നിക്ഷേപം വേണ്ട, പ്രോപര്‍ട്ടി വാങ്ങേണ്ട...പുതിയ ഗോള്‍ഡന്‍ വിസയിലൂടെ ഇന്ത്യക്കാര്‍ക്ക് യു.എ.ഇയില്‍ സ്ഥിരതാമസമാക്കാം

ദുബായ് - യുണൈറ്റഡ് അറബ് എമിറേറ്റ്‌സ് (യു.എ.ഇ) സര്‍ക്കാര്‍ പുതിയൊരുതരം ഗോള്‍ഡന്‍ വിസ അവതരിപ്പിച്ചു. ഇതനുസരിച്ച് ഇനിമുതല്‍ ബിസിനസ്സിലോ പ്രോപ്പര്‍ട്ടിയിലോ നിക്ഷേപം നടത്താതെതന്നെ ഇന്ത്യക്കാര്‍ക്ക് യു.എ.ഇയില്‍ ദീര്‍ഘകാല താമസാനുമതി ലഭിക്കും. 'നോമിനേഷന്‍ അടിസ്ഥാനമാക്കിയുള്ള പുതിയ വിസ നയം' അനുസരിച്ച്, അപേക്ഷകര്‍ക്ക് 100,000 ദിര്‍ഹം (ഏകദേശം 23.3 ലക്ഷം രൂപ) ഒറ്റത്തവണ ഫീസ് അടച്ച് വിസ നേടാമെന്ന് ബന്ധപ്പെട്ടവരെ ഉദ്ധരിച്ച് പിടിഐ റിപ്പോര്‍ട്ട് ചെയ്തു.

2019-ല്‍ ആരംഭിച്ച ഗോള്‍ഡന്‍ വിസ പ്രോഗ്രാം നിക്ഷേപകര്‍ക്കും സംരംഭകര്‍ക്കും ഉയര്‍ന്ന വൈദഗ്ധ്യമുള്ള വ്യക്തികള്‍ക്കും വേണ്ടിയായിരുന്നു. 2022-ല്‍, യു.എ.ഇ ഏറ്റവും കുറഞ്ഞ പ്രോപ്പര്‍ട്ടി നിക്ഷേപത്തിനുള്ള തുക 2 ദശലക്ഷം ദിര്‍ഹമായി കുറച്ചിരുന്നു, ഇത് കൂടുതല്‍ അപേക്ഷകര്‍ക്ക് പ്രവേശനം സാധ്യമാക്കി.

പുതിയ നയപ്രകാരം ആര്‍ക്കെല്ലാം അപേക്ഷിക്കാം?

പുതുക്കിയ വിസ പ്രോഗ്രാമില്‍ കൂടുതല്‍ പ്രൊഫഷണലുകളെയും വിദഗ്ധരെയും ഉള്‍പ്പെടുത്തിയിട്ടുണ്ട്. ഇപ്പോള്‍ അപേക്ഷിക്കാന്‍ യോഗ്യരായവര്‍ ഇവരാണ്:

* ശാസ്ത്രജ്ഞര്‍, ഗവേഷകര്‍, വിദ്യാഭ്യാസ പ്രവര്‍ത്തകര്‍
* യൂണിവേഴ്‌സിറ്റി ഫാക്കല്‍റ്റി, സ്‌കൂള്‍ അധ്യാപകര്‍, 15 വര്‍ഷത്തിലേറെ പരിചയമുള്ള നഴ്‌സുമാര്‍
* സ്റ്റാര്‍ട്ടപ്പ് സ്ഥാപകര്‍, ബിസിനസ് പ്രൊഫഷണലുകള്‍
* യൂട്യൂബര്‍മാര്‍, പോഡ്കാസ്റ്റര്‍മാര്‍, ഡിജിറ്റല്‍ കണ്ടന്റ് ക്രിയേറ്റര്‍മാര്‍
* 25 വയസ്സിന് മുകളിലുള്ള അംഗീകൃത ഇ-സ്‌പോര്‍ട്‌സ് പ്രൊഫഷണലുകള്‍
* മാരിടൈം വ്യവസായ പ്രൊഫഷണലുകള്‍, ലക്ഷ്വറി യാച്ച് ഉടമകള്‍

'ഇന്ത്യക്കാര്‍ക്ക് യു.എ.ഇയുടെ ഗോള്‍ഡന്‍ വിസ നേടാന്‍ ഇത് ഒരു സുവര്‍ണ്ണാവസരമാണെന്ന് യു.എ.ഇ ആസ്ഥാനമായുള്ള റയാദ് ഗ്രൂപ്പിന്റെ മാനേജിംഗ് ഡയറക്ടര്‍ റയാദ് കമല്‍ അയൂബ് പറഞ്ഞു.

നോമിനേറ്റ് ചെയ്യപ്പെടുന്നതിന് മുമ്പ് അപേക്ഷകര്‍ കര്‍ശനമായ പശ്ചാത്തല പരിശോധനകള്‍ക്ക് വിധേയരാകും. ഇതില്‍ താഴെ പറയുന്നവ ഉള്‍പ്പെടുന്നു:

* കള്ളപ്പണം വെളുപ്പിക്കല്‍ വിരുദ്ധ പരിശോധനകളും ക്രിമിനല്‍ റെക്കോര്‍ഡ് പരിശോധനകളും
* സോഷ്യല്‍ മീഡിയ പ്രവര്‍ത്തനങ്ങളുടെ വിശകലനം
* ബിസിനസ്, സംസ്‌കാരം, ശാസ്ത്രം, വ്യാപാരം തുടങ്ങിയ മേഖലകളില്‍ അപേക്ഷകന്റെ സാധ്യതയുള്ള സംഭാവനകളുടെ വിലയിരുത്തല്‍.

'അതിനുശേഷം, റയാദ് ഗ്രൂപ്പ് അപേക്ഷ യു.എ.ഇ സര്‍ക്കാരിന്റെ അന്തിമ അനുമതിക്കായി അയക്കുമെന്ന് റയാദ് കമല്‍ പറഞ്ഞു.

ഈ നോമിനേഷന്‍ അടിസ്ഥാനമാക്കിയുള്ള വിസക്ക് ആജീവനാന്തകാലം സാധുതയുണ്ടാകും, പ്രോപ്പര്‍ട്ടി വിറ്റാല്‍ അവസാനിക്കുന്ന നിക്ഷേപം അടിസ്ഥാനമാക്കിയുള്ള വിസയില്‍നിന്ന് ഇത് വ്യത്യസ്തമാണ്.

എങ്ങനെ അപേക്ഷിക്കാം?

ഇന്ത്യയില്‍ നിന്നും ബംഗ്ലാദേശില്‍ നിന്നുമുള്ള അപേക്ഷകള്‍ നിലവില്‍ ഒരു പൈലറ്റ് പ്രോഗ്രാമിന്റെ ഭാഗമായി സ്വീകരിക്കുന്നുണ്ട്. ആദ്യ മൂന്ന് മാസത്തിനുള്ളില്‍ 5,000-ല്‍ അധികം അപേക്ഷകള്‍ ഇന്ത്യന്‍ പൗരന്മാരില്‍ നിന്ന് പ്രതീക്ഷിക്കുന്നു.

അപേക്ഷകര്‍ ദുബായ് സന്ദര്‍ശിക്കേണ്ടതില്ല. അവര്‍ക്ക് താഴെ പറയുന്നവയിലൂടെ അപേക്ഷിക്കാം:

* ഇന്ത്യയിലെയും ബംഗ്ലാദേശിലെയും വണ്‍ വാസ്‌കോ സെന്ററുകള്‍ (One VASCO centres)
* റയാദ് ഗ്രൂപ്പിന്റെ രജിസ്റ്റര്‍ ചെയ്ത ഓഫീസുകള്‍
* ഓണ്‍ലൈന്‍ പോര്‍ട്ടല്‍ അല്ലെങ്കില്‍ ഒരു പ്രത്യേക കോള്‍ സെന്റര്‍

റയാദ് ഗ്രൂപ്പും വിസ സേവന ദാതാക്കളായ വിഎഫ്എസും അപേക്ഷകള്‍ പരിശോധിച്ച് യു.എ.ഇ സര്‍ക്കാരിലേക്ക് അയയ്ക്കുന്നതിന് ചുമതലപ്പെടുത്തപ്പെട്ടിട്ടുണ്ട്.

ഗോള്‍ഡന്‍ വിസ ദീര്‍ഘകാലാടിസ്ഥാനത്തിലുള്ള നിരവധി പ്രയോജനങ്ങള്‍ നല്‍കുന്നു:

* യു.എ.ഇയില്‍ സ്ഥിരതാമസം
* ജോലി ചെയ്യാനോ ബിസിനസ് ആരംഭിക്കാനോ ഉള്ള സ്വാതന്ത്ര്യം
* കുടുംബാംഗങ്ങളെ സ്‌പോണ്‍സര്‍ ചെയ്യാനുള്ള കഴിവ്
* വീട്ടുജോലിക്കാരെ അല്ലെങ്കില്‍ ഡ്രൈവര്‍മാരെ നിയമിക്കാനുള്ള ഓപ്ഷന്‍
* വിസയുടെ സാധുത നിലനിര്‍ത്താന്‍ പ്രോപ്പര്‍ട്ടി നിക്ഷേപം നിലനിര്‍ത്തേണ്ടതില്ല. 'ഈ വിസ യു.എ.ഇയില്‍ താമസിക്കാനും ജോലി ചെയ്യാനുമുള്ള പൂര്‍ണ്ണ സ്വാതന്ത്ര്യം നല്‍കുന്നതായി റയാദ് കമല്‍ പിടിഐയോട് പറഞ്ഞു.

പൈലറ്റ് പ്രോഗ്രാമില്‍ ഇന്ത്യയെ ഉള്‍പ്പെടുത്തിയത് ഇരുരാജ്യങ്ങളും തമ്മിലുള്ള വര്‍ദ്ധിച്ചുവരുന്ന ബന്ധത്തെയാണ് സൂചിപ്പിക്കുന്നത്. 2022 മെയ് മുതല്‍ പ്രാബല്യത്തില്‍ വന്ന ഇന്ത്യയും യു.എ.ഇയും തമ്മിലുള്ള സമഗ്ര സാമ്പത്തിക പങ്കാളിത്ത കരാര്‍ ബിസിനസ്സ്, സാംസ്‌കാരിക, തന്ത്രപരമായ സഹകരണത്തെ ശക്തിപ്പെടുത്തിയിട്ടുണ്ട്.