ദുബായ് : യു എ ഇയില്‍ വിദഗ്ധ തൊഴിലാളികള്‍ ആവശ്യത്തിലധികമെന്നു റിപ്പോര്‍ട്ട്. മിഡില്‍, സീനിയര്‍ മാനേജ്മെന്റ് തലങ്ങളിലും നിരവധി ജോലികളില്‍ പ്രൊഫഷണലുകള്‍ മിച്ചമെന്നും മാനവശേഷി നിയമന വിഭാഗം മേധാവികള്‍ ചൂണ്ടിക്കാട്ടി. യു എ ഇ തൊഴില്‍ വിപണി നികുതിരഹിതമാണെന്നതാണ് കാരണം. മാത്രമല്ല ജനസംഖ്യ കുതിച്ചുയരുകയാണ്. തൊഴിലന്വേഷകര്‍ ഇപ്പോള്‍ ലഭ്യമായ റോളുകളില്‍ തൃപ്തിപ്പെടുന്നു.

'അപൂര്‍വം രംഗങ്ങളില്‍ നിര്‍ദിഷ്ട കഴിവുകളുടെ കുറവ് ഇപ്പോഴും നിലനില്‍ക്കുന്നുണ്ട്. നാമമാത്രമാണത്. ചില തസ്തികകളില്‍ പ്രൊഫഷണലുകളുടെ അമിത ലഭ്യതയും നിരീക്ഷിക്കപ്പെടുന്നു. ഇത് തൊഴിലന്വേഷകര്‍ക്കും യഥാര്‍ഥ ഒഴിവുകള്‍ക്കും ഇടയില്‍, പ്രത്യേകിച്ച് മിഡ്-സീനിയര്‍ തലത്തില്‍, അസന്തുലിതാവസ്ഥ സൃഷ്ടിക്കുന്നു'- സൊസൈറ്റി ഫോര്‍ ഹ്യൂമന്‍ റിസോഴ്‌സ് മാനേജ്മെന്റ് ഉദ്യോഗസ്ഥര്‍ ചൂണ്ടിക്കാട്ടി. 2024-ല്‍ അബൂദാബി ജനസംഖ്യ 7.5 ശതമാനം വര്‍ധിച്ചു ആദ്യമായി 40 ലക്ഷം കവിഞ്ഞു. ദുബായ് ഷാര്‍ജ, റാസ് അല്‍ ഖൈമ എന്നിവിടങ്ങളില്‍ സമാനമായ ഒഴുക്ക് അനുഭവപ്പെടുന്നുണ്ട്. ഇന്ന് യു എ ഇയില്‍ ഓരോ തസ്തികക്കും നൂറുകണക്കിന് അപേക്ഷകരാണ്. സീനിയോറിറ്റി അനുസരിച്ച് 600 മുതല്‍ 900 വരെ അപേക്ഷകള്‍ പ്രാദേശികമായി ലഭിക്കുന്നു. കഴിഞ്ഞ രണ്ട് വര്‍ഷത്തിനിടയില്‍, അളവ് ഏകദേശം 50 ശതമാനം വര്‍ധിച്ചു.

അനുഭവത്തിലും സാംസ്‌കാരിക അനുയോജ്യതയിലും സോഫ്റ്റ് സ്‌കില്ലുകളിലും തൊഴിലുടമകള്‍ കൂടുതല്‍ ഊന്നല്‍ നല്‍കുന്നു. 40 വയസ്സിന് മുകളിലുള്ള തൊഴിലന്വേഷകര്‍ക്ക് യു എ ഇയില്‍ നിയമനം ലഭിക്കുക എളുപ്പമല്ലാതായിട്ടുണ്ട്. ചില തൊഴിലുടമകള്‍ പ്രായമായ തൊഴിലാളികളെ കൂടുതല്‍ ചെലവേറിയവരായി കണ്ട് ഒഴിവാക്കുന്ന പ്രവണതയുമുണ്ട്.