കുകള്‍ വളരെ ആകര്‍ഷകമാണ്.' ചില യൂറോപ്യന്‍ ലക്ഷ്യസ്ഥാനങ്ങളിലേക്ക് ഉയര്‍ന്ന നിരക്കുകള്‍ ഈടാക്കുന്നു. നേരിട്ടുള്ള സര്‍വീസുകള്‍ക്കാണിത്.

2,500 ദിര്‍ഹം മുതല്‍ 3,800 ദിര്‍ഹം വരെയാണ്, ബജറ്റ് എയര്‍ലൈനുകള്‍ ഈടാക്കുന്നത്. യൂറോ വിംഗ്സ്, വിസ് എയര്‍ അബൂദാബി, എയര്‍ അറേബ്യ തുടങ്ങിയ വിമാനക്കമ്പനികള്‍ ദുബായില്‍ നിന്ന് പാരീസിലേക്ക് 2,815 ദിര്‍ഹത്തിനും ബെര്‍ലിനിലേക്ക് 1,860 ദിര്‍ഹത്തിനും വണ്‍വേ നിരക്കുകള്‍ വാഗ്ദാനം ചെയ്യുന്നു.

പ്രവാസികള്‍ അധികപേരും ഇപ്പോള്‍ ഒന്നോ രണ്ടോ മാസത്തെ അവധിക്കു യാത്ര ചെയ്യുന്നില്ല. മറിച്ച് രണ്ട് മുതല്‍ പത്ത് ദിവസം വരെയുള്ള ചെറിയ കാലയളവിലേക്കാണ് യാത്ര. യു എ ഇയോട് ചേര്‍ന്നുള്ള അസര്‍ബൈജാന്‍, ഷെങ്കന്‍ രാജ്യങ്ങള്‍, ആഫ്രിക്കയുടെ ചില ഭാഗങ്ങള്‍ എന്നിവ ഹ്രസ്വകാല യാത്രക്കും തെരഞ്ഞെടുക്കുന്നവര്‍ നിരവധിയാണ്.