.jpg)
ദുബായ്: കുടുംബ വഴക്കിനെത്തുടര്ന്ന് ഷാര്ജയില് വീണ്ടും മലയാളി യുവതിയുടെ തൂങ്ങി മരണം. കൊല്ലം ചവറ തെക്കുംഭാഗം കോയിവിളയില് അതുല്യഭവനില് രാജശേഖരന് പിള്ളയുടെയും തുളസീഭായിയുടെയും മകള് അതുല്യ സതീഷ് (30) ആണ് ഷാര്ജ റോളയിലെ ഫ്ലാറ്റില് തൂങ്ങിമരിച്ചത്. വെള്ളിയാഴ്ച രാത്രിയാണ് സംഭവം. ദുബായിലെ കെട്ടിടനിര്മാണ കമ്പനിയില് എന്ജിനീയറായ ഭര്ത്താവ് സതീഷും അതുല്യയുമായി രാത്രി വഴക്കുണ്ടായതായി ബന്ധുക്കള് പറഞ്ഞു. തുടര്ന്ന് സതീഷ് കൂട്ടുകാരോടൊപ്പം അജ്മാനില് പോയി പുലര്ച്ചെ നാലോടെ തിരിച്ചെത്തിയപ്പോഴാണ് അതുല്യയെ മരിച്ച നിലയില് കണ്ടെത്തിയത്.
സതീഷ് സ്ഥിരം മദ്യപിക്കുന്നയാളാണെന്നും അതുല്യയെ ദേഹോപദ്രവം ഏല്പ്പിക്കാറുണ്ടെന്നും ബന്ധുക്കള് ആരോപിച്ചു. ഇതുമായി ബന്ധപ്പെട്ട് ഷാര്ജ പൊലീസില് മുന്പ് പരാതി നല്കിയിട്ടുണ്ട്. വര്ഷങ്ങളായി യുഎഇയിലുള്ള സതീഷ് ഒന്നര വര്ഷം മുന്പാണ് അതുല്യയെ കൊണ്ടുവന്നത്. നേരത്തെ ദുബായിലായിരുന്നു താമസം. ദമ്പതികളുടെ പത്തുവയസുകാരിയായ ഏക മകള് ആരാധിക അതുല്യയുടെ മാതാപിതാക്കള്ക്കൊപ്പം നാട്ടിലാണ് താമസിക്കുന്നത്. ഏകസഹോദരി അഖില ഗോകുല് ഷാര്ജയില് ഇവരുടെ ഫ്ലാറ്റിന് സമീപം താമസിക്കുന്നുണ്ട്. ഭര്ത്താവിന്റെ പീഡനങ്ങളെക്കുറിച്ച് അതുല്യ അഖിലയോടു പറഞ്ഞിരുന്നെന്നാണ് വിവരം. ഷാര്ജ ഫൊറന്സിക് വിഭാഗത്തിലുള്ള മൃതദേഹം നടപടികള്ക്കുശേഷം നാട്ടിലേയ്ക്ക് കൊണ്ടുപോകും.
കഴിഞ്ഞ ചൊവ്വാഴ്ചയാണ് ഷാര്ജ അല് നഹ്ദയില് കൊല്ലം കേരളപുരം സ്വദേശിനി വിപഞ്ചിക (33), ഒന്നര വയസുള്ള മകള് വൈഭവിയെ കൊലപ്പെടുത്തിയ ശേഷം തൂങ്ങിമരിച്ചത്. ഭര്ത്താവുമായുള്ള പിണക്കത്തെ തുടര്ന്ന് മകളെ കൊന്ന് ഒരേ കയറില് കെട്ടിത്തൂങ്ങുകയായിരുന്നു. വൈഭവിയുടെ മൃതദേഹം ഇന്നലെ ദുബായ് ജബല് അലിയില് സംസ്കരിച്ചു. ഷാര്ജ ഫോറന്സിക് വിഭാഗത്തിലുള്ള വിപഞ്ചികയുടെ മൃതദേഹം അടുത്ത ദിവസം നാട്ടിലെത്തിച്ചു സംസ്കരിക്കും.
Related News
